"New Christmas Tradition" kichi poster khat November hatawp vel in WhatsApp dung ah hing kithethang hi. "New Christmas Tradition: Beginning December 1st read one chapter of the book of Luke in the Bible each evening. There are 24 chapters. On Christmas eve you will have read an entire account of Jesus's life and wake up Christmas morning knowing WHO and WHY we celebrate!" chi kigel hi.
Tuami pansan in "Lets Make A Chain" chi'n khanglai mi bangza ahiaite'n commitment bawl in Luke bung khat zel nichin in ka sim uhi. Hun dang a ka Lai Siangthou sim teng sang in lungluthuai ka sa zaw hi. "Who and Why?" chi a tha a theisiam sem tum a ka sim ngitngetnate ziah hiva chi ing. Tuami'n sil-le-ten, guolnop kipawlkhawmna chi tuamtuamte toh Christmas vaidawn ding a kisingsahnate sang a thutah Lai Siangthou ma a kibulphu khun eima mimal a gasua thupitah nei zaw ding ahidan hing chiansah sem hi.
Jesu Khrist khu Pasian tapa, kumpi leh hundampa ahi. Mial a um mite kung a vah tuntu ahi a, shina a kipat hinna tuntu, Pasian leh mihingte kikal a lemna tuntu, Lemna Lengpa zong ahi. Tuni'n eite'n i hinkhua ah ama khu i kumpi leh i hundampa ding in i na sangkha tai? Mial nuai a i saltanna a kipat in Jesu Khrist tungtawn in tanvah in i umkhata uai chite i kidot ding uh deihuai i sa hi.
Jesu Khrist koi hi a, bangziah a a pian champha thupitah a lawm i hi uai chite a theisiamsate'n theichet semsem sawm in tukum Christmas mang ding in kisingsa vai; tualeh theisiam nailou a siatlei noplenna leh manthatna lam tawn a kalsuante'n Khrist lam mitsuan a kalsuanna tha i neitheina ding un thutah Lai Siangthou pansan a Christmas lamdawn ding in kisa chiat vai i kichi nuam uhi.
Mangpa'n a tapa tang neisun Jesu Khrist tungtawn in lemna thu a puong zouta! Tua a min lamdang, lemthei Pasian hat, kumtawmpa Lemna Kumpi khu ei mimal chiat a ding a Kumpi hi ngei ding in Mangpa'n simtute zousia hing gualzawl chiatta hen.
________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/
No comments:
Post a Comment