Sunday Message | KUA AHIA NANG HON NEITU?

Tulai khovel hih ei leng ei a hilou a, kuahiam a hihtheih mahmah hita e, chihtheih khop ahi. Banghiam thusia hong leng zek alah pawl kikhekna, ngaihdan kikhekna, hiai huaite pawl, amau huaite pawl kichih in a om sek hi. Ngaihdan tangtak in genle lah, nangle amau lam maw kichih hipahpah mai!

Tanchinhoih gelhte bang sim le hang, Jesu’n a sinsaknate akipan lampi nih, kumpigam nih, neitu (pu) nih chihte a thangsak mahmah hi. Huaitan a beilou in, huaite lak ah Amah tuh lampi dik omsun ahihdan (John 14:6; Nas. 4:12 chihte ah) a taklang zel hi. Amah gingtate a ding in hiai hih a kipahhuai mahmah thupha ahi. Himahleh, gingta kichi kawmkawm a muanglah hihkhak ding tuh a lauhuai khat ahi. Aziak ahihleh, Aman hiai bang in a gen ahi: “Kuamah in heutu nih na a sem kop theikei; khat hua in khat a it ding a; ahihkei leh, khat gum in khat a simmoh ding. Pathian leh sum nna na sem kop theikei ding uh” (Mat. 6:24). Ama ate tuh midang toh neihkop theih hilou a, kineisak tak a om ut ahihman in.

Hiai akipan in i thulu a dotna nang leh nang ah dawnna ana kipe ding in ka hon ngen ahi. Dawng ding a na deihtelna kon thununsak theikei. Himahleh, Jesu Khrist a ka hi chi a dawnna na piak ngeingei leh, na dawnna ah dingkip ngam ding in ka hon deihsak. Huan, hon neitu diktak amah ahi na chihleh, amah na kineihsak a, ginomtak leh muanhuaitak a pomkip ding in ka hon hasuan hi.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/ 

Sunday Message | THUMNA A KIHIHHAT

“…a thum khit in a nungzui mi khat in a kiang ah, ‘Toupa, thumdan Johan in a nungzuite a hilh bang in hon hilh sam ve.” – Luke 11:1

Thum ding a kihasot hih a nuam a, himahleh zuih gige a haksa mahmah hi. Pathian in melma zohna ding a galvan hon piak (Eph. 6) ahihziak mah in, doudaltu leng a hat hi. Himahleh, bahna leh hatlouhna akipan gingtute tuh thumna tungtawn a ginna a kihihhat semsem poimoh ka sa hi.

 

Thumna poimohna tampi lak ah tamlou tuni’n taklang in, huai akipan tha la le hang uthuai i sa ahi. Khatna, naakna ahi. Mihing hinna ding a kisam tampi a om ahi. Himahleh, a dangteng nei le hang leng, i nak kei uleh a phatuamkei ding hi. Huai omdan tuh hinna gui, nakna ahi chih phawk in thumna toh hinkhua zangtou ni. Nihna, ann sang a poimoh zaw ahi. Jesu mahmah in leng thumna a ngai poimoh petmah hi. Mark 1:35 in “…zingsang in, khovak ma tham in a thou a, a pawt a, gamdai mun ah a va hoh a, huai ah a thum a” chi hi. I hun zatdan apan in leng, zing thouphet a nektak buai a buai i hi sek uhi. Himahleh, Jesu’n ann sang in thumna a ngai poimoh zaw chih a hon sinsak hi. Thumna, Pathian ihmut sang in a poimoh zaw. Luke 6:12 ah “a pawt a, thum ding in tang ah a kuan a, Pathian kiang ah zan khua in a thum” a chi hi. Pathian toh kithuahkhawmna hih ihmut sang in a poimoh ngaih zaw in, zankhovak in a thum hi.

Tuni’n na thumna hinkhua ah bang dinmun in na om a? A minpu leh kilawmsakna dan a thum lel i hikha uhia chih kivelthak ni. Ginna toh na thum leh, aman thil thupi leh lamdang a hon musak ngeingei ding. Thumna aman zaklouh leh dawnlouh a neikei a, a hun bangzel in dawnna a pia hi. Mite’n pilna leh siamna tungtawn in nasatak in khovel lumletzou uh. Nuclear galvan hat taktak, technology mittai leh na lamdang taktak semthei bawlkhe mahle uh, thumna in huaite sang in thil ahihthei zaw chih phawk ni. Huaiziak in, thum dingdan Laisiangthou hon sinsakte zongkik in, thumna mah ah kihihhat thak ni.

............………………………………..

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulhpen in nei hi.

Sunday Message | TOUPA DEIHLAM BANG AHI A? (What is the will of the Lord?)

Ka ngaihtuahkhe phut a tukum August kha adia Sunday masapen lah ahitamai a! Oh, hun pai hat hinatel e ka chi nepnup hi. Neulai a High School kailai khawng ka ngaihtuahkhia a, huchi'n tukum a siamsin naupangte ka ngaihtuahna ah hong kilang uhi. Khovel kihei dan a chituam zia leh mihingte'n hindan ngeina i zattheihlouh ziak ua nawngkaina leh haksatna i tuahte un ngaihtuahna a hon liapsak hial uhi. Natna hileng chi tuamtuam a tam mahmah a, sihna a maingal a, siat tuahna leh keksiatna in mite hinkhua ah vai a hawm nak mahmah hi. Huchihlai in, eite hiai hehpihna hun ah hehpih in i om lailai ua; hiai Message i simtheih lai man un mi hampha ihi i kichilou theikei hi. Hiai i hamphatna uh bangchi'n i zang uale? Toupa deihlam in i zang na uh hiam? 

Paul in Ephesate kiang ah hichi'n lai ana khak hi "Nite a hoihlouh ziak in hun na neih sung un a tam theipen sem zel un. Huaiziak in hai nuam dah unla, Toupa deihlam bang ahi a chih thei zaw un. Huan, uain kham in om kei un, huai ah tuh kideklouhna a om ngal a; Kha a dim in om zaw un, Phatna late, Pathian late, khalam late a kihoupih chiat a Toupa kiang a na lungtang tengteng ua gingkilawm bawl leh la sa in, leh. I Toupa Jesu Khrist mi na, Pathian, Pa ngei kiang a, bangkim tung a kipahthu gen gige in. Khrist laudan siam in kiniamkhiak chiat un."

Tuni'n ei khang ah nite a hoih nawnlouh dan gen se ngailou in i thei chiat uhi. Hinapi in Toupa' nna i septheihna ding un lam chi tuamtuam ah kong honsak in i omlai hamham uhi. Septheih sun a tam theipen sem ding a hanthawnte ihi uhi. Hiaibang hun ah i hai nuam dah ding ua, i kitheihmoh bawlkei ding uhi. Toupa deihlam bang hihiam chih i theih zawk uh kiphamoh hi. Huai theihna in gitlouh tawpsanna a hon gahkhe ding a, huchi'n Kha a omna leh thilhoih tam sem sep utna a hon gahsuang ding hi.

I hinkhua a "Toupa deihlam bang ahi a?" chih theisiam ding in Toupa'n hon vualzawl hen la, a deihlam a i kalsuan theihna ding in tawpsan ngaite tawpsan zou ding in Toupa'n hatna hon pia hen. Amen.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | BANGZIAK A PATHIAN IN PHAL HIAM?

“Pathian kiang ah, Hon mohpaih ke’n; bang dia hon kinakpih na hia hon theisak in, ka chi ding hi. Na nuaisiah nang a dia hoih ahi maw, na khutte thilhih na musit a, giloute thugen a na maitai?”

I hinkhua theisiam haksa sak hun a om theih bang in, i hihna diktat i theihchet semsem leh thangpaih huai semsem abat hun leng a omthei zel hi. Bangziak a thilhoihlou mihoihte tung a tung a, thilhoih mi hoihloute tung a tung hiam? Pathian in gimthuakna a phalna san chiantak a theitu bang a om pen a lauhhuai kia hilou in a haihuai hi.

Thukhunlui a gimthuakmi Job in Pathian mai a dotna bawl taaklou ahihdan a kitheihkhiak in “…..ken ka theihsiamlouh ka na genkhia a, ka theihlouh, kei a lamdang lua thilte” (Job 42:2) Buaina, natnate i tuah chiang in a ziak theikei mahlehang i thiltuahte tungtawn in Pathian pahtawi ding dan i thei uhi. 

Ngaihtuah mah dih, gimthuakna omlouhna gam bangchi’n a om dia? Pathian in gimthuakna om louhna khovel bawltheilou hia? A bawlthei tham, himahleh a bawl kei! Pathian thiltawnpiak thupi mahmah khat ahihleh deihtelna ahi. Mihingte’n deihtelna gilou hinkhua susethei i bawlkha sek ua, hiai deihtelna dikloute’n midangte leh ei a ding in gimthuakna a tun thei hi. Bible a “Kaina in a sanggampa a thahna, Lamekh in a khelhna a kisuanpihna, Laban in a tupa Jakob a zekhem, Joseph a sanggamte’n sal dia a zuakna.” Midangte ziak a i thuakgimnate tuh angmasialna ziak uh bang, gingtu i hih ziak a i tuah hiam leng ahithei hi. 

