Sunday Message | THUPI LUA CHILOU THEI I HI KEI

Na hon pi dan ka ngaihtuah in thupi hina tel e Toupa.

2019 khabul a i omlai in, khatawp December mu di'n kuamah i kilam en kei, huchibangmah in kuamah si di'n i kikoih kei, himahleh hiai message simkha thei lai a i om thupilua i chilou theikei hi. Toupa'n a ginna neu chik nei a khosa mihingte himahlehang ahehpihna itan, i mute ziak in thupina, pahtawina pe thak le uthuai ka sa hi. Halleluiah!

"Na honpi dan ka ngaihtuah in thupi hinatel e" Lungngaih haksat leh buaina tampi i tuak ahi maithei himahleh Toupa hoihna, chitnate en kik lehang vuina ding khat leng om hetlou hi. I hihna bangbang toh i tung ah vaihawm hileh hiai ni/hiaitan melmu di'n na kigingta hia? Hezekia bang in eite'n Toupa ma a bang suan di i nei a, Ama'n "TOUPA aw, na ma a thutak leh lungtang hoih, lungtang hoih kim pu a ka om zel dan leh, na mitmuh a thil hoih ka hih zel dan hehpihtak in thei gige in" chi'n a thum hi.

Tu kum 2019 a hatsatna na tuahte ziak a lungngai leh na mittui toh hun tampite na zang liamta a, himahleh i hoihnate ziak hilou a, Pathian a pat vualzawlna simseng vuallouh i muhte ziak in, kipahna mittui bangzah vei a luangta a? Pathian vualzawlna tang i hih theihna di'n zaw Amah i biak a Amah tung a kipahthu i gen mangngilh louh ding ana hi den hi. 

"Non piaksate bek a lungdam ka hikei hi; N'on piak lai dingte a zong na minphat ning" chitheih chiat di'n simtute Toupa'n 2020 mel hon musak leh chih deihsak thu ka hon khak hi.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | PATHIAN’ GAM

Pathian’ gam nek-leh-dawn thu hilou in, Kha Siangthou a diktatna, kituahna, kipahna ahizaw hi.

- Romans 4:17

Pathian’ Gam hih gingtute’ adia i lamet mun uh, tung ngei ding a i kihansuanna uh ahi. Theologian tamtak in Pathian’ gam kichi ahihleh “Pathian omna mun ahi” a chi uhi. Huai omdan bel Pathian mun tengteng a om (omni-present) ahihman in leitung mahmah leng Van gam a chi uh ahi. Ahihhang in, Van gam kichi hiai bang a munteng va chihmawk a pomhuai na sa ding uah aw! Laa phuaktu in, “innsung nuam zaw Van gam naipen ahi” ana chi ahi. Hiai laa hoih i sak ua, dik sa ihihleh tuh Van gam tuh innsung leng ahi chihna hipah mai mawle.

Van gam kichi sut ek ding chi le hang sut tham ching mahmah ding in ka gingta ahi. Huaiziak in, a tomzaw ding in a hilou khat hiai a kimu en masa le hang i chi uh ahi. Huai ahihleh, Van gam tuh “nek-leh-dawn thu hilou ahi” chih ahi. Hiai in nekhawm-takhawm kei un hon chi leng ahituankei ahi. I nekkhawm-dawnkhawm dingte pen khat-le-khat kingaihnatna leh deihsakna ahi. Nekkhawmna a sia chihna ahikei ahi. Himahleh, Pathian’ gam toh kisaikha lou ahi chihna ahi ahi.

A ban ah, Pathian’ gam tuh bang hihiam chih a hon gen hi. Kha Siangthou tungtawn a diktatna, kituahna leh kipahna ahi a chi ahi. `                                                                                                           

- Diktatna kichi ahihleh Khrist tungtawn a khelhna ngaihdamna ahi. Pathian vaihawmna a dik leh siamtang a omna genna leh lungsim leh hinkhua a sianthouna genna ahi.

- Kituahna leh muanna (peace) a kibang ahi. Pathian’ zahngaihna tanna ziak a lungmuanna ahihman in, lauthawng chihte omlou chihna ahi.

- Kipahna ahihleh khalam dinmun phawkna ziak a kipahna ahi. Kha Siangthou theihtelsakna ziak a lungkimna, sungtawng akipan ‘bang a chi dia aw!’ chihte omlou a khamuanna leh lungsim a puakgik neilou bang a kipahna chihte ahi.

Pathian’ gam thu ziak a eite’n pan la a, a nna i sep lailai un hiai thil thum-te ah kivelthak in mahni kibukkak chiat le hang uthuai ka sa ahi. Diktatna lam ah bang dinmun ah na om a? Kituahna in i lak uah vai a hawm taktak na hia? Kipahna kha a dimna nang ah a om in huai in hon lungmuangsak taktak na hiam?

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulhpen in nei hi. https://reachgwm.blogspot.com/

Sunday Message | NANG TOH CHRISTMAS (Christmas With You)

Lawmpa'n a WhatsApp status ah a pi' khut vuai thinthen lim ang koi a, a nuai ah "Pi aw, sawtpi hing dampi nalai in aw" chi gel hi. Ka mutah in "Gualzawna tang na hi" chi'n ka dawng(reply) hi.

Phalbi khovot nuai ah

"ULian, nang toh Christmas mangkhawm ut hina maizen ing e" chi'n Hoiching in a it mama a ULian liang a kingamkawm in gen hi. 

"Kei zong ut mama ing Ching aw."

Dai dide

"Hinanleh i maban ding ka khualna ziah a kalsuan loutheilou ka hi." 

Hoiching' khut tukawm in

"Hoimun pou ah um nanlei lungsung ah kingillou in, thum zing in 'Jesu Nang Toh Christmas Zangkhawm Nuam Ing' chilei ama'n i lungzuan hing nem ding a, kipahna hing guan ding ahi Ching" chi'n Lianpu in gen hi. 

Eite khel vang a leimun niampen a hing piang i Mangpa uh Jesu Khrist pian champha Christmas ni loupi lawm ding ngah a i umlai un i hinkhua uah bang i tuahkha uai? Bangchi'n i kisingsa uai? Tuni'n mi khenkhatte a it-le-ngaite un lenmual a khumsan ziah ua lungleng vungvung a um in kilawpna himhim neilou a hun zang i um ding uh a gintathuai hi. Tualeh i itpen, i ngainou toh munkhat a mankhawm theilou ding ziah a lungzuang nguingui a umkha zong i um maithei uhi. Tuathamlou in sil-le-ten mi neibang neizoulou ziah, innten-khosah hasatna ziah leh lawsapna chite ziah a thanopna himhim neilou zong i umkha ding uh a gintathuai lasih hi. 

Bangteng hileh tami Message i sim tungtawn in "Aw Jesu Nang Toh Christmas Zangkhawm Nuam ing" chi a thum ngam ding in i kideisah uhi. Jesu'n ei sang in i hasatna theizaw a, ei sang in i lungkham, i mangbat leh lungzuan hing theizaw hi. Tuaziah in thum in, gen in, ama chial vai. Christmas Khrist ngei toh mangkhawm ding in i lungsim ah ama mun awn vai. 

Mari in:

"Ka lungsim in Mangpa a pahtawi a,

Ka hagau zong ka hundampa tung ah a nuam ta seng hi.

A ziahpen ama'n a suahnu hawmthawhuai khu a theizing a, tu a kipat in kei pen mi hampha ei kichita va. — Luk 1:46 - 48

A bul penpen a ka lawmpa WhatsApp status ka gen zenzen khu "Pi-le-pu tehvuai phinphen neite'n amaute it a duat ding in, ka lawmpa bang a sawtpi ang dampina ding ua thumsah zel ding ahi" ka chi utna ziah ahi. Tuabang pipi, pupu neikhate khu "Yes! You are blessed beyond blessed" hing chi nuamdan ka hi. 

Simtu zousia Khrist ngei toh Christmas mangkhawm chiat ding in deisahna lianpen ka'ng laan hi. 

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Tami Ministry in thugel tungtawn a hagaulam tahsapte muh ding leh khat-le-khat thutah a kihanthawntua ding lunggulhpen in nei hi. https://reachgwm.blogspot.com/

Sunday Message | KOI HI A, BANG ZIAH AHIAI? (Who and Why?)

"New Christmas Tradition" kichi poster khat November hatawp vel in WhatsApp dung ah hing kithethang hi. "New Christmas Tradition: Beginning December 1st read one chapter of the book of Luke in the Bible each evening. There are 24 chapters. On Christmas eve you will have read an entire account of Jesus's life and wake up Christmas morning knowing WHO and WHY we celebrate!" chi kigel hi.

Tuami pansan in "Lets Make A Chain" chi'n khanglai mi bangza ahiaite'n commitment bawl in Luke bung khat zel nichin in ka sim uhi. Hun dang a ka Lai Siangthou sim teng sang in lungluthuai ka sa zaw hi. "Who and Why?" chi a tha a theisiam sem tum a ka sim ngitngetnate ziah hiva chi ing. Tuami'n sil-le-ten, guolnop kipawlkhawmna chi tuamtuamte toh Christmas vaidawn ding a kisingsahnate sang a thutah Lai Siangthou ma a kibulphu khun eima mimal a gasua thupitah nei zaw ding ahidan hing chiansah sem hi. 

Jesu Khrist khu Pasian tapa, kumpi leh hundampa ahi. Mial a um mite kung a vah tuntu ahi a, shina a kipat hinna tuntu, Pasian leh mihingte kikal a lemna tuntu, Lemna Lengpa zong ahi. Tuni'n eite'n i hinkhua ah ama khu i kumpi leh i hundampa ding in i na sangkha tai? Mial nuai a i saltanna a kipat in Jesu Khrist tungtawn in tanvah in i umkhata uai chite i kidot ding uh deihuai i sa hi. 

