"ARISE | THOUKHIA IN" in kichi Gospel Movie nana etkhaleh kamham khat "Khemkhem khovel paidan eivoi" chi khu na melthei ngei ding ka tahsang hi. Tulai in sil zousia 'khovel peidan avele' chi ahi zing hi. A poi mama khu a tamzaw ah silhoi lam sang in a hoilou lam ah tua khovel peidan avele i chi zing uh pen i zui tam zaw uhi.
Pu VL Mangzo lehkhabu "Singngat Special" leh Rev. Dr. Dongza Thawng lekhabu "Lamka Cry" chite ka na sim a hoithei ka sa khopmai hi. Pu Mangzo in khotang siatnate khovel vai lam deu a sut in a bawlhoi dingdan, a siamphat dingdan tangkoupi hi. Dr. Thawng in ahileh hagaulam mit a en in Gospel toh a chimsa i khotang uh lamtha ding in mipite hanthawn hi. Kum tamkhop peita a i khotang siatnate uh ana tangkoupi uh tunitan a muthei a um nalaite'n lung hing himawsah a, a siasia zing ding ata amah chi lunggel hing neisah hi.
Romte 12:2 ah "Tami khovel dan bang in umsih unlen, Pasian deilam; a hoi, lungtuahhuaitah leh hoikim na theitel theina ding un, na lungsim uh a tha a um in hing lamdang zawta un" chi i muthei uhi. Tami Rome-te laiha a Paul' thugen pipente lah a khat ahileh 'ginna tungtawn a hotdam leh siamtansah a omna thu' ahi. Tuachi'n tuabang mi, Khristian ahisihleh gingtu kichite om dingdan thuhilna in a laiha a zou hi. Tuni a i Lai Siangthou tangtel zong khu thuhilna kamsua ahi chi i theisiam thei uhi. Eite pen Jesu Khrist vang a shisan mantamtah a tatkhiat, hutdam leh siamtansah i hitah ziah ua Khovel dan bang a um nawnlou ding a hattuam liuliaute i hidan uh a muthei hi.
Seppite'n negu ua ei negu lou sese. Lawmte'n dawn ua ei dawnlou sese. Chiamnui thanghuai a gen mai uh hilou Fb leh WhatsApp status vel a post sese ua ei post lou sese. Party hun ding hau a hau ua ei kineilou sese. Tuni'n ngaitua lei a 'sese' pen chet khu i hinkhua pumpi heng lamdangtu hithei zing ahi. Tua a 'sese' pen khu Jesu Khrist mel kilawmtah a i taanvahna ana hikha thei ahi. Tua a 'sese' khu Jesu Khrist adia lamdang ngam i hina uh ana hithei zing ahi.
Ginna tudet a hinkhua a lamdang ngam ding in simtute a thuneitu Mangpa'n i tan chiat ua ding in hing gualzawl sahta hen.
________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/
No comments:
Post a Comment