Simtute gimthuakna i tuahte in kipanpihtuah a poimoh dan hon musak a, gimthuakna thuaktute damna damdawi hoih pen tuh itna ahihdan i theihsiam poimoh mahmah hi.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | "...ADANG OMLAI DIAM?"

Sunday message ana semtute na vek un itna leh lainatna chibai!

Kum bangzahhiam paisa in Lamka khopi a Mahajon khat hichi’n a gen uh ka zakha hi. A nou zuak kisetheilou ahi, tuang ah kesak leteh leng tamlou ding chi in, a khiat leh cement tung ahihman in ana takdeuh le himaithei, a kitam hi. Huaitak in, “…a dang leng omlai” a chi a, a vanzuakna ah kuhkal mahmah a chi uhi.

BYF Zion in “Haksatna, Mang mel muhna” chih ana sak uh ka ngaihkik chiang in laa phuaktu lungsim ding a hon ngaihtuah sak thakthak a, kipahhuai ka sa hi. Paul hinkhua a a thiltuahte khawng i ngaihtuah chiang in, haksatna a dang omlai hiam chih theih ding khop in haksatna ana tuak hi. Himahleh, huchibang a haksatna a tuahte a hon ngaihtuahkik chiang in hiai bang in chi thei hi: “Huchi in, Khrist thilhihtheihna ka tung a a om theihna ding in kipaktak in ka hatlouhnate ka suang zaw ding hi” (2 Kor. 12:9b). Paul in tuh haksatna kichi omlou a Toupa nasep ding a utdan ahi. Himahleh, Pathian, a mite adia hoihzaw thei a pitu in haksatna tungtawn in thupitak in Paul tuh a lamtou a, a thilhihtheihna a muchiansak semsem zaw hi. 

A khen chiang in gingtu hinkhua hih a nuam ding kia lunggulhna om mawk hi. A nuamlua bang leng nuamlou salehlam ihi di uah aw! hon chisak hi. Phunchiaktak leh bawldikna toh tonkhawm utlou in hinkhua i zang ua, nuam i sa mahmah lai uhi. Nuamsa kisak kawmkawm a haksatna naih telhtelh ihihkhak ding leng lauhuai lahlou ahi. 

Huaiziak in, nuamsatak a gilou sung a kibual a haksatna thupizaw i maituah hun uh ngak mailou in, Toupa’ pina khut ah kitulutzaw ni. Aman hon theihsaknop thute kia bildoh in, ama deihdan hinkhua zuile hinkhaw nuam leh tawldam i neithei ding uhi. Huai hileh, huchibang hinkhua sang a nuamzaw a dang hiai khovel ah omlai diam? 

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | DARE TO BE DIFFERENT (A Lamdang Ngam)

"ARISE | THOUKHIA IN" in kichi Gospel Movie nana etkhaleh kamham khat "Khemkhem khovel paidan eivoi" chi khu na melthei ngei ding ka tahsang hi. Tulai in sil zousia 'khovel peidan avele' chi ahi zing hi. A poi mama khu a tamzaw ah silhoi lam sang in a hoilou lam ah tua khovel peidan avele i chi zing uh pen i zui tam zaw uhi.

Pu VL Mangzo lehkhabu "Singngat Special" leh Rev. Dr. Dongza Thawng lekhabu "Lamka Cry" chite ka na sim a hoithei ka sa khopmai hi. Pu Mangzo in khotang siatnate khovel vai lam deu a sut in a bawlhoi dingdan, a siamphat dingdan tangkoupi hi. Dr. Thawng in ahileh hagaulam mit a en in Gospel toh a chimsa i khotang uh lamtha ding in mipite hanthawn hi. Kum tamkhop peita a i khotang siatnate uh ana tangkoupi uh tunitan a muthei a um nalaite'n lung hing himawsah a, a siasia zing ding ata amah chi lunggel hing neisah hi.

Romte 12:2 ah "Tami khovel dan bang in umsih unlen, Pasian deilam; a hoi, lungtuahhuaitah leh hoikim na theitel theina ding un, na lungsim uh a tha a um in hing lamdang zawta un" chi i muthei uhi. Tami Rome-te laiha a Paul' thugen pipente lah a khat ahileh 'ginna tungtawn a hotdam leh siamtansah a omna thu' ahi. Tuachi'n tuabang mi, Khristian ahisihleh gingtu kichite om dingdan thuhilna in a laiha a zou hi. Tuni a i Lai Siangthou tangtel zong khu thuhilna kamsua ahi chi i theisiam thei uhi. Eite pen Jesu Khrist vang a shisan mantamtah a tatkhiat, hutdam leh siamtansah i hitah ziah ua Khovel dan bang a um nawnlou ding a hattuam liuliaute i hidan uh a muthei hi. 

Seppite'n negu ua ei negu lou sese. Lawmte'n dawn ua ei dawnlou sese. Chiamnui thanghuai a gen mai uh hilou Fb leh WhatsApp status vel a post sese ua ei post lou sese. Party hun ding hau a hau ua ei kineilou sese. Tuni'n ngaitua lei a 'sese' pen chet khu i hinkhua pumpi heng lamdangtu hithei zing ahi. Tua a 'sese' pen khu Jesu Khrist mel kilawmtah a i taanvahna ana hikha thei ahi. Tua a 'sese' khu Jesu Khrist adia lamdang ngam i hina uh ana hithei zing ahi. 

Ginna tudet a hinkhua a lamdang ngam ding in simtute a thuneitu Mangpa'n i tan chiat ua ding in hing gualzawl sahta hen. 

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | LAM PAM SIKKHIAL LOU OMLOU

"Even the best can be improve" hiai mikhat in Article a gelhna conclusion a hon gelh sese leh a Article gelh bang ka simsuak thakthak kha zawzen hi. A best-te bang le improve ngai lai ahihtel in ah! Himahleh a gennop pen tuh kuamah perfect omlou, hinkhua a kisin touhtouh ding om ahihdan ka phok thakthak hi.

Sawltak Paul in Timothy a laikhakna a "Kuapeuh in ama tanaute, amah innkuante khol houh, a limsak keileh, ginna tuh a zuau san a, ginglou mi sang in a se zaw" achi hi. Kei hotdam ka hihkhit nakleh chi in, a hotdamna kipahna a ompih maimah a tangthupha genna nasepna ah, kipahman muh tum in, phakchiamna ka delh achih bang in, "Douna hoih ka douta a, kitaitehna ka taitawnsuakta a, ginna tuh ka len kip paisuakta hi" ana chi hi. Hinkhua ah mihing in i thiltuah tuam chiat a, lungkhiatna leng tuam chiat hi. Ei deih bang, i tup bang a, i hinkhua a plan i bawlte hong lohching louh chiang in lam-et ding a tawm a, khasiathuai in kingaihsiat huai tuntun hi. Himahleh haksa i tuah eikia thiltuah hilou in midang in leng tuak uh a, himahleh lam etna hing neite'n tuabang haksaknate pal mualsuah zel uhi.

I buailouhna ding pi a buai, zah kailuat ziak bang, mi'n bang hon chi gen di ua aw, chihpeuh ngaihtuah ziak in haksatna, lunggimna i tuahte eimah a Sialpi vuahthuak mah bang in i thuak kenkun sek uhi. Eithuak bang ana thuak a palmual suah mi a omtham hi. Himahleh haksatna, lunggimna tawpkhawk i tuah hun in leng mahni hoih kisakna ziak in kuamah i va approach louh ziak un, i solution uh tuh, mahni ki-itzoh nawnlouhna, i hinkhua suksiatna leh sihna tan i tung kha sek uhi.

Simtu unau itte, Jesu Khrist a lam-etna neite i hihman bang un, amah mihoihte sam ding a hongpai hilou a mikhial gilou, leitung in a pampaih, simmohte  adia lam etna thak pe dia hon pai ahihdan theithakthak in Amah khebul kitunlut photleng Ama'n i haksatnate vualzawlna suaksak thei a, Amah a omte ading lam-et bei hinkhua chih omlou ahihdan phawk thakthak leng ut huai kasa hi.

Toupa'n hon vualzawl hen.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Father’s Day Message | PA HOIH HIHNA

Tuni PATE’ NI ahihtoh kiton in Jesu Khrist min in itna chibai ka hon buk hi. Pa lungput, gamtat khohei dingdan Genesis 11:27-28 kikal a kimu bang in, Abraham Pa hoih hihnate (qualities) tamlou i taklang ding uh:

1. Ginna ah muanhuai: Abraham in Pathian a muanzoh dan thupi leh ettontham mahmah khat ahi. Heb. 11:8ff ah ginna a mi thupi ahihdan taklat in a om ahi. Pathian a muanzoh dan tuh, koilam zuan ding chih theilou himahleh insung nusia in a kalsuan hi. Taksa dan ah ta neih ding hithei vual hilou ahihnung in leng Pathian’ thuchiam a ginglel hetkei hi (Gen. 12 & 17). Thamlou in, teknung tapa Isaac Pathian thupiak bang in maitam a laan ding in a kisa hi (Gen. 22). A hinkhua ana suttou le uteh, huai bang a ze-etnate zoh in vualzawlna in a zui hi.