Jesu Khrist koi hi a, bangziah a a pian champha thupitah a lawm i hi uai chite a theisiamsate'n theichet semsem sawm in tukum Christmas mang ding in kisingsa vai; tualeh theisiam nailou a siatlei noplenna leh manthatna lam tawn a kalsuante'n Khrist lam mitsuan a kalsuanna tha i neitheina ding un thutah Lai Siangthou pansan a Christmas lamdawn ding in kisa chiat vai i kichi nuam uhi. 

Mangpa'n a tapa tang neisun Jesu Khrist tungtawn in lemna thu a puong zouta! Tua a min lamdang, lemthei Pasian hat, kumtawmpa Lemna Kumpi khu ei mimal chiat a ding a Kumpi hi ngei ding in Mangpa'n simtute zousia hing gualzawl chiatta hen.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | TOUPA’ MEL ZONG UN

“TOUPA leh a hatna zong unla; a mel zong nilouh un.” – 1 Chronicles 16:11

Innkuan khat in hun-awl zatna ding in mualtung kal a hun zang ding in kisa uhi. Huchihlai in, dotna a tapa naupang chik akipan in hong om hi: “Gul i tuakkha ding uam?” Hiai dotna haihuaitak a bang hi. Huchi in mual a hong kal nung un sawtlou in gul guhattak nei khat a hong vak a, a kituakkha uhi. Lauhna in a dim ua, Toupa a sam uhi. Himahleh, bangmah a chikei ua, gul in amaute a paikheng hi.

Ngaihtuahna a dotna lamdang taktak a khenchiang a hong kilangte Pathian in mailam a i tuah dingte uh hon theihsakna ahi diam chih hun a om ahi. Ahihkeileh, lauhthawnna tulel a i tuahte leng tunung a maituah ding banghiam omte akipan kisakkholhna ding leng ahizaw thei ahi. Huaiziak in, Toupa leh a hatna zong a, a mel zon ding a poimoh ahi. 

Toupa mel zon dan ding David in chi tuamtuam a gen ahi. Toupa phatna, midangte kiang a thutak hilhsawn leh Pathian’ thilhih thupite phawkna chihte ahi (1 Chr. 16:8-13). Toupa tuh i lungtang tengteng ua i zon ua, pahtawina laate sa a, a hon thupiak bang a tanchinhoih piaksawn ding eite adia poimoh ahi chih phawkkik ni. A kal in innsung, khotang leh gam-le-nam buaina in hon kalsuansak theikei ahi maithei. Huchibang hun in leng amah a kinga in kuhkaltak a pan lak ding ahi. Huai hileh, Belamchingpa Hoih in i lampite uh hon bawlhoih sak ding a, a hehpihna thahattak sung ah i bit ding ua, haksatna hong om dingte ah leng aman hon ompih ding ahi. Nang leh kei a ding in Toupa’ mel zon a hoih ahi.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | SAPTUAM MASATE

“Huan, a gingta mipite lungsim munkhat leh ngaihtuah munkhat in a om ua: a lak ua khat in leng a sum neih, kei a tuam ahi, a chi kei; thil tengteng a kikop zaw zel uhi.” – Acts 4:32ff

Nungzuite’n Jesu kiang ah thupiak thupipen bang ahia? chih dotna a bawl lai un, Jesu’n “ITNA” - “Nang leh nang na ki-it bang in, na innvengte leng na it ding ahi” a chi hi. Paul ngei in leng “ki-ittuahna loungal kuamah bangmah ba kei un” a chi hi. Saptuam masate’n ki-ittuahna a thu mai hilou in a semkhia uhi. A thilneihte uh “kei a tuam ahi” a chi kei uh. Huaiziak in, “a lak uah leng a tasam tuam a omkei uh” a chi hi. Itna kichi hih nasep a kilang ahi. Gingtu masate’ ki-ittuahna tuh a thilpiakte uah “thohkhia uh, pekhia uh” ahihman in a thilphalna uah kilang hi.

Huan, Saptuam masate’ hinkhua tuh duh-amna tellou hinkhua ahi. Duh-amna tuh Paul in sum deihtakna toh ana tehkak a, “sual chiteng bul ahi” ana chi ahi. Duh-amna kichi tuh mahni a ding huntawk tan pel a huaihamna, midangte nesekha ban ding a mahni kia kikhualna ahi. V. 35 in “..amau deihdong ching hun chiat in a hawmkhiat zel uhi” a chi hi. Gingtu masate hinkhua a kimukhalou duh-amna i lak uah hawlmang in hong om in, khat-le-khat kipanpihtuah mite hi ding in ei hihtheihna chiangchiang ah panthak la ni.

Ban ah, Sawltakte a zahtak uhi. Sawltak kichite tuh Jesu Khrist hinkhua leh nasepte mit a mukha, a thuakna leh sihna, huan a thohnawnna thu theihpihtu leh huai theihpihtu hihna nasep semtute genna ahi. Amaute tuh saptuam masate’n a zahtak ua, amaute khut a kituklutna tuh Pathian khut a kipiakna bang a ngai uh ahihman un, Sawltakte khebul ah a neih-le-lamte uh a hon tawi uhi. Tulai in amaute sep bang a semtu Pathian in hon piak mite bang chi in i mu ua? Saptuam masate’ hihdan akipan lampial zek hi in i kithei uhia? 

Saptuam masate’ Pathian eite Pathian ahi chih phawk in a khut ah kipelut semsem ni. Huai hileh itna ah i khang semsem ding uh. Huai ding in Toupa’n hon vualzawl chiat ta hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | GINGTU’ VUALZOHNA

A masa in simtute na vek un Nipini chibai!

Jesu’n a nungzuite kiang ah noute huat leh doudal a om ding na hi a na chi hi. Jesu nungzuihna hinkhua hih a nuam sang mah in a haksa hinkhua bang in mun tampi ah kilang hi. Himahleh, haksatna kawmkal ah leng kipahna ding a omlou tuankei hi. Gingtu diktak in huai haksatna nangawn leng kipahna in a simthei ahi. Huai tuh vualzohna thupitak ahi.

Peter in Jesu nung a zuihna ah gimthuakna tellou ding ana sa hi. Jesu’n michih in niteng khros pua a zuih ding thu a gen lai in, hithei mahmah ding hiam chih a ngaihtuahna ahi. Himahleh, a thounawn Jesu in a ginna a hatsaktak ziak in huchibang a gimthuakna tellou in nungzuihna omtheilou bang in a ngaihtuahna khek in hong om hi.

1 Peter 4:12-13 bang ah huai lungput a taklang hi. I tung a ze-etna hong tung, thil lamdang bang a ngaihtuahlou a, Khrist thuaknate thuakpihna bang a la in, kipak zaw un, a chi hi. Haksatna hun a kipah ding chih mihing gam ah ahi theikei ahi. Himahleh, hiai bang hun a kipahtheihna om ahihdan aman a chian hi. A ma tuah vualzohna hinkhua apan gingtute hanthawnna a piak ahihman in, eite leng kisin ding in i kichial uh ahi. Huchileh, vualzou gingtu i hi ding uh ahi. Toupa’n haksatna tungtawn in a hoihzaw kei hon pe ngei ding ahi chih muanngamna in kipahna hon pe ding hi. Haksatna tuah hun a i vualzohna ding ua vanzat ahi chih phawk in Pathian tung ah kipahthu gen ni.

............………………………………..

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | KHA LEH CHIHTAKNA TAWH

Amasa in simtute na vek un chibai!

Lawmta tangval nih ball pek lunglut mahmah Manchester leh Arsenal-te final kimawlna en ding in hong kichiam uhi. Ahihziak in tua final ni pen nipini ahih ziak in a lawm khat in, 'Kei bel kikhawmlou in ball pek enzaw mai ning' chi hi. A lawmpa khat in bel 'Kei bel kikhawm zaw ning, Tuailai makai khat hi ing a, ka kikhop louh nuamlou ding hi' chi hi.

Tua bang in a lawmta un kikhen uhi. Ball pek en pa a lung nuam thei mahmah lou in, “ka lawmpa  biakinn ah lungnuam tak in Pathian bia  a" chi’n a lungsim biakinn a a lawmpa kiang a ah om den hi. A lawm biakinn kai pa’n leng a pumpi biakinn sung ah om mahleh a lungsim ahihleh ball pekte kia ah om den hi.

Bangbang hitaleh i gen noptak tuh tulai khangthak tampite biakinn ah kikhawm mahleh uh a lungsim uh a pawlam leh thildang a om den thei hi.

Mi tampi'n biakinn sung ah  phone khoih den, Facebook, WhatsApp chihte zang in status update ziahziah uhi. Tua in biakinn ah i pumpi om mahleh lungsim mundang a om chihna ahi.

Zawlnei Jeremiah hun lai in Judah te’n a biakinn sung uah milim pathiante lutpih uh ahihman in Pathian lungsim nasak mahmah uhi. Tua ziak in, Jeremiah in khitui toh a mite gamtatna uh kikhek  ding in na thuhilh hi.

Tuhun chiang in, milim pathiante a taktak in biakinn sungah lutpih lou himahleng, I cell phone te biakinn a lutpih i hih leh leng i kikhop lai bek khoihlou hiam mitsak ngam leng bangzah in ahoih diam? I Pathian biakpiakna pen tulai vanthak hoih mahmah te’n hong valh khin hita hi. Pathian bel Kha hi a, amah a biate’n Kha leh chihtakna toh a biak ding uh ahi. Tua bang michitak Pathian in zong den hi (John 4: 23, 24).

Daniel leh a lawmte biakpiakna pen chihtakna toh kidim hi. A hing Pathian bia lou in milim bawltawm mai a kun sang in meiphualpi a kikhiat ding teel zaw uhi. Daniel niteng biakpiakna hunte leh a ngeinate a kheel sang in humpi nelkai buk sung a kikhiat ding teel zaw hi. Tua bang in a biakpiakna uh chitak mahmah ahihman in, meiphualpi sung ah leng Pathian in ompih a, humpi nelkai buk a leng a ompih hi.

