Lawmpa'n a WhatsApp status ah a pi' khut vuai thinthen lim ang koi a, a nuai ah "Pi aw, sawtpi hing dampi nalai in aw" chi gel hi. Ka mutah in "Gualzawna tang na hi" chi'n ka dawng(reply) hi.
Phalbi khovot nuai ah
"ULian, nang toh Christmas mangkhawm ut hina maizen ing e" chi'n Hoiching in a it mama a ULian liang a kingamkawm in gen hi.
"Kei zong ut mama ing Ching aw."
Dai dide
"Hinanleh i maban ding ka khualna ziah a kalsuan loutheilou ka hi."
Hoiching' khut tukawm in
"Hoimun pou ah um nanlei lungsung ah kingillou in, thum zing in 'Jesu Nang Toh Christmas Zangkhawm Nuam Ing' chilei ama'n i lungzuan hing nem ding a, kipahna hing guan ding ahi Ching" chi'n Lianpu in gen hi.
Eite khel vang a leimun niampen a hing piang i Mangpa uh Jesu Khrist pian champha Christmas ni loupi lawm ding ngah a i umlai un i hinkhua uah bang i tuahkha uai? Bangchi'n i kisingsa uai? Tuni'n mi khenkhatte a it-le-ngaite un lenmual a khumsan ziah ua lungleng vungvung a um in kilawpna himhim neilou a hun zang i um ding uh a gintathuai hi. Tualeh i itpen, i ngainou toh munkhat a mankhawm theilou ding ziah a lungzuang nguingui a umkha zong i um maithei uhi. Tuathamlou in sil-le-ten mi neibang neizoulou ziah, innten-khosah hasatna ziah leh lawsapna chite ziah a thanopna himhim neilou zong i umkha ding uh a gintathuai lasih hi.
Bangteng hileh tami Message i sim tungtawn in "Aw Jesu Nang Toh Christmas Zangkhawm Nuam ing" chi a thum ngam ding in i kideisah uhi. Jesu'n ei sang in i hasatna theizaw a, ei sang in i lungkham, i mangbat leh lungzuan hing theizaw hi. Tuaziah in thum in, gen in, ama chial vai. Christmas Khrist ngei toh mangkhawm ding in i lungsim ah ama mun awn vai.
Mari in:
"Ka lungsim in Mangpa a pahtawi a,
Ka hagau zong ka hundampa tung ah a nuam ta seng hi.
A ziahpen ama'n a suahnu hawmthawhuai khu a theizing a, tu a kipat in kei pen mi hampha ei kichita va. — Luk 1:46 - 48
A bul penpen a ka lawmpa WhatsApp status ka gen zenzen khu "Pi-le-pu tehvuai phinphen neite'n amaute it a duat ding in, ka lawmpa bang a sawtpi ang dampina ding ua thumsah zel ding ahi" ka chi utna ziah ahi. Tuabang pipi, pupu neikhate khu "Yes! You are blessed beyond blessed" hing chi nuamdan ka hi.
Simtu zousia Khrist ngei toh Christmas mangkhawm chiat ding in deisahna lianpen ka'ng laan hi.
________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Tami Ministry in thugel tungtawn a hagaulam tahsapte muh ding leh khat-le-khat thutah a kihanthawntua ding lunggulhpen in nei hi. https://reachgwm.blogspot.com/
No comments:
Post a Comment