2. Thupiak zui: Abraham in Pathian a gintak ziak in, a thupiak zui hi. A innsung mite nusia a Pathian in a chiam gam, theichian naikei mahleh, zuan in a kalsuan hi (Heb. 11:8). Ban ah, ama adia hoihlou/ lithuai/ ngaphuailou/ sia himahleh Pathian thupiak a lampialsan kei (Gen. 22).

3. Lemna bawl: Abraham in, a hinkhua ah thilnuam sang in a haksa, leh mite langbawlna leh huatna chihte tuakkha mun mahmah hi. Himahleh, huchibang hun in leng buaina tokthou mai lou in, lemna ding gel in panla zaw gige hi. Lot toh a kal ua buaina om ding lai in, kiniamkhiatna toh lemna bawl hi (Gen. 13); Abimelech toh kal ah leng, tuikhuk thu ah lemna thukhun a bawl hi (Gen. 21:22ff). Abraham tuh lemna bawl pa ahihdan a kimu nawn hi.

4. Kithoihna/ Sabiak limsak mi ahi: Nam leh gam, pawlpi, mimal leh inkuan tampite pukna khat tuh sabiak limsaklouhna ahi. Israelte mahmah leng tamveipi Pathian hing biakna apan lampial ziak in gawtna leh puksiatna ana tuak uhi. Abraham in kithoihna a ngai thupi a, Bethel ah (Gen. 12:8), Aigupta apan hong paikik in Hebron ah (Gen. 13:18) a lan hi. Huan, Salem kumpipa Melkizedek kiang ah sawm-a-khat a pia (Gen. 14:20) chih leng a kimu hi.

5. Si dingte hunkhia: Gen. 14 ah Abraham in Sodom leh Gomorrah khopi a mikhial si dingte a ding in ngetsaktu in a pang ahi. A tawptawp in, Lot inkuante a hunkhia hi.

Huaiziak in, Abraham Pa hihna pan tuni Pa hipeuhmah in kibawlthakna ding in zang ni.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | THOUNAWNPA ADIA (For Him who rose again)

Dotna khat toh tutung message pan leng uthuai i sa. Gingtu khat i hihna ah i nungzuihpa Jesu Khrist hon sinsakdan toh kituak in bangchi'n i niteng hinkhua i zang ua? Hiai dotna kidong tamthei lehang kibawlhoihna ding, panlakna ding leh thohkhiat nawnna ding tamtak i nei ding uh chih a gintakhuai hi. Huchi'n poimohna mun ah kibawlhoih in, panlakna ding mun ah panla sam in, i puksiatna akipan in thoukhe ding in thathak la lehang i Khristian hinkhua hon gahsuah ding hi.

Tulai in chu mi'n a 'So What?' ualeh ei leng i na 'So What?' churchur pah ua, a laam sung uh sang in a tungthu uh i leel sung uh a sawtzaw hi. Hiaite thutuam in koih ni. Eite'n thilkhatpeuh i pahtak siamlouh tuk un i gense siam viau ua, i zuihlouh tuk un i gentam zou mahmah uhi. A kigen nak mahmah—a poimoh hun a lapawl sa a dingthei, tuailai vai a feltak a kihel, khotang vai a lah phattuamngaihna suah tampen hi gige ngal, himahleh, tep-le-muam, nek-le-dawn a kikemsiang tuan samlou. Ngaihzawng lak a gin-omlou zawmah. Social media a galmatawng hi deuh zut. Mi toh kinak khawksa lou. Angmasial petmah in nambing, pau-le-ham, saptuam leh khua-le-veng chihte ziak bang a midangte sik etpah mawk. A hinkhua a Khrist mel lang mahmah lou mi ana ki-om zenzen hi.

Lai Siangthou 2 Korinte 5:14-15 ah "Mite tengteng sih sik in mi khat a si a, huaiziak in mi tengteng a si uhi. A hingte leng amau adia a hin nawnlouh ua, a sih sik ua si a thounawn adia a hin zawkna ding uh ahi, mi tengteng sih sik a a sih" chi gelh i mu uhi. 

Mit hak kelkul mahlehang eite bel khelhna a si i hi ua siamtang a i hin nawnna ding un Jesu Khrist a tatkhiakte i hong hi uhi. Huai tatna nna tangtawn daih ding tuh kum 2000 val paita in khros ah sepzoh in ana omta hi. Huai thulamdang tuh Kha Siangthou tungtawn in theihsiamsak in i om ua ginna tungtawn in i sang uhi. Mi khenkhatte'n hoihna in hiai hinna thu san i sawm uhi. Himahleh mihingte'n hoihna khatlelleng neilou i hihman un ei hoihna in i sangzou ngeikei ding uhi. Toupa'n hon thilthawnpiak ahi a kipaktak a i hihna bangbang toh san ding ahi. 

Huchihlai in ngaihdan deihhuailoupi i neisek ua "a thawn liuliau ahihleh ut dandan in omleng le a poi dia hia? Tatsa lah ka hingal a" i chimawk uhi. Tuni'n i theihsiam mahmah dia poimoh khat a om. Huai tuh "a sih sik ua si a thounawn adia a hin zawkna ding uh ahi" chih Lai Siangthou hon hilh pen ahi. 

Simtu deihtakte, tuni'n ei ziak a hong si a, siam i tanna ding ua thounawn i hondampa uh Jesu Khrist adi'n hing zawta ni. Huai di'n pan la ni. Hileh i Khristian hinkho zat ah Jesu Khrist mel a hong lang ding hi. 

Toupa'n hon vualzawl hen.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | THUTAK ADIA KIPUMPIAK

Mi thutak a omte'n, a khenchiang in vuallelhna bang, gensiatna chihte a thuakkha zel uh. Huaiziak in, sinsakna diklou leh thutak hilou, zuau natan pha a poisaklou suk mai bang a telzaw kha sek uhi. Mikhenkhat thutak a kipumpiak a gupna ziak ua a hinna nangawn uh lauhuaitan a pang ngam om uhi. Stephen in Juda vaihawmte ma ah hichi in a chi "Mi genhakte, lungtang leh bil a zeksumlouhte aw, chiklai peuh in Kha Siangthou na dal gige uh; na pipute uh hih bangbang in na hih nilouhlouh uh. Na pipute un zawlneite lak ah kua ahia a sawi louh uh? Mi diktak hong ding thugen kholhte a hihlum ua; huai mi taktak tuh mansakte leh thatte noumau tu in na hi uhi. Dan, angelte piak sawn, mu masa a zuiloute aw, a chi a." Nasepte 7:51-53. Thutak gum a, thutak a genziak in suang a denlup in a om hi.

Thutak tuh min a lungtang a siangthou chi a gintak a, i lunggel kibatpih mite lak a taklat dan lel ahikei hi. Thutak tuh genkhiak a hinkhua a zat, hinpih ding ahi. Thutakna ziak in salam ah sawina, vuallelhna thuak bangmah lehang khalam vualzohna leh vualzawlna ahihdan phok gige ni. Khovel tuh zuau in dim a, bangteng hong tung mahleh, kuateng thutak a muanhuai? 

Simtute i vek ua, thutak hinpih, gum ngam ding in Pathian in hon panpih hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | PENTECOST LEH NANG

Natna ziak a haksatna thupitak lak a omte adia Pentecost Ni hon musak Toupa min phat in, simtute namaste!

Pentecost Ni i chih Kha Siangthou a langtang a sunbuak a omna ni ahi. Greek thumal ah ‘Pente’ kichi 50 genna ahi. Kha Siangthou sunbuak a om ni tuh Jesu Thohnawnni akipan ni 50 chi ni leng ahi. Tuni in Pentecost Ni a thiltungte leh a gah kimute sang in, kei a ding in bang a phatuam hiam chih dotna kidong zaw le hang i chi uh ahi.

Kha Siangthou piak a omna ziak tuh nungzuite kiang a Jesu thuchiam tangtunna ahi. Pa Pathian lemgelna nuai a taksa a omdenlou ding in lei ah sawl in a om hi. Hiai nna a sep sung in a kichimatpih diak nungzui 12-te a om uhi. Amaute kiang a omden theilou ding ahi chih a theihman in, amaute kiang a omden ding in Khamuanpa dang a ngetsak hi. Huai tuh Pentecost Ni in a hong tangtung ahi. Nang hinkhua ah leng a thuchiam a pelkei ding chih phawk in. 

