Sunday Message ana sim zel na hileh 'Louma Kikhat Selung Tuahlou' chi thulu pansan a kigel message khu nana simkha ngei ka tahsang hi. Tua message in — nam khat, chi khat, phung khat, suan khat, khosahdan, tawndan, chiindan leh du-le-ngai zousia kibang minamte i hidan uh a tahlang hi. Tualeh Jesu Khrist gingta a ama nua zuite i hi ziah mawngmawng ua unau et a ki-en a, dialdial a diamdiam ding, kilungtuahtah a tengkhawm ding eite i hi dan gen in, chi-le-nam, be-le-phung, ham-le-paute a kidaidan gual i hilou dante uh a genchiang mama hi.
Tuni'n tua thu toh kizom in i Khristian hinkhua ah i unau tung ah itna i nei nai chi i kiveltha uh deihuai ka sa hi. Lai Siangthou 1 Johan 4:19 i simleh "Ama'n a hing it masah ziah in i it uhi" chi i thei uhi. Itna i chi khu Pasian a hing kipan masa ahidan i chian uhi. Ama'n eite a hing it ziah in itna lianpen toh a tapa Jesu Khrist tungtawn in ang tankhia a tua tatkhiatna sang a gingtate i hi ziah un Khrist nua zuite; Khristian-te i kichi uhi.
Lai Siangthou gel dang ah "Ki-it un; ke'n nou ka'ng it bang in, nou zong ki-it un" chi i mu uhi. Ei Khristian-te khu Pasian in ama a kipat a itna i tan bangbang uh i unau tung a langsah ding a ang dei ahidan a chiang mama hi.
Tuachi'n 1 Johan 4:20 - 21 ah "Koi ahei in Pasian ka it hi a chi a, a unau a muda leh mizuau ahi hi. Aziahpen a muthei a unau khu a it sihleh a mu nailou Pasian khu bang a chi it thei ta diai? Khrist hing thupiah khu tami ahi: Koi in zong a Pasian a itleh a unau zong itta hen" chi'n a gen hi.
Awle simtu it, tu'n i lungsim ah i unaute mudana i neikha ei chi kivelchian ding deihhuai ka sa hi. I unau itloupi a Pasian ka it i kichikhaleh eite pen Pasian mitmu a zuau gente kihimai dingdan ahi. Tuaziah in Pasian in ang it bang a i unau it thei chiat ding in pan latha vai in itna silbawl theitah ah kituhlut sawm chiat vai.
Theisiam ding in Mangpa'n hing gualzawlta hen.
________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Tam Ministry in thugel tungtawn a hagaulam tahsapte mu ding, leh khat-le-khat thutah a kihanthawntua ding lunggul pen in nei hi. https://reachgwm.blogspot.com
No comments:
Post a Comment