Eite’n leng Amah apan vualzawlna i ngah i phone te Amah hon vualzawl tupa i biak sung bek mitsak ngam in, chitakthak leh i lungsimtaktak toh amah biakpiakna neite hi thei din simtute’n Pathian panpihna ngen in pan la thakthak din i kichial hi.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com

Sunday Message | ZUMHUAI LUA!

RGWM ana simsaktute na vek un itna chibai!

Tulai i nam sung uah thusia leh kituahlouhna thute, dikzaw kisakna thute leh thutak lah bang chetna om ngellou thusia leng a tam mahmah mai hi. Gam leitang neukha sung a khawsa khawm mite lak a huchibang kikhenna om sawnsawn tuh zumhuai lua hi. Gingtu hingal, ki-ittuah theilou, kingaidam theilou tuh nakpitak in a zumhuai ahi. Hiai bang dinmun a om mite a ding in kingaihtuah vengveng a, gingtu ka hihna bang chi’n ka tawisang thei ding hiam! chih hun ahi.

Paul in Timothy kiang ah, “Himahleh, i Toupa thu theihsak tuh zumpih kenla, kei a hentapa hon zumpih sam ken. Tanchinhoih ziak a gimthuak Pathian thilhihtheihna dungzui in hon thuakpih zaw in” a chi hi (2 Tim. 1:8). Hiai ah Timothy kiang a Paul hasotna in eite leng kihasuan le hang i chi uh ahi. Paul in, “Toupa thu theihsak tuh zumpih ken” a chi hi. Huai gendan dang in gen le, Pathian hon theihsak na hotdamna thu mite’ theih ding leh mite theihsak ding zumhuai in sim ken a chi hi.

I khotang siatna ziak in zumhuai i sa uh ahi maithei, namsung buaina ziak in zumhuai i sa uh leng ahi maithei. Ahihkeileh, innsung dinmun siatnate gelkhak chiang in bang chi ka hi di uah aw kou innkuan i chi uh leng ahi maithei. Himahleh, Pathian in haksat hun, nam siatgawp hun a gingtu diktak hihna langsaktu hi ding a hon deih ahizaw kha ding ahi. Ama sapna siangthou a sap a omte'n thathak la in, Toupa khebul ah kitathiam thak in, a zumhuai na mun ah leng hangsantak a Toupa’ hon theihsak thute taklang ngam ding in ki sa ni. Thudik genna ding a daltu lianpen doilokna leh lauhthawngna kha hawlmang in, thuzuau leh kituahlouhna thute koihmang in, thutak a kibulphuh in itna, lametna leh ginna thute tangkou zaw ni. Huchileh, Toupa mahmah in gah hon suangsak ding a, zumhuaina leh zahlakna akipan tundingnawn in i om ngei ding uhi.

____________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | PALAI KHAT KIA A OM

Palai hihna hih thil nuam ahikei hi. Na nasepna a na lohsap leh ngohna tuamtuam nang tung ah hong leh tun maimah thei hi. Hiai na tuh mohpuakna liantak toh tonkhawm ahi. Huan, mihing lam ah lohsap theihna kong liantak a om. Lohchin ma a lunglel a omkhaktheih, kuhkal in pang teitei mahle hang lohchinna in hon zui teitei khollou lai ding ahi.

Himahleh a lohsam ngeilou khat a om hi. Paul in Timothy kiang ah: “Pathian khat kia a om, Pathian leh mihing kikal ah Palai khat kia a om” – 1 Timothy 2:5. Huan, John 14:6 ah “Kei lampi, thutak leh hinna ka hi. Kei tawnlou in kuamah Pa kiang a tungkei ding” chih Jesu kammal i mu.

Tulai khovel a ding in a hithei taktak dia aw! Khristiante i “inclusive” deuh ding hilou maw! chihna a lian mahmah hi. Hotdamna lampi khat kia ahihleh zaa uap zoulou ahi; huaiziak in missions nasepna huchi pibawl ngailou chih lungsim a hon tun thei ahi. Missions’ nasepna tuh inclusive mah ahi, himahleh hotdamna bel ahi hetkei. Laisiangthou in hon sinsakdan in, lampi khat kia ahi a chi giugeu mai hi.

Sahkhua khenkhat in Pathian naihtheihna ding lampi tampi om chi uhi. Huaite lak a khat Buddhism sahkhua ahi. Amau lampi giat (8) om ahi a chi ua, thilhoih ngen a taklang uhi. Himahleh, hiaite’n Pathian leh mihing kal ah lemna a tunkei uh chih phawk ni. A dangdang leng thilhoih gen leh tangkou a omtham uh. Baha’i Faith (Lotus Temple bawltute) bang in leng Christianity dou hetlou uhi; himahleh, hotdamna lampi khat kia hilou ahi a chi uhi.

A chihleh, huai lampi khat kia bang lampi hi ding? 1 Timothy 2:5 leh John 14:6 in Jesu Khrist kia Palai omsun ahi chih a hon hilh uhi. Dr. RC Sproul in “The Work of Christ” chih laibu ah gelh nalh kasa hi. Pathian’ tangtawn thilgel ah mihingte pukna akipan hotdamna ding lampi a telkha hi. Huai tatna nna sem ding in, Tapa Pathian in “kei ka kuan ding” chi in a hong kipia a chi hi. Jesu Khrist tuh palai hi ding in Amah leh Amah hong kipia hi. Aman Pathian’ thangpaihna pua in, khros ah sihsia in a hong si hi. Khros a sihna in a ITNA huang zautak sung ah hon huilutvek ahihdan phawk in, Palai omsun Jesu Khrist tung ah kipahthu gen ni.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | JESU'N HON IT CHIH KA THEI (Jesus Loves Me This I Know)

"Pathian in pha a sa naikei a hi'nteh" ka chihleh lawmte'n "Thilteng a zaw Pathian va chih gige theih mawklouh hiveh aw" hon chi uhi. A khonung in "Ei mihingte'n Pathian hihnate mihing a toh i tehkak ua ei adia haksa mahmahte bang amah adia le haksa tei ding in i koihkha nak uh" ka chikhawm thei vanglak ua ka kithukup uh hong lamzang hiaihiai vanglak hi. 

Mite simmoh leh nelhsiah a i omlai in, i itpen, i ngaihpen in hon paisan a lungzuang leh kingaisia a i omlai in eite hon it a, hon ngai gige leh hon paisan ngeilou mi khat om hi. 

I hinkhua a i thilthuahte a lungkham leh mangbang a om a, a chihna ding theilouh ziak a zu-le-sa leh khamtheih chi tuamtuam a lungkimna zong a hinkhua kibawlsia a i omlai in eite hon ittu khat om hi. 

Kei zaw mikhial ka hi. Ka khelhna a let luat ziak in ngamdamtak ka hi nawnkei ding chi a lam-et bei ngoihngoih a i omlai nangawn in leng eite hon ittu khat om veve hi. 

Huai mi tuh eite Hondampa Jesu Khrist ahi. Amah Pathian Belamnou eite thuak ding teng hong thuak a, ei adia si a, ei adia thou nawn tuh ahi. Simmoh, nelhsiah, engbawl leh muhsit in a om a; mangbang in Khros lek ah a kikou hi. 

Bangchi tuk in khial in bangchi tuk in lam-et bei in om mahle tuni in Jesu hon itna leh a thuaknate ngaihtuah lehang "Jesu'n hon it chih ka thei" i chithei ding. A ziak tuh ei mihingte ngaihtuahna lel a haksa mahmah dia kilangte leng Pathian adi'n hitheilou omlou hi. 

Toupa'n simtute hon vualzawl chiatta hen aw. Amen

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com

Sunday Message | THUTAK A DANGTAKNA

Tanchinhoih thehzakna dia Paul nasepna hih a thupi mahmah hi. Ama'n, kineisaktak in, mun tamtak ah ‘ka tanchinhoih’ chih kampau ana zang hi. Huai tanchinhoih ahihleh Jesu tuh “Khrist” ahi chih ahi. Hiai thu a gentam peuhleh a gingta kibehlap a, a doudaltu leng hat semsem hi. Thessalonika khua bang ah, “hiai mite’n khovel lumlet uh ahi” chi in a tung uah Judate a thangpai mahmah ua, thah ding in a zong uhi. Huaiziak in huai khua nusia in Berea a kisuan in, huaikhit Athens ah lut hi.

Paul in Athens mite a hanthawnna Nasepte 17:16-21 a kimu bang in, tulai gingtute adi’n leng kihanthawnna hoihtak ahih ka lamen hi. Khatna ah, “gingtu ka hi chi kawmkawm a milim pathian na kepte uh suahkhia un” (v.16-17) a chi hi. Eh! Lawmte, eilou Pathian thu-awi kichi ihih uleh, bangchidan a hichia i kim a milim pathian a dim a om a, om kinken thei mawk na hi ua, kingaihtuah thak di uh, i Pathian theihdan uleh zuihdan uh diklou deuh hikha ding ahi, a chi ahi. Huaiziak in, gingtu lem kineihna tawpsan ding in a chial hi. Nihna ah, “thutak hangsantak a gen ngam ding ahi” (v. 18) chi nawn hi. Napoleon Bonaparte in, “Ka lalgam a puk ding a, Alexander the Great lalgam leng a puk ding. Aziak tuh koute’n galvan in gam ka la uh. Himahleh Jesu Khrist lalgam kibulphuhna tuh itna ahihman in tangtawn in a omden ding” a chi hi. Jesu Khrist a om thutak pen ITNA tungtawn in hangsantak in i kim-le-pam mite lak ah puanzak ngam ding tuh gingtu hihna toh tonkhawm ahi. Thumna ah, “thutak in mite hinkhua ah kikhekna a tun ding” (v. 19-21). Athens mite a ding in Areopagus mun poimohtak ahi. Hiai mun tuh khotang vai leh sahkhaw vai a thukhenna mun ahi. Huai ah Paul a len ua, a tonpih uh, a thugen theichian nuam uh ahihman in. Pathian in hiai mite thutak duh a dangtakna thupitak a neihlaitak mah un Paul tungtawn in tanchinhoih amaute lak ah zasakta hi. Huchi in, kikhekna thupitak a tung hi.