Thupiak Thupipen tuh “kuan unla, nam chih akipan nungzuite bawl un….” chih ahi. Hiai nna sepna ding in mihing thahatna leh pilna in bangmah a zoukei ahi. Hiai nna in ginna leh hinna sukha ahihman in, mihinna in a ngapkei a, a zoukei bok ding. Himahleh, huai semkhe ding a lamet nungzuite tuh Pentecost Ni in Kha Siangthou piak a om in, huai in hangsanna pia ahihman in a semkheta uhi. Tuni in gingtu sanggam it, bangtan nang hiai na semta? Hotdam a na om akipan in hiai Kha Siangthou in hon tenchilh khinta hi. Tuni in na om maimai theilai dia hia? Covid-19 ziak in patau, lau leh ling a omte, huan, khalam a dangtak i kim-le-kiang ah mi tampi omte enliam mai ding na hi maw!

............………………………………..

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | JESU KIANG AH OMTA (Now with Jesus)

Kum 74 a upa Pathian mi zat, a minthang mahmah Apologist Ravi Zacharias kichipa a paita 19th May, 2020 in si hi. A sihna in khovel kilchih a khong a, adiak in gingtute it a lawh mahmah. Sihna i chih khovel a piangkhia mihing kuapeuh in i maituah ding uh lah ahingal a! Kum upat nung a si i om ua huchibang in naupang chik a si leng i om uhi. A kibang vekkei.

'ONE in Christ' kichi Mizoram pansan Gospel Music Band a Assistant leader hihna lenlel Ms. Lalruatdiki in 22nd May, 2020 ni'n sihna ana tuak hi. Hiai band kia hilou in a omna Mission veng ah Pastor bial zaipawl ah member ahi a, huan, BSI ah Soloist leng ahilai. A sihna in Mizoram a khong nak mahmah. 

Huchihlai in India khopi tuamtuam a sep-le-bawl nei a khosa mi tamtak tulai in natna hileng ziak in sepna sunzom theilou in i om ua, innlum zuan in i kivial hehu uhi. Tampitakte khe a lam sau pipi a pai ziak un bah in puk ua sihna hial tuak uhi. Train a paite khenkhat leng i bitkei ua sihna tuak zak a hong om zeuhzeuh hi. Poi lua. 

Tulai inchu a pau tapeuh, a gelh tapeuh in i gentel leh gelhtel kei ualeh bukimlou hileh kilawm hial a om, i hinkhua a hon tokbuai luat ziak a genkhaklouh theihlouhlah hisi 'Covid-19' kichi in niteng in mihing hinna bangzah a laksak ale? Tawmlou ahi chih i thei.

Khovel a galmuangkei chihleng i haihkei ua, sihna leh natnate hun dangteng sa'ng in a maingal zaw chihleng i thei uhi. Bangteng hileh i gen uttak bel sihna i tung ua hong tun hun in, hiai khovel i pawtsan hun un mite'n bangchi'n a hon gen ding ua? chih ahi. 

Ravi Zacharias bel a sih ni in ama dinkhiat ministry 'RZIM' in 'Ravi Zacharias now with Jesus' chi'n gen uhi. Lungsim a hon khoih a, a khamuanhuai in a tawldamhuai khopmai.

Awle, simtute, tuni'n eite hun ah 'Now with Jesus' chi'n gen ngam a hi diam? Huai ding in i damlai hun manpha bangchi'n i zanglel uale? Thugen siam, lasak siam hihziak a huai khamuanna ngah uh a hituankei uhi. Huai khamuanna tuh Jesu Khrist tungtawn a a ngah uh ahi. Amah Jesu Khrist tuh Ravi Zacharias hondamtu ahi a khamuangtak a tawldamsaktu leng huai Jesu Khrist mah ahi. Khamuanna bukim hon pethei Jesu Khrist len in i ginna ah dingkip ni. Hiai khovel hun haksatak ah Jesu Khrist lou belh ding kuamah a om ngalkei a. 

Toupa'n hon vualzawl hen.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | BANGTAN THUAKNGAP DING?

“…nang leh kei sihna loungal thildang in hon khen leh Toupa’n ahihhih in hon hih henla;” 

– Ruth 1:16-17

I tenna khovel hih Pathian hamsiatna ziak in natna, haksatna leh lametlouh gimthuakna ding tamtak om hi. Pathian hatna toh i dou louh chiang in pukna hon tun hi. Huaite lak a khat ahihleh “nopsak utna” ahi. Innkuan hi ding a Pathian mai a i kigawm chiang in “sihna loungal in hon khen kei hen” chimahle hang, a tatak in tangtun haksa mahmah mai hi. Huaiziak in, tulai dinmun toh etkhawm in “bangtan thuakngap ding?” chih kidottuak mahmah ka sa ahi.

T. Pumkhothang in “A ithuai a naupangte nangawn in zong a thuak” chi in thuakngaplou nupa ziak a haksatna/ pukna om thute tungtawn in laa lungkhoih mahmah ana gelhkhia hi. Inkuan kisia leh pukte tunding nawnna ding in Ruth ginomna enkik zual le hang i chi uh ahi. A pasal in a sihsan nung in, a nu mahmah in leng nawkik ding in sawl hial hi. Huan, a ngaihtuah huai mahmah nawn tuh, sihna ziak a kikhenna ban ah, nektak haksatna thupitak a tuah laitak uh leng ahi. Moab gam akipan Bethlehem lam ah nek zong ding in a kuan uh chih a kimu hi. Huchih hun a Ruth kampau tuh: “…nang leh kei sihna loungal thildang in hon khen leh Toupa’n ahihhih in hon hih henla;” chih ahi. Ruth a ding in a nuamzaw ding tuh nunglam a kik ahi. Himahleh, a ginomna tuh sihna in a pasal toh a khen nung natawm a leng, a anu (a pasal nu) gimthuakna thuakpih ngap, sih tanpha a ompih lai ding chih ahitel ahi.

Ngaihtuahna zang le hang, nupa kinakna, nawkikna, kimak-kikhenna hun tamzaw ah a kim-le-kiang gengen mahle hang, a taktak zaw taksap hun bang hi nuam mahmah ahi. Khenkhat ahihleh tawndan ziak le ahithei a, zawlkal thu leh ginomlouhna vai le zaw a omtham ding.

Himahleh, ei Jesu Khrist nungzuite adia zaw haksatna maituah dingdan Laisiangthou a i muhte uh mah ahi. Gingtute hihna tuh haksatna tuah hun in i hihna taktak uh a kilang ahi. Huaiziak in, bangtan thuakngap in Jesu Khrist nung i zuihsawm ua? Jesu Khrist Lal leh hondampa ding a sang ding a chialna hong kibawl peuhmah chiang in hiai dotna toh dawnna pekhawm ni. A nuam leh kipahhuai zawng kia lamen a, khelhna nuselou a haksatna tellou hinkhua zang gingtu kichi zaw a tatak mun ah puk thouthou uhi.

Toupa’n gimthuakna mun a leng Amah adia ding ngam ding in hon ompih chiat hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulhpen in nei hi. https://reachgwm.blogspot.com/

Mother's Day Message | A KHUT NASEPGAH AMAH PIA UN (Give her of the fruit of her hands)

"Ka lungdamna thu genzoh vual hilou,

Tuchiang dong a n'on kep thupi lua sang ing;

Na khan kumkhua sawt di'n Sian in hon huai hen, 

Tunnu kei n'on itna ngilh ngeikei ning e."

Khovel kilchih a om nute tengteng khut kilen sese lou in 'Nute' Ni' chibai k'on buk a, pahtawina sangpen ka hon laan hi.

Khovel a ding in nang tuh nu na hi a, innkuan a ding in bel khovel na hi. Nang ziak in innkuan a bukim a, na khalimnuai ah na tate lungmuang leh tai-le-vah in a khosa uhi. 

Tuni'n na thupina, na ithuaina leh ngaihhuainate simthu'n kileel zou ngeilou ding a, zaila'n ki-awi chim ngeilou ding hi. Nang bang nu hoih, zi hoih kua'n a mu dia? Nanglah rubi suang tunglam pek ah na om ngal a. Manpha in thupi hinatel chia maw. 

Khovel hinkhua ah innsung khosak haksak ziak bang, na pasal leh tate thulimlouhna ziakte bang in bah leh ngui vungvung a na om hun a om ngei ding. Himahleh tuabang hunte inleng Pathian hatna suang inla na innkuan chidamna ding leh bitna ding in ana pang teitei in aw. Toupa ah vualzohna om hi. 

Na pasal leh tate na itna leh khotuahna vang a, a lim, a al ne ngamlou a gilkial na thuaknate, a zu, a ham thuak a gim leh tawl khawksalou a na pannate Toupa'n a vuaksuaksak kei ding a vualzawlna hon suaksak zaw ding hi. 

Na dahna luankhite'n pahna luankhia a hong tang ding ua, na tawlnate damna a hong suak ding. Na zanmial daidam leh lungngaihhuaite'n zingkhovak kilawmtak a hon tun ding uhi. 

Huai hun chiang in "A khut nasepgah amah pia un" chih a hong hi ding a Toupa vang in pahtawinate tengteng khuksak in na om ding hi. Hiai Mother's Day ni thupitak in nang adi'n lam-etna thak hon tun hen. 

