A nuai a la lungsim ah sakawm heuhiau in message i simsuah himhim uh awle.
"Ei-le-ei ki-itkei leng kua'n hon it ding?"
"Ei-le-ei kisia leng kua'n hon gum ding?"
"Ei-le-ei kichi ni singtalai ah zong"
"Zota Zovontawite"
India khangthu mai hilou a khovel khangthu a mang ngei nawnlou ding 1947 kum a siltung India leh Pakistan kikhenzahna thupi "Partition" khu'n tunitan in mi tamtahte hinkhua ah meima liantah a nei nalai hi. Tuathamlou in, tunitanpha in India leh Pakistan kikal ah galmit a ki-etna liantah a siam zing hi. Kum 200 phial British in a vaihawmkhum lai in India mipi zousia'n louma kikhat nei in zalenna ana sual uhi. Thakhat-kengkhat a ding a ang sual chiang un British-te adi'n nan hasapi hing sua hi. Tuachi'n "Divide and rule policy" zang in Hindu, Muslim leh Sikh sakhua ah kidaidanna chi ang tu uhi. A tom in gen lei India in zalenna a mu a, hinanleh selung tuahlou ziah in Pakistan ang piangdoh hi. Million a simte'n hinna a tanlaw ua, inngam-lougam in million tamtahte a um uhi.
".....Gam khat ama uleh ama uh kidou taleh mangthaita uh saima. Tuachiang in khopi khat ahiai innkuan khat ahiai pawl tuamtuam a kikhen a a kidou mawh uleh kithezahta uh sai." — Mat 12:25
Nam khat, chi khat, phung khat, suan khat, khosahdan kibang, tawndan, chiindan, ham-le-pau, du-le-ngai zousia kibang minamte i hi uhi. Loumun-innmun khat a tengkhawmte i hi ziah un zia-le-tong kitheituate i hi nalai uhi. I be-le-phung, mim-le-tang sut a sut ding chilei sung-le-pu, ni-le-gang, u-le-nau, pi-le-pu kichi dingte ngen hihai.
Tuathamlou in sakhua kibang, Jesu Khrist gingta a ama nua zuite i hi nalai set uhi. Ngaitua thuh deu ulei ei kankan a dialdial a diamdiam ding, kilungtuahtah a tengkhawm ding minam koima dang umlou hi. Tuaziah in chi-le-nam, be-le-phung, ham-le-pau chite maimai ziah in kidaidan sih vai. Chi-le-nam genlouh sakhua natawm a louma kikhat laizomte i hi.
Tuaziah in eima-le-eima kidou lou in, innkuan khat pawl tuamtuam a kikhenlou in, pangkhawm in, louma kikhat, selung tuah namte hi sawm zaw vai. Tua hileh i mangthai in i kitheizah sih ding ua, minam khangtou, Khrist min tawisang tute i hing hithei ding uhi.
Mangpa'n theisiam ding in hing gualzawl hen.
________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Tam Ministry in thugel tungtawn a hagaulam tahsapte mu ding, leh khat-le-khat thutah a kihanthawntua ding lunggul pen in nei hi. https://reachgwm.blogspot.com
No comments:
Post a Comment