Tulai khovel ah leng thutak a dangtakna a thupi mahmah mai hi. Huaiziak in, ei gingtute a ding in hun hoih, Pathian’ thutak thehzakna ding a hun hoihpen hikhamoh lou ding ahi. Hamphatna a la in, tanchinhoih omna lamlam ah, hihna bangbang in kalsuanpih ding in i kichial uh ahi.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | NA DEIHLAM LEI AH HIH IN OM HEN (Mathai 6:10)

ReAch:Gospel Writing Ministry, min zang a Pathian thugelh i pat uh September 10, 2019 in, kum nih mel muthei dia damna leh a thu hon pia i biak Pathian min i phat a thupina tengteng amah i pia hi. Huan ah, simtute tengteng Pathian in a thu in hon vualzawl zel leh i chi ahi.

Hiaibang vualzawlna i tan lai in, i vualzawlna tante hon siampa deihna bang in i zangkha na di uam aw? Amah, bangkim hihthei leh bangkim tung a thuneitu, a ut hunhun leh a ut bangbang a mun chih a thil hihthei gige hinapi, A deihdan leitung a hih a omna ding a, eikhawng leltak in i ngetpih ngai ahia? Jesu'n Pa deihlam a nuam a haksa ah leng 'kei thu hilou in, nang thu hihen' ana chih bang a, eite leng tua bang tup leh lunggulh pen a nei dia hon sinsakna leh thuhilhna ahi. Huaiziak in, Jesu'n ama lunggulh leh tupte lunggulh pih leh tuppih ding a hon sinsak ahihman in, hampha petmah hi hang. Hiai bang hamphatna Jesu vang a ngah leh tangte i hihna in gouluahpih dia tel i hihna gen khia hi.

Pathian deihdan leh A deihlam eite tungtawn a leitung a hih leh sepkhiak a om ding tuh Jesu’n hiai thumna tungtawn a hon sinsak ahi. Hon sinsaktu'n hon sinsak khial hilou in, eilawi in hon sinsak dan bangtak a hih kha lou. ‘Na deihlam van a, a kihih bang in, lei ah leng hih in om hen.’ Deihtaktak leh chitaktak a thumzel mah i hi di uam? Van angelte'n sun leh zan chih omlou a, Pathian phat a a deihdan a aom bang ua, ei leitung a khosa laite'n leng Pathian deihdan i zon a, i sepkhiak ding tuh, Jesu'n hiai thumna tungtawn a hon sinsak ahi. Hiai pen a taktak (practical) a niteng hinkhua a zat le zuih ding ahihdan chiangtak in i muthei hi. Toupa gam ah corruption, tualthahna, kivaulaunate om theilou ding ahih chia. A thumna pen gengen a, ei hinkhua a i zat keileh, Pathian deihdan hihna dinga pan lakhalou kisuak ding hi. Pilvanhuai mahmah.

Pathian deihdan bang ahi dia le? Laisiangthou pumpi Pathian deihdan leh tupte genkhiakna leh Pathian aw ahi. Huaiziak in, Pathian deihdan leh tupte theithei ding in, Laisiangthou a kibulphut hinkhua, Inkuan khosa leh kivaihawm i hih ding tuh Pathian deihdan ahi.  A tom a gen in, mimal in i hinkhua deihtelna Pathian kiang a lankhia a, Pathian deihdan ahih leh thuakngap, tan dingte tan ngam ding a leh khovel buahna banglou a kikep siangthou ding tuh, Pathian deihdan hih a om theihna ding lampi ahi. Tuabang hinkhua, lohching leh hithei i kisak lailai in leng Pathian deihdan hikhalou ding ahihman in i hinkhua a thawn lel suak ding hi. 'Toupa, na deih lam hih in om hen' chithak chiat ni.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/ 

Sunday Message | SILHOI KHU TUKIP CHINTEN UN (Hold Fast What is Good)

Tami Sunday Message mawltah hinanleh sim ding a na hun mantamtah na piah ziah in ka lungdam a, tualeh noute toh kikum thei ding a ka um khu ka tha a nuam mama hi. 

1 Thessalonika 5: 21 - 22 a Sawltah Paul in "Sil bangkim enchian unlen, silhoi khu tukip chinten un. Sietna namkim pel un" ana chi khu tuni'n khanglaite lam enkawm in i kikumkhawm ding uhi. Tam tungtawn in i gingtu hinkhua ahilouleh i khanglai hinkhua ah bangtan ah, i sep, i bawl tapou i enchian un a hoiloute i tawpsan in, a hoi chinteng i tukip uai? chi i kivelchet ding uh deihuai ka sa hi. 

Khanglaite lah a uang mama kamteng khat "Just Once" (khatvei maimai) chi ahi. I lawmte'n a dawn ziah ua khatvei maimai va dawn, a neh ziah ua khat vei maimai va ne, a kap ziah ua khat vei maimai va kap. Hinanleh tua khat vei maimai in i hinkhua pumpi suse thei gige ana hi daih hi. Tuachi'n i theiloukal in khelna kawkhu thutah ah i na kegawp man zel uhi. 

R Zaccharias kichipa'n "Khelna in i utlouna tantan ah ang pui ding a, i um utlouna chiangtan ah ang umsah ding a, tualeh i piah utloutan ang pesah ding hi" chi'n ana gen hi. Tuni'n mi tamtahte hinkhua ah a dih mama chi i muthei uhi. Ut thu hilou lah a sal a tangkhata. Dei ziah hilou lah nei mai ngai. 

Simtu it, tuni in nang leh ken hun hoitah nei nalai i hikha ding. Tua i hun hoi khu bangchi'n i zang ei? chi kiveltha vai. Khovel ah siatna chinteng a kim chi i thei a, i lah ah a maingal mama hi. Tambang ahilai in eite'n i bawl ding tapou a hoi nai? A dih nai? chite i etchet ding uh kisam hi. 

Paul in Thessalonika mite kung a, a gen khu tuni'n eite kung a, a hing gen bang in pom vai in i hinkhua ah silhoi pouma tukip chinten ding in Pasian hatna suang in pan la vai. Tuachi'n sietna namkim pel ding leh pel zou ngei ding in panpina ngen in thum zing vai. 

Mangpa'n theisiam thei ding leh hinpi a, gasuapi ngei ding in hing gualzawl hen. Amen

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Tam Ministry in thugel tungtawn a hagaulam tahsapte mu ding, leh khat-le-khat thutah a kihanthawntua ding lunggul pen in nei hi. https://reachgwm.blogspot.com

Sunday Message | KUMPI GAM

Kumpi Gam kichi hih gam khat kuahiam vaihawmna gam/ mun genna ahi. Huai a vaihawmtu ahihleh Kumpi a kichi hi. Amah tuh a Lalpen ahi a, thuneihna leh vaihawmna tengteng ama thu vek ahi. Huaiziak in, vaihawm Kumpi tuh zah a, a thupiak zuih a, ginomtak a zuih ding ahi.

Pathian in Adam leh Eve kiang ah Eden Huan a kumpi gam uh hi ding in a pia a, huai ah thilsiam dangte tung ah vaihawmna/ thuneihna a pia hi. Abraham a insung mite akipan sapkhiat ahihlai in, koilam zuan a pai ding chih nangawn a theihlouh lai in Pathian in a chiam gam Kanan ah a pi hi. Huan, kum tampi nung in Israelte tuh Aigupta suak-le-sal hihna akipan in Mosi zang in pikhiat ahi ua, gamchiam tunpih zoulou in, Joshua makaih in gal lauhuai tamtak phu mualsuah in a luah nawn uhi.

Eimite khangthu hih sut le hang leng hausate lalna tanchin tamtak zak ding a om hi. Tunai chin in leng mun khenkhat ah “The Chief is Lord of the soil” chih hong kitakkhia hi. Huai in hausate vaihawmna nuai a, amaute kumpi gam a om leh khawsa ihihna uh nasatak in puangkhia hi.

Kum 1910 in Welsh Missionary Mr. Watkin Roberts leh a nungzuite’n Manipur South District ah tanchinhoih hong pawlut uhi. Amaute’ hon puaklut tanchinhoih in tuh Jesu Khrist Lal (Lord) hihna thu leh ama Kumpi Gam a om/ teng ding a chialna thu ahi. Hiai tanchinhoih michih adia damna hong suak in, kum tamlou chik sung in Khristian chih thumal mai hinawnlou in ‘eite’ hihna’ hong suak hi. Hon neitu Khrist a hita hi. Hallelui-ah!

Pilat in Judate kumpi na hi hiam? chi a dotna a bawl lai in, Jesu’n hiai bang in dawnna pia hi: “Ka kumpi hihna hiai khovel ah ahikei” (John 18:36a). Paul in leng huai a theichian mahmah mai a, Phil. 3:20 ah hiai bang in laikhak ah ana gelh hi: “I khoveng hihna uh van ah ahizaw a; huai akipan mah in Toupa Jesu Khrist hondampa tuh i na ngak uhi.” Koi kumpi gam mi na hia?

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | PASIAN A ITLEH A UNAU ZONG ITTA HEN (Whoever Loves God Must Also Love His Brother)

Sunday Message ana sim zel na hileh 'Louma Kikhat Selung Tuahlou' chi thulu pansan a kigel message khu nana simkha ngei ka tahsang hi. Tua message in — nam khat, chi khat, phung khat, suan khat, khosahdan, tawndan, chiindan leh du-le-ngai zousia kibang minamte i hidan uh a tahlang hi. Tualeh Jesu Khrist gingta a ama nua zuite i hi ziah mawngmawng ua unau et a ki-en a, dialdial a diamdiam ding, kilungtuahtah a tengkhawm ding eite i hi dan gen in, chi-le-nam, be-le-phung, ham-le-paute a kidaidan gual i hilou dante uh a genchiang mama hi. 