Happy Mother's Day! Toupa'n hon vualzawl hen. 

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | I BIAKNA POMTAK AHI MAH DIAM?

“Ahihhang in Kaina leh a thillat bel a kipahpihkei. Huchi'n, Kaina a heh mahmah a, a mel a liapta hi” (Gen. 4:5). “Toupa’n: Na kithoihna zouzaite’ un kei a ding a bang manphatna nei ahia? chi hi. Noute’ haltum thillat belamtal leh gan vakthaute’ thaute’n hon nimta hi. Bawngtalte, belamnoute leh kelte’ sisan ah kipahna neilou hi’ng” (Isai 1:11).

I Pathian tuh kha ahi a a be mite’n kha leh thutak a biak ding ahi (Jn 4:24) chih i thei a, himahleh Pathian in bang ziak a a thillat pomlou ahia? Pathian in a hoihpen a deih a, a hoihpen zom a deihkei hi. Tuni in Pathian bia in Biakinn ah i biakna thilpiakte ngaihsun thakmah dih? Vualzawlna dong leh tangtak in na kikoih hia?  

Pe lou vet hile houh vualzawlna i ngahzaw diam?  Bazar a i zattheihlouhte Amah biakna thilpiak a i piak Pomtak asa mah diam maw? A thilpiak pen le hi sese kei a petu a kinga na chi hia? Dik mahmah na thilpiak apat in na lungsim di achiang hun mahmah. A tam a tawm Pathian in a hon ngiat kei, himahleh i neih khamkham i phal bangbang, lungsim siangthoutak nei kawm in a hoihpen mah pia in nei theile vualzawlna i ngaihlou tuankei ding. Hamsiatna tang lel dia pekhe kha i hihkhak ding ngaihsuthuai mahmah. Papi chingkam khat in lah, setan biakna hong kigen tung in “Setan a tuam a va huchi Biak le a ngai ahia? I khohei dan in amah lungtuak lua ahihchia” hon chih gennei ka sa mahmah hi.

“Abel in bel a belam hon lak a piang masate apan, a thau deuhte a laan hi. Toupa’n Abel leh a thillat a sang” (Gen. 4:4)

“…Na tapa, na tapa tang neihsun nangawn na siitlouh man in, Pathian na lau chih tu’n ka theita, a chi hi.” (Gen. 22:12).

Abel in a gan vakthaute in kithoihna a bawl a, huai pen Pathian in a sang hi. Pathian in Kaina biakna a pomlouh ziak a gen a “a dik hih lechin saan in na om ding” a chi hi. I Pathian chilgil Pathian ahi. Hih maimai a kipak ahihlouh dan a chiang hi. Pathian pomtak Biakna zaw chihtaktak a biakna ahi. Abraham in a Tapa Isak a lat ding in lungsim thuahnih a neikei. A tapa mahmah a Pathian biak a sawm a, biak leng a bia hi. Huchi in Pathian kipahna a sukha. Eite’n leng Pathian pomtak biakna i piak theihna ding in Abel bang lungsim i neih a, Abraham bang a a taktak biakna i lat ding uh ahi.  Abraham in a goumanpha, a tapa tang neihsun, teknung-vuainung a a neih a pekhe ngam hi. Unau nang Pathian a ding in kuamah deihlouh zattaklouh te lel hia Amah biakna a nana piak? Bang na pia a?

Toupa'n hon vualzawl hen.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | GAL LANGKHAT LAM AH I GALKAI DING (Let Us Cross Over to The Other Side)

"Gospel i gen chiang un i gen Gospel zoulou deuh uh kisa ka hi. Etsakna dia: Kipaktak a gen ding hizenpi kigen gum lua, khelhnathu i gendan uh ki-etkik zek ngai in ka thei. Eite zaw khelhna bang ahia chih i theihma nangawn ualeng ana khialsate kihi ahi. Huaiziak in, nekgukna, huaihamna, zuau genna leh a dangdang khelhnate chu i pianken khelhna ahi. Himahleh Jesu Khrist a tatkhiatna bukim in huaite a kipan hon silsiang sipsip ahihdan i gen ot/ tam uh deihhuai. Nuihmai seusiau a i gen uh poimoh hi. Hotdam hita ka hi, ka piangthakta i chihkhit chiang a ei mimal hatna a khelhna tung a vualzou gige dingdan a genkha nak hile kilawm ka sa. Huai hilou, i hotdamna tuh Pathian lungtang ah, ngaihdamna tuh Pathian lungtang ah huai tuh Jusu Khrist sisan tungtawn kia a hilai. Tua i hinkho zat i hotdamna theihchet nung leh piangthakta ka hi i kichih nung a pen leng ei hoihna a teh kihi tuanlou in Jesu Khrist sisan, Jesu Khrist hoihna leh Jesu Khrist diktakna a teh kihilai veve hizaw ahi" chi'n Gospel gendan toh kisai ngaihdan kum dia nget/ request a ka om bang in ka gen ve tei hi. Ngaihdan a kibangvek kei ding chih ka pom thrap. Himahleh thilkhat chu i pom vek uh ka ging huai bel hotdamna kichi Jesu Khrist tungtawn kia in a bukim.

Marka 4:35 - 41 sung ah "Huihpi leh tuipi kihawtte'n Jesu' thu a mang uh" chih i mu uhi. Huai huihpi leh tuipi kihawt lauhhuaitak Jesu leh a nungzuite'n a tuah ma ua Jesu Khrist kampau tuni'n ei gingtute adi'n leng khamuanna hon tuntu kampau hileh deihhuai i sa hi. Huai bel, "Gal langkhat lam ah i galkai ding uh" chih ahi. 

Long ah a hong tuang ua, huchi'n huihpi hat petmah a hong nung a tuite longsung ah a hong kiseplut ua, tui a dimta hi. Nungzuite tuh chimoh gawp in long' mei lam a ihmu Jesu kiang ah "Heutupa, nang koute ka manthat ding uh khawk salou na hi a hia?" ava chi uhi. 

Huchi'n Jesu a hong thoukhia a, huihpi a tai a, tuipi kiang ah "Dai in, om kinken in!" chi'n thu a pia hi. Huchi'n huihpi a dai a, tuipi tung a dai khipkhep hi. 

Huan, Jesu'n a nungzuite kiang ah "Bangdia hichi lau tel na hi ua? Ginna neilou lai na tel u maw? a chi hi.

Simtute, tuni'n hiai khovel huihpi leh tuipi kinong kal a i khosak lai un "Gal khat lam ah i galkai ding uh" ana chi a hun haksatak nuai a a thilhihtheihna tungtawn a nungzuite gal khat lam ana galkaipih Jesu Khrist tuh eite hondampa leng ahi. I khualzinna longpi ah amah leng eite toh tuangkhawm hi. Hatsatna i manthat theihna ding khop tuak mahle ama'n huai haksatna tengteng tung ah vualzou in gal khat lam hon kaipih ding hon chiam hi. A kiang ah a panpihna ngen in thum ni. Amah lam zuan ni. Khalam leh salam a vualzohna tengteng lah amah a ahi gige ngal a!

Toupa'n hon vualzawl hen.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | GALDOU IHI UH

"I doute zaw sa leh sisan ahingalkei ua, lalnate leh, thuneihnate leh tu-a omlel mial tung a khovel vaihawmte leh, van mun khawng a kha gilouhon omte ahizaw uhi." - Eph. 6:12

Lunggel ngaihtuahna lam ah doutu om a huai in ngaihtuahna leh theihna vantangte Lai Siangthou theihsiamna ding in a hon chou mahmah hi. I galdou uh hiai khovel hiam tomkha thuneihna ding tupna hiam lel ahikei. Thutak tuh kingakna thamlou, mimal a kinga leh mimal hoihsakna tan lel a zuih ding mai bang in a lang hi. 

Omdan ah dou in i om ua huai in Jesu sinsakna diktatna, hindan hoih leh thilhoih nasepte ah hon chou mahmah hi. Setan in situation ethics zang in eite ahon dou/ khem a, i hih khempeuhte ua dik kisakna in hon nomvalhta. Mihing thahatna, theihna, bawlsiatna, thangtatna leh muhsitnate tuh a diklouh a le ngai theinon lou, a hun leh mun in a pawkhe na ve chih lungsim a nei a dik kisakna in i dim uhi. I khovel paidan i et chiang in, meithai, tagahte hehpihna a om nawnkei. Khovel pilna, khovel thilte zang in Pathian thutak tuh mihingte lungtang apan delhkhiak sawm Setan panlan dan i theisiamkei uhi.

