Tami Sunday Message mawltah hinanleh sim ding a na hun mantamtah na piah ziah in ka lungdam a, tualeh noute toh kikum thei ding a ka um khu ka tha a nuam mama hi.
1 Thessalonika 5: 21 - 22 a Sawltah Paul in "Sil bangkim enchian unlen, silhoi khu tukip chinten un. Sietna namkim pel un" ana chi khu tuni'n khanglaite lam enkawm in i kikumkhawm ding uhi. Tam tungtawn in i gingtu hinkhua ahilouleh i khanglai hinkhua ah bangtan ah, i sep, i bawl tapou i enchian un a hoiloute i tawpsan in, a hoi chinteng i tukip uai? chi i kivelchet ding uh deihuai ka sa hi.
Khanglaite lah a uang mama kamteng khat "Just Once" (khatvei maimai) chi ahi. I lawmte'n a dawn ziah ua khatvei maimai va dawn, a neh ziah ua khat vei maimai va ne, a kap ziah ua khat vei maimai va kap. Hinanleh tua khat vei maimai in i hinkhua pumpi suse thei gige ana hi daih hi. Tuachi'n i theiloukal in khelna kawkhu thutah ah i na kegawp man zel uhi.
R Zaccharias kichipa'n "Khelna in i utlouna tantan ah ang pui ding a, i um utlouna chiangtan ah ang umsah ding a, tualeh i piah utloutan ang pesah ding hi" chi'n ana gen hi. Tuni'n mi tamtahte hinkhua ah a dih mama chi i muthei uhi. Ut thu hilou lah a sal a tangkhata. Dei ziah hilou lah nei mai ngai.
Simtu it, tuni in nang leh ken hun hoitah nei nalai i hikha ding. Tua i hun hoi khu bangchi'n i zang ei? chi kiveltha vai. Khovel ah siatna chinteng a kim chi i thei a, i lah ah a maingal mama hi. Tambang ahilai in eite'n i bawl ding tapou a hoi nai? A dih nai? chite i etchet ding uh kisam hi.
Paul in Thessalonika mite kung a, a gen khu tuni'n eite kung a, a hing gen bang in pom vai in i hinkhua ah silhoi pouma tukip chinten ding in Pasian hatna suang in pan la vai. Tuachi'n sietna namkim pel ding leh pel zou ngei ding in panpina ngen in thum zing vai.
Mangpa'n theisiam thei ding leh hinpi a, gasuapi ngei ding in hing gualzawl hen. Amen
________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Tam Ministry in thugel tungtawn a hagaulam tahsapte mu ding, leh khat-le-khat thutah a kihanthawntua ding lunggul pen in nei hi. https://reachgwm.blogspot.com
No comments:
Post a Comment