Tuni'n tua thu toh kizom in i Khristian hinkhua ah i unau tung ah itna i nei nai chi i kiveltha uh deihuai ka sa hi. Lai Siangthou 1 Johan 4:19 i simleh "Ama'n a hing it masah ziah in i it uhi" chi i thei uhi. Itna i chi khu Pasian a hing kipan masa ahidan i chian uhi. Ama'n eite a hing it ziah in itna lianpen toh a tapa Jesu Khrist tungtawn in ang tankhia a tua tatkhiatna sang a gingtate i hi ziah un Khrist nua zuite; Khristian-te i kichi uhi. 

Lai Siangthou gel dang ah "Ki-it un; ke'n nou ka'ng it bang in, nou zong ki-it un" chi i mu uhi. Ei Khristian-te khu Pasian in ama a kipat a itna i tan bangbang uh i unau tung a langsah ding a ang dei ahidan a chiang mama hi. 

Tuachi'n 1 Johan 4:20 - 21 ah "Koi ahei in Pasian ka it hi a chi a, a unau a muda leh mizuau ahi hi. Aziahpen a muthei a unau khu a it sihleh a mu nailou Pasian khu bang a chi it thei ta diai? Khrist hing thupiah khu tami ahi: Koi in zong a Pasian a itleh a unau zong itta hen" chi'n a gen hi. 

Awle simtu it, tu'n i lungsim ah i unaute mudana i neikha ei chi kivelchian ding deihhuai ka sa hi. I unau itloupi a Pasian ka it i kichikhaleh eite pen Pasian mitmu a zuau gente kihimai dingdan ahi. Tuaziah in Pasian in ang it bang a i unau it thei chiat ding in pan latha vai in itna silbawl theitah ah kituhlut sawm chiat vai. 

Theisiam ding in Mangpa'n hing gualzawlta hen.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Tam Ministry in thugel tungtawn a hagaulam tahsapte mu ding, leh khat-le-khat thutah a kihanthawntua ding lunggul pen in nei hi. https://reachgwm.blogspot.com

Sunday Message | BA-AL HIHCHIM NI

“Isreal tate'n Toupa mitmuh a thilgilou ahihziak un Midiante khut ah kum sagih a om ua, haksatna gentheihnate tuak in mi thunuai ah a om uhi" —Vaihawmte 6:1

I society sung gentaklouh, i saptuam sung i et vengveng leh gitlouhna, diktatlouhna, kiletsakna, kineksiatna, kiniamkhiak utlouhna leh Pathian theilou mite bang mai a omna, mahni deihdan a pai luatnate Toupa mitmuh in thil kihhuai tak ahih dan phoklou khop a gamtatna uang mahmah hi. I society a haksatna bangzah vei i tuak ua? I society gentaklouh i saptuam sung ua?

Saltanna ziak a gimthuakna thuak Isreal-te'n Toupa a hon samta ua, Toupa’n Gibeon kiang ah “Na pa neih Ba-al’ maitam hihchim in” a chi hi. I saptuam, i society leh minam i dam a, i khantouhna ding in mimal chiat in i Ba-al limte uh i hihchip ding uh ahi. Huai milim biakna i tawpsan masiah Lau Khasiangthou i lak ua a tel theikei hi. Kigensiatnate, muhdahnate, mi siatna ding a guk a bawlte, kiletsakna, mohpuakna a hoihlou lam a deih tuntunnate paihkhia a Toupa lam i ngat uh a kul hi. Hiai Ba-al khelhna sal hon pitu pen i hihchip uh a hun lawta hi.

Gibeon tungtawn a Toupa’n Isreal a tun ding nawn bang in, i saptuam, i society leh i nam tungding ding in nang-le-kei Toupa'n a hon deih hi. Huai ziak in i mimal hinkhua a Ba-al omte hihchim in khalam a liamna thuakte i domkang ding uhi.

Toupa'n theisiam ding in hon vualzawl hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | LOUMA KIKHAT SELUNG TUAHLOU (An Incompatible Mindsets With One Destiny)

A nuai a la lungsim ah sakawm heuhiau in message i simsuah himhim uh awle.

"Ei-le-ei ki-itkei leng kua'n hon it ding?" 

"Ei-le-ei kisia leng kua'n hon gum ding?" 

"Ei-le-ei kichi ni singtalai ah zong" 

"Zota Zovontawite" 

India khangthu mai hilou a khovel khangthu a mang ngei nawnlou ding 1947 kum a siltung India leh Pakistan kikhenzahna thupi "Partition" khu'n tunitan in mi tamtahte hinkhua ah meima liantah a nei nalai hi. Tuathamlou in, tunitanpha in India leh Pakistan kikal ah galmit a ki-etna liantah a siam zing hi. Kum 200 phial British in a vaihawmkhum lai in India mipi zousia'n louma kikhat nei in zalenna ana sual uhi. Thakhat-kengkhat a ding a ang sual chiang un British-te adi'n nan hasapi hing sua hi. Tuachi'n "Divide and rule policy" zang in Hindu, Muslim leh Sikh sakhua ah kidaidanna chi ang tu uhi. A tom in gen lei India in zalenna a mu a, hinanleh selung tuahlou ziah in Pakistan ang piangdoh hi. Million a simte'n hinna a tanlaw ua, inngam-lougam in million tamtahte a um uhi. 

".....Gam khat ama uleh ama uh kidou taleh mangthaita uh saima. Tuachiang in khopi khat ahiai innkuan khat ahiai pawl tuamtuam a kikhen a a kidou mawh uleh kithezahta uh sai." — Mat 12:25

Nam khat, chi khat, phung khat, suan khat, khosahdan kibang, tawndan, chiindan, ham-le-pau, du-le-ngai zousia kibang minamte i hi uhi. Loumun-innmun khat a tengkhawmte i hi ziah un zia-le-tong kitheituate i hi nalai uhi. I be-le-phung, mim-le-tang sut a sut ding chilei sung-le-pu, ni-le-gang, u-le-nau, pi-le-pu kichi dingte ngen hihai. 

Tuathamlou in sakhua kibang, Jesu Khrist gingta a ama nua zuite i hi nalai set uhi. Ngaitua thuh deu ulei ei kankan a dialdial a diamdiam ding, kilungtuahtah a tengkhawm ding minam koima dang umlou hi. Tuaziah in chi-le-nam, be-le-phung, ham-le-pau chite maimai ziah in kidaidan sih vai. Chi-le-nam genlouh sakhua natawm a louma kikhat laizomte i hi. 

Tuaziah in eima-le-eima kidou lou in, innkuan khat pawl tuamtuam a kikhenlou in, pangkhawm in, louma kikhat, selung tuah namte hi sawm zaw vai. Tua hileh i mangthai in i kitheizah sih ding ua, minam khangtou, Khrist min tawisang tute i hing hithei ding uhi. 

Mangpa'n theisiam ding in hing gualzawl hen. 

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Tam Ministry in thugel tungtawn a hagaulam tahsapte mu ding, leh khat-le-khat thutah a kihanthawntua ding lunggul pen in nei hi. https://reachgwm.blogspot.com

Sunday Message | NA KIMANTA HIAM?

“Kisakkholh hun ahihlai in, a itna simthu muang in.

Leitung nite a bei chiang in, denchiang in innuam sung ah;

Misiangthoute tenna gam ah, van inn ah i teng ding.”

 – KLP 532

Hiai leitung hih gingtute a ding in khualzinna gam ahihdan i thei uhi. Khualzin mi a ding in tuh kei adia mundet hilou ahi chih kitheih a ngai ahi. Huan, khualzinna gam ah bel khualtam sawtlua ding in i kigingtakei uh ahi. Inn pai ding a kisakhawl lel i hihman un, dotna poimohtak “na kimanta hiam?” chih mahni chiat kidot a ngai ahi.

Martin Luther in “there are only two days that matter in all eternity: this day and that day” a chi hi. Pathian’ vaihawmna ni (that day) adia kisakkholhna ding a poimoh tuni (this day) ahi a chihna ahi. Huan, Paul in leng “…sih leng punna ahi” (Phil.1:21b) a chi leuleu ahi. Punna deihlou lah ki-omlou, lah huai tang ding a kiman nailou gingtu bangzah i om ding uah aw! I hunzatdan uleh khosakdan uah kimanna muh ding a tawm mahmah mai hi. Khovel nopsakna lam kia lunggulhna, Pathian sang a sum-le-pai thupisak zawkna, leh Gen. William Booth gendan a “Christianity without Christ” chih i dinmun diktak uh ahi. Kha a pianthakna tellou a gingtu kisakna, hichia kitheihtelna telloupi a Jesu nungzui himai kisaknate hih inn tunna ding a kisakkholhna bukim ahikei ahi. Punna ngah dingte lak a simtel hihkhaklouh theih ahi chih phawk ni.

Johan 14:6 ah Jesu’n tuh hichi in a chi ahi: “Keimah tuh lampi leh thutak leh hinna ka hi; keimah a pailou kuamah Pa kiang a tung ngeikei” a chi ahi. Huan, Nasepte 4:12 in: “Mi dang kuamah kiang ah hotdamna a omkei, van nuai a, mihing sak lak ah, hon hondam ding min dang himhim a omkei,” a chi nawn hi.

Huaiziak in, laphuaktu in a gen mah bang in i leitung vante nusia in van mun thupi i luttheihna ding un kisakkholh hun ahi. Tua mun i luttheihna ding ua lampi dik omsun Jesu Khrist ahi.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | KEL PAN!

Jesu Khrist min manpha suang in itna chibai!