Khrist' sepaih, Amah gingtute a ding in thoh a dou hun mahmah ahita. Siatna in hunta chih neilou, a uanglua chi om hetlou in, khovel thilte zang in eite a hon dou hi. I galdou, i doupa pil dan i theihchian a poimoh mahmah. Huaiziak mah in Paul in Ephesa khua a gingtute hichi'n ana ha suan hi. "Huaiziak in, ni hoihlou a na dou zohna ding un leh na hihzoh vek nung ua leng na din theihna ding un, Pathian galvan kim la un" Eite simtute leng Pathian galvan kim a i kivat theihna ding in, niteng a Bible sim leh thumna toh i pang louh ahih in hiai kidouna a i vualzoukei hial di uh.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Resurrection Sunday Message | J E S U A T H O U N A W N T A

Chowkidar Modiji in, Covid-19 akipan kivenna ding a India gamsung ni 21 sung “Lock Down” a puan, tuni a ni 19 ni ahita hi. Hiai hun sung in India leh khovel pumpi ah mihing Lakh khat val in sihna tuakta hi. Tu hun tuh khovel a thuthak zakmun a om pen “sihna” ahi a, dip a sunkha mahmah mai hi. Sihna in kuamah a khen kei a, mizawng tung ah leng a tung a, gam hausa pipi US, Italy, Spain, Germany chihte ah hiai natna ziak a sihna uang diak hi.

Tuni, Jesu Khrist sihna akipan a thohnawnna ni ahih toh kiton in, ama kampau mah enkik in, gingtute’n sihna bangchi bang in maituah/ en le hang a hoih dia chih saulou in i taklang ut ahi. Johan 11:25 ah Jesu’n a it mahmah Lazarus sihna tung ah hiai bang in a gen ahi: “Kei thohnawnna leh hinna ka hi” a chi ahi.

Mihing lam ah tuh sihna melma lian mahmah ahi. Gingtute mahmah in leng, tangtawn hinna thu gen kawmkawm in, salam sihna i lauthawng uh ahi. Abik in tu hun in sihna i lauh dan uh a kilang in a uang diak ahi. Sihna in zohlah neilou ahihman in, nang leh kei leng hon zou law mahmah ding ahi chih theichian ihihman un i lau uh ahi. Hiai hih patauh ziak, doilok ziak, ginna neihlouh ziak, pianthaklouh ziak chihte ahi vek samkei ahi. Sihna tuh taksa a kikhenna, a hing nawnlou taksa tuh uih a, muat mai ahihman a, omkhawm thei nawnlou ding ihihman un kikhiatlah ziak bang ahi ut mahmah ahi.

Hiai ah Jesu’n thilnih poimoh mahmah, hundang a leng a gen mengmeng louh thu a hon genkhia ahi: “kei thohnawnna; kei hinna,” neitu ka hi a chi ahi. Huaiziak in, Jesu toh thounawn peuhmah tuh tangtawn a hing ding ahi chih a theihtheih ahi. Unaute, Jesu Khrist nipikal a ni masa zing baihtak in a thounawnta ahi. Thohnawnna Ni hun a i om lailai in hiai thu ngaihtuah le hang i chi uh ahi: Jesu Khrist toh kaihthoh in i omta uhiam? Jesu Khrist ah hinna thak na tangta hiam? Huchibang a na om leh sihna na mai a om tuh hangsantak in na maituah ngam phet ding ahi. Covid-19 natna sang in amah toh thounawn khalou hihkhak ding lauzaw ni. Toupa'n pha asak bang in hon vualzawl hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Good Friday Message | A L A M D A N G M I A L N A

"Huan dak gukna akipan dak kua tan in khovel a hong MIAL vekta a" - Matthew 27:45

MIALNA kichi hun tamzaw ah gitlouhna toh tehkhin ahi. Aziak tuh, gutaten nitak mial a ngak ua, tualthat tampiten mialnuai ah tual a that ua, migilouten nitak in mi a vua uhi. Huaiziakin, mialna tuh thil gilou nasepna dinga hun lemtang leh sualna hun ahi. 

German gal hat law mahmah ahihman in Britain a ding in lauhuai ban uhi. Huchihlai in, England PM Neville Chamberlain ahi a. Aman hoihtak a kihoulem a, gal bawllouh teitei ana sawm hi. Himahleh, vaihawmna ah mite muanna ngah zoulou ahihman in a thakhengtu ding in Winston Churchill telkhia uhi. A tom a gen in, Churchill tuh, Britain mite adia Mialna hun ah, humbittu a hong suak hi. Aman Kidoupi Nihna ah Britain vualzohna ngahpih hi. Amah makai ding a laklut ahih hun tuh a gam khangthu adia “lauthawnghuai leh mialna in a pumtuam penpen hun” ahihman in Darkest Hour chi film a hon bawlkhia uhi.

Mihingte khangthu a “Darkest Hour” chih a ana om tuh Jesu Khrist kilhden a omna ni ahi. Matthew 27:45 a thu kigen hih ngaihtuahtham ching mialna himawk ahi. Hiai kankan a mialna thupizaw om ding in ka gingtakei ahi. Bangziak in, i chihleh, ngeina banglou in, sun nisat laitak in dakkal 3 bang khua a hong mial mawk hi: “dak gukna akipan dak kua tan in khovel a hong MIAL vekta” a chi ahi. 

Pilat in a khelhna bangmah mukei mahleh mipite gupna ngah ding lametna ziak in Jesu tuh khailup ding in a pekhia hi. Rome mite adia gawtna thupipen a kigen tuh khros a kilhdenna ahi. Rome adia melma leh gitlouhna nasep thupipenpen semkhia mite kia huchibang in kilhden ahi uh. Himahleh, hiai hun in mohna neilou, midik sisan suah in a om hi. 

Hial mialna ahi tunia eite lak a vaihawmtu. Laigelhtu khat: “Pathian’ thangpaihna, a mite tung a lungkimlouhna leh a miten a tapa kilhden ding a a vaihawmna uh tung a lungkimlouhna taklatna ahi” a chi hi. Pathian diktat leh siangthou ahihman in, khelhna tuh a melma a suak ahi. Amah khelhna toh a omkhawm theikei himhim ahi. A haw maimah ahi. Huaiziak in, huai khelhna’ thuneihkhum a om mite tung ah i Pathian a lungkim theikei ahi. Hiai hih kivelthakna ding a thukin-leh-poimoh mahmah ahi.

Hiai bang in thukhitna i bawl nuam ahi. Hebrews 13:5 in: bangchikmah in kon dawnloukei dinga, paileng ka hon paisankei hial ding a chi ahi. Mialna nuaia omte himahlehang, a dohzou leh zahngai Pathian in hiaithu hon nutsiat ziak in i hampha uh ahi. Aman hon don, kem leh nuse ngeilou ding ahi chih tunin leng muangngam ni.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

PALM SUNDAY THUPUAK

“Tumnahte a tawi ua, a dawn ding in ava pawt ua, Hosanna, Toupa min a Israelte Kumpipa hong pai a hampha e, chi'n, a kikou ua.” Johan 12:13

Simtu itte amasa in Palm Sunday chibai.

Kum teng a i na zat Palm Sunday a hong tung nawnta. Hundang a i zat dan toh kilamdang mahmah a zat a hon ngai maimahta. Hun hoih hun manpha i neihlai a i biak a i pahtawi luat di hinapi, i hun i tha i na piaklouh tuh kisik in bang teng gen mahlehang sap kik theih ahikei.

"Toupa aw, hehpihtak in hon hondam inla. Toupa aw, hehpihtak in vangphatna hon sawl in" Sam 118:25. Kristian vualzou hinkhua a i hin theihna ding in Lai Siangthou a kibulhphuhna hoih leh diktak a poimoh pipen ahi. Hun haksa leh thuthang tuamtuam vengveng lak a, ei gingtute galvan ding tuh Lai siangthou ahihdan phok a, hiai i galvan Lai Siangthou tuh ei mah deihdan, tulai khovel thuthangte toh kithuahsak sawm a lungbuai leh ginglel hetlou a i om a poimoh mahmah hi. I Toupa Jesu Krist ngei leng Lai Siangthou a theih kia hilou in, huai ah kinga, lenkip, zahtak leh a zui gige hi. Ni 40 hial anngawl a a gilkial laitak a khemna a tuah hun in Pathian' thu omsa, a teihsa (Diut 8:3) tuh gal douna in hon zang ahi zaw. Lai Siangthou theihna leh hinpihna tuh khalam galzohna omsun ahi.

Amah i phatthei lai a phat a, Amah i biak theilai a biak luat ding ahihdan a chiang semsem. Hun manpha nei gige ding leh ut hunhun a biak theihlouh hun hong tungta a batna chiang om hi. Bangkim amah asiam vek ahihdan leh eite haksatna i tuah lelte ziak a Amah lam nga a Amah hun dang a i pahtawi theih bang in i pahtawi theilou ahih zong in, ei mimal sung a vualzoutak a lut ding in chial in, amah i lungsim, i taksa awn di'n kisa thak chiat ni.

Toupa'n nang leh kei hinkhua a a sep ut bang om ahia? Ei lam kiman leh i lungsim awn ding in kisathak chiat ni.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message I THUMNA (Our Prayer)

"Lockdown bangchi'n na zang? Nang zaw lehkha gelhna ding hun na hau dia hiai hun sung in lehkhabu leng n'on bawlkhe man kei dia maw..." a hon chihleh kum 70 vel a upa saptuam upa khat in "Tulai lehkha na hong gelh vang ngei. Ana simsim sek hi'ng a" a hon chih bang ka phawkkhia. Hiaitan thupatna dan in koih phot leng. 

Tulai a News i ngaih aleh "Coronavirus" "Covid-19" chihte thuthang laktomte a kipan news tawptan ah zak in om vek phial hi. WhatsApp, Facebook, YouTube leh a dangdangte ah leng huai thu mah i mu in i za uhi. Khovel a tokling in a patausak mahmah chih i thei vek. India huapsung en lehang patauhna uang biik in a kilang. A hi ding him leng ahi. A ziak i thei vek. 

I gam milip et in sahkho vai ah ei Jesu Khrist gingta a amah nungzuite i tawm mahmah un simtham ihi kei uh chih i muthei uhi. Pastor-te, thugentute leh laigelhmi tamtakte'n hiai hun haksa tuh ei gingtute adia Pathian sapna, thum tam semna, hinkho kibawl hoihna leh Pathian naih semna dia hun poimohtak ahi a chi ua a gendik mahmah uhi. Hiaibang ahihlai in tuni'n I THUMNA chih toh kisai gensau zek uthuai i sa.

1 Thessalonika 5:16 ah Paul in "Tawplou in thum un" chi'n gingtute ana hasuan hi. Hiai thumalte tuni'n eite'n leng za in sang in a taktak in i hinkhua ah zangkhe leng chihhuai mahmah hi. Toupa'n ei gingtute a biik in i tenna gam ah tawm chik himahlehang hiai milim bia mi tampitakte lak ah thumna thilhihtheihna langsaktu ding a hon deih hi ding in gintakhuai hi. Huaiziak in mahni masial, duh-am leh gitlouhna thilte hih a koltang nilouhlouh theite ihi nawnkei uhi. I pindan sung ua lut a Pathian' Lai Siangthou thute sim a nakpi a Toupa buan a thum ngitnget dingte i hita uhi. Huai ding in Toupa'n a hon deih a, i thumna aw ngaihkhiat a ut gige hi. Tawplou in i thum ding. 

Khovel siatna, nat-le-sat, gal-le-sa dou ding in nang-le-ken bang i hihthei ua? I hihtheih uh a tawm tel mai. Mite'n panpihna ding in sum-le-pai, vanzat leh a neih-le-lamte uh a thoh zungzung lai un nang-le-ken bang i thoh zou uale? Gen ding i neikei. Himahleh lungneu tuan samkei ni. I THUMNA in thil ahihthei hi. Thum ni, thum zom ni, tawplou in thum ni. Huai tuh Pathian i muan ngamna kilatna ahi. Ama'n hun a sak chiang in i thumnate uh a hon dawng ding a dam leh bit in suahtakna hon tun ding hi. 

Thupatna a i zat "Lehkha gelh" thupen Toupa'n pha a sak a, thugelh tungtawn a a thu puangzak zel dia a hon deih aleh i gelh tou zelzel ding. Hon simsaktute tung ah kipahna thu ka gen sengkei chih toh zohna i bawl ding.

Thumna a kibulphuh semsem gingtu hi ding in Toupa'n hon vualzawl hen.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

TULLOU TOUPA ITNA

Covid-19 ziak in khovel a kitoklel a, mihingte hon beidong sak mahmah hi. Gingtu hihman a natna in hon pel ding i sak leh a theikhial i hi ding uhi. Himahleh, hiai natna in hon netum ding ahi chi hileh kilawmtak a mawk patauh ding leng ahi tuankei ahi. I lungneudan uleh lauhthawng baih dan ua kipan in, Pathian muang tatak mah i hi uh chih ngamhuai ka saklouh ton a om. Bangteng hileh, hiai bang hun haksa a Pathian in a mite hon taisan, hon nungngatsan hita hiam, a thangpaihna eite tung a sunbuak a om hita hiam chih khak theih hi.

Huan, hiai bang natna leh gimthuakna in hon neh semsem lai ding ahihman in tu hun tuh Toupa aw ngaikhia a, A itna thute sut vengveng na dia hun manpha ahikha moh kei ding hi. 

Hosea 11 ah haksatna leh gimthuakna hun in leng Pathian itna daituanlou ahihdan a muhtheih hi. Israelte’n Toupa itna thu a ngeingaihkei ua, Aigupta akipan in Toupa’n a banthahat in pikhe mahleh, a sap chiang in gamlat semsem in, a sapna aw a limsak kei uhi (v. 1-4). Thamlou in Baal milim pathian bia in, A itna aw nem a ngaikhe utkei uhi. Huaiziak in, Pathian' vaihawmna a tung uah hong tung in, midang khut a saltang in a hong omta uhi (v. 5-7).

Himahleh, Pathian in a mite a itna tullou ahihman in, a hondam veve chih v. 8-11 kikal ah muhtheih hi. Hiai hih Pathian lungput, gamtatdan ahi gige hi. 

Haksatna Nam vai ah i nei ua, khotang leh pawlpi vai ah hong om in, tulel in leng Covid-19 natna ziak in saltang bangmai in i om uhi. Himahleh, Toupa'n hiai a koltang den ding in a hon nusekei ding chih muangngam ni. Muanhuai Pathian in a itte hon taisanlou ahihman in, huai a itna theisiam mahmah le hang uthuai hi. Haksatna, natna leh buaina hong tungte, a itna i theihsiam semsemna ding ua hon tunsak hizaw kha ding ahi chih phawk ni. A itna thute sui a, tulel a i tuah uh haksatna, natna leh buainate tunglampek ah Pathian itna phawk a, Amah bia a, pahtawina pe semsem ding in i vek un hon ompih chiatta hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | DEIHTELNA DEIHHUAI

A masa in simtute na vek un Jesu min in chibai ka hon buk hi. 

Mihing adia deihtel ding a omden hi. Khenkhat a thupi deuh bang, a hou deuh bang, a nuam deuh leh a haksa deuh chihte. I niteng hinkhua ua thiltuah ahihman in hiaite ah deihtelna dik neihlouh khak ding a lauhuai mahmah leh deihhuailou ahi. Himahleh, deihtelna deihhuai na telkhak leh na hampha ding ahi. 

Jeremia 7:23 in "Ka aw ngaikhia unla, na Pathian uh ka hi ding a, nou leng ka mite na hi ding uh; na hoih theihna ding un na omdan ding uh ka hon hilh tengteng zui un, chi'n thu ka pe zaw hi" a chi hi. Sam 37:5 in leng "Na omdan ding Toupa tung ah nga vek in" a chi hi. Toupa aw ngaihkhiat ding, leh amah a kingakna poimoh dan a hon sinsak hi. 

Khovel huih in a mutna lamlam a awn a, thupukna bawl leh kiphumlut khak chiang in deihtelna hon sukha mahmah hi. Hoih deih na pi hoihlou a puk, hoih ut mahle hoih suang theilou a omna tuh hun tamzaw a deihtelna telkhelh ziak ahi nuam mahmah hi.

Deihtelna deihhuai tuh Pathian deihdan ngaikhia a, amah a kinga a, ama thu toh kituak a deihtelna ahi. Huai ding in mihing sang a lauhuaizaw Pathian om ahi chih phawk a, thunuailuttak a om ding ahi.

A chihleh unaute, i deihtelna uh bang in hon thuzoh pen in i kithei uh!

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | KEI LEH KA INNKUANTE’N

“…kei leh ka innkuante’n zaw Toupa nna ahi ka sep sin uh…” ~ Joshua 24:15

Siatna i chih in zaw hunta heh chih omsak hetlou in, innkuan kituakte sukpuk didan leh a kituakloute le kituaklou zaw sem hi ding in siatna in a hong maingal mahmah hi. Hiai bang hun i tuah touh lai in, Innkuan maikaitu hi dia Pathian vualzawlna tang Nu leh pate’n bang chibang in pan i la uale ? 

Joshua in Israel mipite kiang a “kua nna sem ding na hi ua” chi a chouna nasatak a bawl a, tua toh kiton in ama'n a thupukna hon puang khia “…kei leh ka innkuante’n zaw Toupa nna ahi ka sep sin uh…” (Joshua 24:15)

Hiai bible taang a thupi ka na sak mahmah tuh “Kei” chihtan in a khawlkei. A innkuante “…ka innkuante’n zaw” Kei leh ka innkuante’n Toupa nna kia ka sem ding uh chi phiu-phiau hi. A innkuante’n zil mahmah lou bang ana hile uh bel “ken tuh Toupa’ nna ka sem dia, ka sungte’n zaw ka theikei. Amau deihtelna bang bang hi mai. Pa pen hilele hiaite ki force theih chi hilou ahih chiah." Ahihlouhtawp in “Ka innkuante’n” chih thumal kamteh vetlou in amah “kei” chih tan ah tawp di’n a gintakhuai hi. A innkuante makaih zoulou, ahihkeileh, a zi-le-tate’n zil mah mah lou uh hileh biakna bang ngai poimohlou, inn a ki-om hiu-hiau hile uh Pathian nnasem (tulai hun a di’n, Saptuam nnasem) a kichih in gen a nei diam? 