Kel tanchin hih Bible in tamveipi ana gen hi. Kel chi tuamtuam om ahihdan bang Amos in gen a, Solomon in Paunakte ah kel nawizu inkuan adia nektham ahihdan gen hi. Mi hauhsakna tehna bang in leng mun khenkhat ah zat ahi. Savun tuithawl ding in kel vun zat ana hi a, kithoihna vanzat ding in leng kel zat in ana om hi. Huan, Pathian’ vaihawm hun chiang in kel nam leh belam nam khen a om ding ahi chih Matthew 25 ah kimu leuleu hi.

I pipute un leng ‘kel pan’ chih khat ana nei uhi. Huaituh, zoulou leh lel sim pipi a leng pang teitei, kuhkal, kizousakpah mawklou a theihtawp suah a pang chihna ahi. Hiai hih Jesu Khrist nungzuihna hinkhua ah leng sinlai hoihtak hon pia ahi chih phawk ni. Bangchibang in?

1 Korinth 10:13 ah Paul in gingtu khemna thuak mite hanthawnna ding in hiai bang in ana gen hi. “Mihing thuaktheih val khemna himhim na tuang uah a tung ngeikei hi. Pathian zaw a muanhuai ahi, Aman na thuaktheih val uh khemna na tuah uh a phalkei ding; na thuak theihna ding un khemna peuh ah taikhiakna lampi A bawl pah zaw ding hi.” Khemna hih bangchi zawng in hong pai ding ahia chih a theih haksa mahmah hi. Paul in mihingte zia theichian mahmah ahihman in, khemna tuh Pathian thahatna zanglou a zoh vual hilou ahi chih a theichian mahmah hi. Thugentu khat in hiai bang in a gen ahi, “Khemna hong pai ma in, khemzoh a omlou ding ka hi chi a nana kisakkholhkei leh hon tung guih ding ahihman in hon zoukhin ding ahi” a chi hi. Huaiziak in, kel pan a khemna i maituah chiang ua ki- surrender  mailou ding in panla ni.

............………………………………..

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | SALTANG DING A ZALENNA

ReACH:GWM a thugelh ana simte na vek un Jesu Khrist min suang in chibai ka hon buk hi. Hiai ministry in kalteng a ka hon thugelhte uh toh kisai a ngaihdan hon kumte tung ah kipahna a lian a, a hoihsemna ding a zat teitei hon sawm ding ka hi uh chih ka hon pulak masa ahi.

Gingtu himahleh saltang a kitam mahmah hi. Huan, kimuang kawmkawm a leng saltang a tamzaw i hikha ding uh chih lauhuai ka sa hi. Saltang kichi tuh, mahni utdan leh deihdan zangthei nawnlou ding a koltanna ahi. Huai omdan bel, i niteng duhgawlna ziak bang hithei, sa utna leh kidek zohlouhna, lungput dik thei a zuih zohlouhna leng hithei, leh a dangdang. Huchibang a i omkhakna tuh Setan ngoh a baihlam mahmah hi. Huan, ama nasep ziak mah leng ahi. “Lei a langkhat langkhat hoh a, a sung a tou vak a suk vakvak ka hi” - Job 1:7 chih in a hon hilhchian mahmah hi. Himahleh, huchibang a khemzoh ding a om tuh gingtu hinkhua a ding in poi mahmah sek hi.

Luke 15:11-32na ah Tapa Taimang tanchin Jesu’n a gen hi. Hiai tangthu in Tapa saltanna lampi a hon hilh chian mahmah hi. A pa kiang ah a gou tansik tengteng a lakhawm vek a, gam gamlapi ah a zinta a, huai ah nuam tat lua in a sum a mawk zat mangta hi. Zalenna ngah kisa in, hiai bang in om leng nuam ding ahi chi a ana lunggeldan tengteng in a hinkhua a va zang a, a sum neihteng leng a zang kang dimdem hi. Himahleh, a zalenna tuh saltanna a suak maimah. A hamphathuai mahmah ahihleh, a pa kiang hon lunggulhkik in, kisikna thu toh kingainiamtak in a pa kiang a hong kik ahi.

Huaimah bang in, tulai khangthakte leng saltang ding phet a zalenna ngah i hikha uhiam? chih kivelthak le hang a uthuai mahmah hi. I nu-le-pa hon theihphaklouh ziak a zalenna hinkhua zanglel i omkha uhia? Hiai zaw kuaman le hon mukei, hon theihpihkeina uh chi a zalenna hinkhua zang a, saltanna hinkhua niteng a naih hulhul i omkha uhiam? Saltang ding lel a zalen na hihleh Tapa Taimang thuak bang, gentheihna leh kialna na maban ah om ahi.

Tuni’n huai hun na tun ma in kisik in, na thilhih tawpsan inla, Toupa’ khut muanhuai ah kitulut zaw in, huchi in na bit ding hi.

............………………………………..

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | LOHSAPNA - KUM LI PAITA IN

LOHSAPNA - KUM LI PAITA IN

(Failure - Four Years Ago)

Kum li paita a ka thugelh 'LOHSAPNA' kichi in tuni'n ka hinkhua ah gen hon nei kholdiak ahihdan ka phawksuah hi. Lawm-le-vual tamtakte a kipak ua, a nui heuhiau uh chih ka thei. Ka kipahpih lailai in kipaktak a amaute bang a ka omtheihlouh poi ka sa hi. Kihehnep tum nasa mahmah in puaksiam hamham ka sawm hi. Theihlouh kal in mittui a luang. Bangteng hileh vuithei zaw ka hikei. Suanlam ding leng ka neikei. A tung bangbang tung ahitamai. 

Hiaibang a hun haksatak a ka omlai in ka lungsim ah kum li paita a ka thugelh 'Lohsapna' kichi a hong lang vuat a, kintak in ka fb hong in huai thugelh ka sim hi. Ka lam-etna khenlam ah puaksiam dan hon guan hi'n ka thei hi. 

Saulou i taklang ding: "Mihing adia thumal deihhuailou pente lak a khat tuh 'Lohsapna' kichi thumal ahi. Himahleh kuapeuh adi'n lohsapna leh lohchinna kichi tuh i veilam leh taklam khe bang lel ahi. Kal i suan chiang a taklam khe a masak aleh veilam khe in hon kheng hi. Huchimahbang in lohsapna i tuahleh lohchinna in hon zuithei a, huaibang geih in lohchinna i tuahleh lohsapna in hon zuithei hi. A poimohpen tuh huaite khat zawkzawk hangsangtak a maituah dia mansa a om ding chih ahi."

Hiai thu in hun dang a lohchinna ka na ngahte ziak a kipaktak a ka om hunte hon phawksak a, lohsapna kichi omthei mah ahive. Maban ah lohchinna in hon vuk nawn na inteh chih ngaihdan hon neisak hi. 

Puaknak a huai, khasiat a huai, kah ngoihngoih a hinkhua bawlsiat mai ding tuh lohsam mite adia thil baihlamtak ahihdan ka phawksuah. Himahleh huaite ah tuklut bang hitale i hinkhua ah bangchikchiang in i lohching theita diale? 

Simtu it, lohchinna i ngah hun a lohsamte i khamuantheih a ahihleh lohsapna i tuah hun in leng khamuanna leh hehnepna sangtheitu hi ngei ding in Toupa'n hon vualzawl hen. 

"....A hoihna ding un bangkim in a sepsak chiat chih i thei hi." — Romte:8:28

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com

Sunday Message | MI HAI

"Mihai in a lungsim in, Pathian a om kei, a chi a. A kigawp khin ua, thil kihhuai tak a hih ua; thil hoih hih himhim a om kei uhi." Sam 14:1

Sadhu Sundar Singh in a piangthak ma in Bible ana hal a, apianthak zoh in bel kuama'n nungkik ding in a sam kik zoukei ua, "Mihaipa" chih ana loh hi. Mihai i chih chiang in i lungsim ah pianphung a mibangloute a hong lang maithei, tuate pen mihai leh mibanglou hilou in Pathian in Ama thupina a kilatna ding a adeihdan a asiam ahi. I Laisiangthou in Mihai a chihte bel Pathian thumangloute ahi hi.

"Mihai in alungsim in Pathian a omkei a chi" Pathian om taktak lou mah ahi ding chia Kha Siangthou thil hihtheihna na ginglelh leh nang leng a hai chihna na hipah mai hi. Tua ahihman in mihai hih i utkei leh tuh Pathian gintak ding, a thilhihte up ding leh a thupina muh i sawm ding banah a thu i man a, i muang ding leh kingainiamtak a i om ding uh ahi. Luka 12:19 ah mihai kimuang mahmah khat in "Ka kha aw ne in dawn inla nuamtakin om in" chi'n a kiphasak mahmah a, Pathian in bang gen hiam i chihleh "Mihaipa aw tuzan in na hauhna k'on laksak ding" a chi maimah hi. Neih-le-lam hau in khosakna ah muanhuai i kisa huntawk maithei a, himahleh huaite'n Pathian maipha amu ngei kei, muhnaksang in Pathian a ding in haina ahikha maithei hi.

David Living Stone leng khosak nuam sa mahmah, hauhsaknate a mi englou ahi a, himahleh Gospel nasepna ziak in mihai chih a loh a, nopsanate nawsia in Musanete lak ah Toupa' nna a sem hi. Amah asih in khukdinsa, thumkawm leh Laisiangthou phen kawm in asi kichi hi. Pathian mahmah  muang tektek ni "kou zaw Khrist ziak in mihai ka hi uh" chi'n ana gen a, Pathian thu lunggulh a piangthak taktakte'n bel kihailoh zou mah ahi, huailah Pathian muh in mipil chih ahi zel hi. Pathian nna i sepna ah mihai chih lohzou ding khop in sem lehang, i gam i nam leh saptuam a chidam ding hi. Amah lam a pil leh hausa hiding leh tamsem semsuah thei ding in simtute Toupa'n hon vualzawlta hen.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com

Father's Day Message | PA NEILOUTE PA

PA NEILOUTE PA

(A father to the fatherless) 

"Pathian a omna siangthou a om, pa neiloute Pa leh meithaite ngaihtuahpa ahi." — Sam:68:5

Khovel chu a bukim khopmai! Mi tuam chiat i hihbang un lunggel leh ngaihtuahna leng a tuamthei mahmah. Mahni ngaihdan kia dik i va sakkhak chiang in kival leulou thei mawk hi. "Kidemdem kei in kinenniam-niam kei ni, kipahtawi in kitawisang zaw ni hang" chihteng k'on gelhtel himhim mawk di.

"When words are both true and kind, they can change the life of a person and can change our world. Let true and kind words be always in your speech." 

Khovel ah pa kichi omlou hileh innkuan a ding theikei ding. Zi-le-ta suangtu tuh pa ahi. Tuni a khovel pum huap a kizang Father's Day kichi ni thupitak in zi-le-tate adia pa thupidan, pa a it huai dan leh pate zahtak ngeingei ding ahihdan theihthakna a i zat uh deihhuai ka sa hi. Kam dam heuhiau a pate houpih a, a kipahna ding ua hinkhua zat kichi thil thupi leh manpha mahmah ahi. 

Kei tel in mi tampite adi'n Father's Day chibai bukna ding pa in hon omlouhsanta kha maithei hi. Hiaibang mite'n innsung a pa dinmun poimohna leh pa tellou a innsung hawm leh thawmhau ahihdan i chian mahmah ding un ka gingta hi. Pa in hon om nawnlouhsanna sulnung ah lungneu leh lungkia a hinkhua zatkhak hun a tam hi. Himahleh "pa neiloute Pa" chih a om i Toupa Pathian gingta a amah a muanna ngate i hihman un lungmuan dan kisin siamte ihi uhi. 

Pa toh damkhawm laite'n pa it a ngai sem thei ding in Toupa'n hon vualzawl hen la, pa toh dam khawm nawnloute leng "pa neiloute Pa" amah Toupa a ginna ngathei ding in hon vualzawl hen. 

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com

Sunday Message | KA THU THEIHPIHTE NA HI DING UH

KA THU THEIHPIHTE NA HI DING UH

(You shall be witnesses to me) 

A masapen in ReACH:Gospel Writing Ministry ana lutsak a thanuam leh ngainatak a ana simsak leh phattuampihte tengteng i Hondamtu Jesu Khrist min in Pentecost Day chibai k'on buk hi.

"A bang a bang hileh, Kha Siangthou na tung ua a hong tun chiang in thilhihtheihna na nei ding uh; huchi'n, Jerusalem khua khawng ah, Judia leh Samari gam khua teng ah, kawlmong pha in leng ka thu theihpihte na hi ding uh, a chi a." - Nasepte:1:8

Dotna omthei pah tuh "Bang hun chiang a Kha Siangthou mihingte tung a tung ahia? chih ahi." A dawnna "Jesu Khrist i Lal leh Hondampa ahihna i theihchet a, i pom chiang in Kha Siangthou i tung ah hong tung a, a hon sungluah hi" chi'n i pethei hi.

Gingtute tung a Kha Siangthou a hong tun chiang in huai Kha Siangthou in gahsuang hi. 

Galatiate:5:22-23 ah "Kha gah ahihleh, itna, kipahna, lemna, thuaktheihna, migitna, hoihna, muanhuaina, nunnemna leh kidektheihna..." chihte ahi. Hiai tuh i hinkhua a Kha Siangthou thilhih thupitak a kilatna leng ahi. Mihingte'n mahni hatna suang in hiaite gahkhiat i sawm sek ua himahleh i lohsam naknak uhi.

Huan ah, Jesu Khrist Lal leh Hondampa a sang a Kha Siangthou in a sungluah mi tuh Khrist' thu theihpihte i hi uhi. Jesu'n kawlmong pha in leng ka thu theihpihte na hi ding uh chi ahihman in i omna mun peuh a theihpihtu hihna langsak leh gahsuang gingtu i hih ding uh poimoh mahmah hi. 

Toupa'n simtute hon vualzawl chiatta hen aw. Amen

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com

Sunday Message | GINGTU HINKHUA A NAUPANGTE' POIMOHNA

“Chihtaktak in k'on chi ahi, Na lamdan ua, naupang neuchik bang na hong hihkei uleh, van gam ah na lutkei hial ding uh.” - Matthai 18:3

Hiai a tung a i Bible tangtel i sut vengveng leh thutun tampi om in a muhtheih hi. Ka ngaithuahsek a, i paulap ua ka theih tuh “A naupanglai ua, naupang bang, huchi mah hilou uh mo!” chi'n banghiam a hihkhelh uh a om hun in le lampi dik i hilhkei ua, a hong pichin nung chiang in puakgik hon guantu a suak uhi. Naupangte manphatna theichian hilehang, i chiil dia, a hong pichin nung chiang un, nu leh pate kipahna hong hi ding uhi. Gingtute hinkhua a naupangte sulnung leh a lungtang sianthou dan ua kipan zil ding tampi om kia hilou in a manphatna uh a thupilua hi. 

Jesu’n naupangte manthat ding a phalkei hi (Mk 10:13-15, Matt 18:14; 19:14). Naupang neute Jesu'n a-it a, a nungzuite'n a deihlouh ua a tai lai un leng, Aman a nungzuite kiang ah naupang neute ka kiang ah hon paisak un, a chi hi. Eite’n leng tate naupang thuhoih a deihlai ua i hilhlouh ziak in, milak a pawtpih nuam i saklouh kia hilou in, tate' ommohlua, biakinn kaipih ngamlou i tamta, naupangte manphat dan i theihlouh ziak uh ahi. Huai kia leng hilou in, nungzuite'n ning a a tailai un Jesu'n a angpom a, Vangam naupang neute a ding ahihdan mipite kiang ah a gen hi. Huaiziak in, naupang neute manthat ding deihlou a it a kemtu Jesu ahi.

Naupang neute i kipahpih ding ahi. Jesu'n naupang neute a it a, a kipahpih hi. Midangte leng naupangte kipahpih ding leh tua bang hihte Amah kipahpihte ahi chih a gen hi. Huaiziak in, naupangte i kipahpih a, amau manphatnate i theihpih ding a kisam hi. Naupang in innkuan sung a hulumsak ban ah amaute manphatna i theih chiang in innkuan etlawm leh gahsuah a tunthei hi. Naupangte i kipahpih a, a manphat dan uh i theihpihtute hilehang Jesu deihdan semkha hiding i hi (Cf. Matthai 18:5).

Naupang aw Pathian in a za hi. I innkuan, saptuam, gam leh nam thupina ding leh chidamna ding naupangte khut a kinga ahi chih i phawk ding ahi. Pathian in naupangte kahna aw za a, eite (Nu leh pate) tungtawn in amaute manphatna puangkhetu ding in hon deih hi. Toupa'n Ismael naungek ahihlai in a vualzawl a, “Thou inla, huai naupang phong inla, na khut in len in, amah chi thupitak a bawl ding ka hi, a chi a.” A vualzawl bang ngei in chi thupitak hong suak in, tuni in leitung pumpi luahsuak thei phial in Ismael suante a pung ua, mi hausa leh misiam tampi a hong pian bang in, naupangte Toupa'n a hon vualzawl leh chi thupitak suang in, nam pumpi a ding a suangphum poimohtak suak uhi.

Naupangte poimoh dan leh a manphatdan uh amaute i theihsak ei piching sate mohpuak ahihman in, i mohpuakna semsuah zou ding a pan nasatak a thumna toh i pan uh a ngai hi. I insung chiat a, naupangte manphatna theihpih in, amaute'n i saptuam, society a mohpuakna lianpi neih uh ahih dam theikom in lampi dik leh tang sinsak ni. Toupa'n amaute tung a nasep ding mohpuakna hon guan ahi chih thei a panla thak le deihhuai hi.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/ 

Sunday Message | DANIEL THUMNA

Huchi in, Daniel in laigelh ah a min a kigelhta chih a theih in a inn sung ah a lut a; (a dantan sung a a tawlette Jerusalem lam nga a hon ahi uhi;) huan a khukdin a, nikhat in thumvei a thum a, amalam a ana hih bang in, Pathian ma ah kipahthu a gen hi.

- Daniel 6:10

Thumna gingtute a ding in ‘nakna’ ahi. A thum ngeilou gingtu tuh a si toh kibang ahi. Huaiziak in, gingtu hinkhua ah thumna a poimoh petmah hi. Ephesa 6:18 in Khristian galvan lak ah melma (Setan) zohna ding a galvan a hon hilh ‘thumna’ ahi.

A 17na Lok Sabha kitelna India gamsung pumpi ah neih in om hi. May 23, 2019 ma in vaihawmtu kikhekna lunggulh in, TV News leh Newspaper khawng ah ngaihdan om vengvung hi. Abiktak in, Khristianna toh kisai bang ah tulel a vaihawmte mah hinawndahleh chihna a lian mahmah hi. Bangziak hiam i chihleh, Christmas ni bang ‘Good Governance Day’ hon chihsak ua, Hindu sahkhua adia kithununna poimohtak Yoga bang naupangte sinsakna innte ah chindan a nei di’n thusuah bawl ua, Good Friday leng gamdang sahkhua ahi chi a sukbei sawmte ahihman un ahi. Huan, India a namtawm mite adia lauhuai mahmah dang tuh India khangthu leh Danbupi khek a Hindugam (Hindutva) suah tupna a neih uh ahi. Ka zak dan in, kum 1977 kitelna ah Janatal Dal in India Solkar bawlding ahita uh chihthu zak ahih in, gingtute adia dahhuai sakna om ziak in nu-le-pa loukhou laite sinlai naupangte samsak in, inn leng tungmanlou a biakinn a lut in, kapkawm in Pathian mai ah ana thum uh, a chi uhi. Huai khawng gim dikkha tamtakte tutung in leng mimaltak a thum om ngei ding in ka gingta ahi. Himahleh, kum 2014 kitelna bang mah in a hat ngeingei un a hong hat nawn uhi. Kum 1977 lai bang a veina toh thumna aw i suah ding uh Pathian in deih ahi diam!!

I Laisiangthou telna uah Daniel thumna toh kisai kimu hi. A tanchin en le hang, Dan khauhtak pansan in thumlou ding a vauhilhna a tung a om laitak ahi. Gingtu diktak tuh gamsung dan zui ding a lamet I hi uhi. Ahihhang in, gamsung dan in i thugin hon sukkhak chiang in dinkhiat ngam a poimoh. Hiai ah leng Daniel in Pathian mai a niteng a 3vei a thum tawpsan leh chih deih mite thang palkha hi. Dan nuai a om ahihman in a suakta tuankei a, Kumpipa mai a hekna tan a tung ah hong tung hi. Himahleh, aman thumna in thilhihthei ahi chih chian ngam ding in dingkhia a, a tung a hekna omte ziak in a thumna a tawpsankei hi. A tanchin nunglam ah Pathian in a thumna sang ahi chih a chiang ahi. A ompihna in nuselou ahihman in Sahangbaknei kul sung akipan in leng a suakta hi.

Pathian’ ompihna i tan kawmkawm un leng doudalna/ haksatna/ bawlsiatna/ sihna lim tanpha i tuah ding uh a hon phal hi. I tulel gamsung kivaihawmna ziak a bang hiam haksatna hong tung omleh leng maituah ngam ding in kisakhawl ni. Daniel bang in, Toupa mai zong in thum le’ng, Aman hon suaktasak veve ding ahi chih muanngam ni.

____________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | TOUPA TUH BELAM CHIN A HON CHINGPA AHI (The Lord is my shepherd)

A masapen in state board leh center board hitaleh tutung pawl sawm leh sawm-le-nih exam result a lohchinna ngah khempeuhte kiang ah kipahpihthu k'on khak hi. Huan ah, tutung a lohching zou nailoute k'on thuakpih a, maban a lohching ngei ding in deihsakthu k'on khak ngal hi.

"Sunday Message ana sim gige ka hi. Hoihthei lua hon gelh zom zel un" chih thu bang i zak chiang in tha hon guan tuan mahmah hi. I gam-le-nam leh michih in i taksap uh Condemnation leh Press Release chihte hizawlou in khat-le-khat kihanthawntuah, kitawsawntuah, kinungthuaptuah leh kipanpihtuah chihte hizaw hi.

Sam 23:1-3 ah "TOUPA tuh Belam chin a hon chingpa ahi a; ka tasam kei ding hi. Ama'n loupa hing nou mitmet mun ah hon kualsak zel a: khawlna tuigei peuh ah a hon pi zel hi; Ka hinna a hon bawlhoih sak zel a, amah min ziak in diktatna lampi ah hon pi zel hi" chih i mu uhi. Chang lartak ahihna ah sutdan chituamtuam tampi in sut in ana omthamta ding hi.

Tuni'n i hinkhua ah Belam chin a hon ching Pathian, lei-le-van bawlpa nei i hihdan uh i phawkthak uh poimoh ding hi. Amah Pathian in i poimoh bangkim a thei a huaiziak in tasamlou a hon koih ding ahi chih ginna nei ni. Ganta in a taksap loupa hing nou mitmet munte a gan chingtu in a kualsak zel bang in, i Toupa'n leng i taksap leh i poimohte thei ahihman in huai munte ah hon kualsak hi. Gim-le-tawl, chau leh bah a i om hun in Toupa'n khawlna tuigei peuh ah hon pi zel dia ama a om tawldamna a hon pia hi. Hinkhua kisia, beidong leh lam-et bei a i om hun chiang in ama'n i hinna a hon bawlhoihsak zel dia, amah min ziak in diktatna lampite ah a hon pi zel ding hi. 

Unau, lam-et bei, beidong leh kingaisia a hinkho mumallou zang a na hun manpha tampi ana zangkha na hihleh tuni'n David in "Toupa tuh Belam chin a kei hon chingpa ahi" a chih bang in en leng chithei ngei ding in Pathian lam naih ni. Huai di'n Toupa'n mi chih hon vualzawl hen. 

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com/

Mother’s Day Message | “NU: PATHIAN LAU NUMEI”

‘Nute Ni’ in Bible toh kisaikhakna neilou hi. Huai ahihleh eiloi in bangziak a hiai ni poimoh ngaih mahmah i hi ding uah aw! Bible pawlam thilte a kingalou, saptuam siangthou ihihna uh tu kumzabi 21 hun a mansuah tum i hi ding uam chih ngaihdan nei bang leng omthei hi.

Himahleh, Nute manphatna, a tate uh hon kepdan uh sut in nei lehang Nu hihna tuh pahtawilouh vual ahikei hi. Khenkhat in a uang gen ua, tate tunga Nu itna in Pa itna a khupzou a chi uhi. Nu in tate it mahmah ahihman in a itna uh tehpih ding dang omlou a genna uh ahih ka gingta hi.

Nu khat ka ngaihsang mahmah a om hi. Bible a om himahleh, a min a tuangkei hi. Pathian kihta ahihdan a chiang mahmah. Bible’ hon hilhdan in, a pasal tuh galdou mi ahi a, a hun tamzaw galdouna in zang hi. Huchibang a, a pasal galzohna ding a thumtu, a insung kemtu leh a pasal thuzui Nu khat ahi. Aman, Nu ahihna a theigige in, pasal thu a om ding pen ahi dingdan mah in a koih hi. Huaiziak in, Joshua in “Kei leh ka innkuante’n zaw Toupa na ahi kasep ding uh” (Joshua 24:15b) a chih lai in bangmah a zi akipan lemsaklouhna muh ahikei hi.

Pathian laulou numei in tuh hiai bang a pasalte thupukna koppih thei mengmenglou uhi. Pa adia deihtelna bawl ding tuh Khristian innkuan paidan ahi. Saptuam a kizang leh Nu ettontak hidia kilawm tamtak in Pasalte mahni deihdan in kaital mawk uhi. Huchibang Nu tuh Bible pansan a Pathian lau numei ahikei chih phawk ni.

Nu thupi a kigen (L) Ruth Bell Graham w/o Rev. Dr. Billy Graham in a kitchen sung ah Toupa nna sem ahihdan hichi in taklang hi: “Divine service is performed here three times daily” chih liantak a kigelh bang (wall) ah tak hi. Aman, Nu adia kitchen tuh pulpit bang ahi chi hi. Pathian gam nasepna a kigen chiang in innsung a poimoh petmah. Huan, innsung a kigen chiang in Nu a poimoh hi. Ruth Bell Graham in, a pasal khovel a evangelist minthang himahleh, aman huai pansan a nei in minthanna ana zonglou hi. A tawsawntu leh, Pathian kiang a thumpihtu in pangzaw hi. Tulai in, Nu tamtak in kitchen a “Divine service is performed here” chih sang in, innsung pua, leh pulpit nasepna tanpha lunggulh om hi. Huchibang Nu tuh Pathian lau numei ahipen kholkei ding uh.

Numeite bangmahlou ahi uh chi i hipah kei hi. Pasalte panpihtu ding ahih kawmkawm un, a kulna ah makaihtu ahithei tham uhi. Paunakte 31ah dinmun lianpi a nei uh chih kimu hi. Pasal in dinmun hoih a neihtheihna ding a tawsawn a, thumpihtu numei tuh Rubi suang tunglam pek ah a om a chi hi. Huchibang numei tuh Pathian lau numei ahi.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh-tuah ding lunggulhpen in nei hi. https://reachgwm.blogspot.com/

Sunday Message | MAKAI TUP NEI

Mihingte tupna/ngimna nei a Pathian in hon bawl ahi hi. Tua ahihman in tupna ngimna a neilou mi a nuntakman omlou a sihna toh kibang hi. Khatvei mikhat in Helen Adams Keller kiang ah, "Mit khuamuh louhna sang in a poi zaw bang om ahia?" a chihleh Helen in, "Hak gega sa a khuamuh louh poi zaw hi" chih san hi. 

Tupna ngimna a neilou mi'n hak gega sa a bangmah a muhlou toh kibang hi. Tupna ngimna kichian omlou pi in na khat peuhpeuh kisem theilou, i hun zong kizangsiam theilou a, i khut sung a om nna khat peuhpeuh zong kizeksiam theilou hi.

Tupna ngimna i neihkeileh kikhangtou theilou kia hi lou in, kikiamsuk zaw hi. Billy Graham Pathian nasep a kipat chil in tupna khat  nei a, a lunglut huaina dang tampi om mahleh tuate toh buailou in Pathian gam nna  sepna ding kia ah a lungsim pia a, tuakia mah sep in nei hi.

Tupna ngimna a neilou makai khat pen mite'n zuihtak sa lou uhi. Bangziakhiam chihleh tuabang makai khat in tunna ding mun kichian neilou a huihlak ah lengleng toh kibang lel ahihmai hi.

Tupna ngimna i chih chiang in a om nailou khat muhkholhna hi a, ginna toh kibang hi (Heb 11:1). Mipi 600,000 val in bangziak a Mosi zui uh hiam chihleh Mosi in a kimu theilou Pathian leh a kimu nailou Canaan gam a muhkholhna ziak ahi hi. Elisha nasem pa'n a umchip galkap honpite amuh laitak in Elisha in vantung galkap honte na mu hi (2 Kumpite  6:15-18). Tua tupna ngimna a nei, a kimu lounate a mukhol mite bek mah zuihtak kisa hi.

Toupa'n simtute hon vualzawl chiatta hen aw. Amen

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com/