Joshua lohchinna thuguk  tuh a innkuante ahi uh. Innkuan a a pankhawm ziak uh ahi. Innsung a mohpuakna Nu leh Pate a kia ahikei, Nu leh Pa mite zahtak theih dia bawltu tate mawhpuak ahihban ah Tate zahtheih dia om theihna di’n  Nu leh Pate’n Pathian thu a tate etkhol ding ahi. Pathian nnasepna khat peuh ah Joshua bang a i innkuante gentel ngam Pa hi di’n kisa thak ni uh.

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message VANTE'N PATHIAN THUPINA A PHUANGKHIA

VANTE'N PATHIAN THUPINA A PHUANGKHIA
(The Heavens Declare The Glory of God)

"Nang bang kua dang omlou hi,
Simlei leh Thangvan ah zong;
Thupina vaihawmna khempeuh,
Tangtawn in nang a ahi."

Mihingte'n Pathian hihna, hatna leh thupinate ngaihtuah-tuah in sut ngitnget nilouh sawm lehang leng i sut seng un i ngaihtuah sengkei ding uhi. A thilsiamte tungtawn in Pathian in a thupina a puang hi. Toupa'n thupia in vante a siam a; ni, kha leh aksite a thu in a siam hi. Hiai thilsiamte thupi mahmah ahihlai nangawn in ei mihing thupina hon khum zoulou uhi.

Thilsiam dangteng Pathian in "Om hen" a chihleh hong om ahi ua, himahleh ei mihingte bel Pathian in a khut mahmah a leivui la in lim-le-mel nei ding in hon siam hi. Huan, Toupa Pathian in i nakvangte ah hinna hu a khah lut a; huchi'n tangtawn a hing ding mihing i hong hita hi. Kia thamlou in eite tuipi a ngasate tung ah, tung a leng vasate tung ah, gan tung ah, leitung tengteng tung ah thu nei ding in a hon bawl lailai hi.

Tutung Imphal a kipat Delhi zuan a Lenna a ka lenlai un tangsang taktakte etlawmna ka musuah thak a, meipi dum kikiai etlawmnate'n Pathian thupina ka lungsim ah a phuang thakthak uhi. Huaite etlawmna behlaptu ding in ka gallam uah Lenna dang nih-le-thum hong leng cheichei uhi. Etlawm himai!

"Vante'n Pathian thupidan a theisak ua; huihkhua lian tak in a khutsuak a sulang hi." Sam:19:1

Huchihlai in thilsiam etlawm leh thupi taktakte sangmah in Pathian lim-le-mel sun a siam a om ei mihingte thupi zawk dan ka phawk suah hi.

Huan, khial leh mangthang mai ding i hihlai nangawn ua Jesu Khrist tungtawn a zonsuah i hihdante ka phawk a huai in khamuanna hon guan hi.

Simtu ittak, tuni'n Vanlam na daktou a, Van dum kikeite na muh hun in, na vei-le-tak na en a sing leh louhing etlawm mahmahte na muh hun in, huaite tengteng sang a thupi zaw, etlawm zaw leh it zawk a om na hihdan kiphawk inla na hinkhua ah Pathian' thupina puangkhiat sawm in.

Toupa'n hon vualzawl hen.

______________________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | DUH-AMNA A PHATUAMKEI

Simtute na vek uh itna chibai! Toupa a hoih a, khathak ah hon pi galkaita a, amin i phat uh ahi.

I tenna khovel uh hih duh-amna a dim ahi. Mahni tantawk a lungkim zohlouhna khovel, mahni a ding kia en a midang a ding ensamlou mite chettheihna gam ahi. Mahni a ding hilou pipi leng mahni a hihsak siamsiam a pil leh fel a ngaihtuahna, tung etna leh pahtawina a tanna hun uh ahi. Mimal kia hilou a, nam leh pawlpi sung tanpha a leng ki-versus utna gahkhesaksak mi leh namte i hi uhi. Hiaite tengteng duh-amna gah ahi i chilou theikei uh ahi.

Huaiziak in Jesu'n: "Mi'n khovel a pum in nei hen la, a hinna tan zel leh, amah a ding in bang a phatuam dia? Ahihkeileh, mi'n a hin sik in bang a pe thei a?"Mat. 16:26.

Jesu Khrist nungzui ka hi kichi kawmkawm a hiai bang a i om ziak un, tangtung a khawnvaak lohpi a khuh toh kibang i hi uhi, phatuam lou leh gahneilou chihna himai ahi.

Unaute, thilhoih bang a kilang himahleh a phatuamlou pipi buaipih in hun i zangliamliam maimah uh ahikha ding chih lauhuai ka sa ahi. Nungzui diktak leh a phatuam nna sem hi ding in a phatuamlou duh-amna lungtang nusia in, a phatuam ding nna sem ding in kipanthak ni. Huai ding in Toupa'n hon makaih tawntung hen.
__________________________
©ReACH:GWM-3E/02
ReACH:Gospel Writing Ministry kichi December 19, 2017 a patkhiat ahi. Hiai _Ministry_ in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message BA-AL HIHCHIM NI

Ba-al Hihchim Ni
Amasa in January kha adia thohnawnni nanung tan hon pi i biak Pathian min i phat hi. Kal paisa in “Toupa Toh Tonkhawm" chih i sim ua, tuni'n Toupa toh tonkhawm i hihtheihna ding a bangteng toh amah zuih sawm ihi uhiam? chih dotna kidong kawm in Amah toh i tonkhawm theihna ding a poimoh tamlou sim khawm leng ut huai i sa hi.

 “Isrealte’n TOUPA’ mitmuh a thil hoihlou ahih nawn ua, huchi in kum sagih sung Midiante’n atung uah vai a hawm uhi” - Vaihawmte 6:1

I society ah haksatna bangzah vei i tuak ua? I society gentaklouh i saptuam sung uah le? Gitlouhna, diktatlouhna, kiletsakna, kineksiatna, kiniamkhiak utlouhna leh Pathian theiloumite bang mai a omna, mahni deihdan a pai luatnate Toupa mitmuh in thil kihhuai tak ahi hi.

Saltanna ziak a gimthuakna thuak Isreal-te'n Toupa a hon samta ua, Toupa’n Gibeon kiang ah “Na pa neih Ba-al’ maitam hihchim in" achi hi. I saptuam, i Society leh minam i dam a, i khantouhna ding in mimal chiat in i ba-al limte uh i hihchip ding uh ahi. Huai milim biakna i tawpsan masiah Lau khasiangthou i lak uah a tel theikei hi.

Kigensiatnate, muhdahnate, mi siatna ding a a guk a bawlte, kiletsakna, mohpuakna a hoihlou lam a deih tuntunnate paihkhia a Toupa lam i ngat uh a kul hi. Hiai ba-al khelhna sal a hon pitu pen i hihchip uh a hun lawta hi.

Gibeon tungtawn a Toupa’n Isreal a tun ding nawn bang in i saptuam, i society leh i minam tungding ding in nang-le-kei Toupa'n a hon deih hi. Huaiziak in i mimal hinkhua a ba-al omte hihchim in khalam a liamna thuakte i domkang ding uhi.

______________________
©ReACH:GWM-3E/01
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | TOUPA TOH TONKHAWM

Mihingte ni-le-kha sim dan ah kum 2020 kha masa ah i ding uhi. Hiai kum i galkaina ding un kha tampi, ni tampi mahmah i neilai uhi. Hiai hunte bangchi'n i paltou dia chih i theikei; nopna, kipahna, lungkhamna ahihkeileh sihnate tanpha toh i paltoukha maithei. Bangteng hileh i maituah ding theilou i hihna uah i tuahtuah, i phutphut, i palpal Toupa toh phu a, pal a, Toupa toh tonkhawm ngitnget ding deihhuai i sa hi. 

Toupa toh i tonkhawm theihna ding un a thu Lai Siangthou a i kibulphuh masak uh ngai hi. 

 2 Timothi 3:16 ah "Laisiangthou peuhmah Pathian hatkhum a piak ahi a; huaziak in, thuhilhna ding bang, taihilhna ding bang, bawlhoihna ding bang, diktatna lam a kichilna ding bang in a phatuam hi." chih i mu hi. 

Khovel ah mi khenkhatte'n nuamsa law zawzen in Toupa toh tonkhawm lou in mahni ut dandan in hinkhua a zang ua, a khente lah hinkhua haksa sa lua in mahni kibawlsia in om ua, Pathian a ginna nei zoulou in lam-et bei hial in kikoih uhi. 

Tuni'n a nuam pen leh a haksa pen a Toupa deihna bang hihiam chih i theihsiam theihna ding un i Lai Siangthou in bang hon hilh a, bang hon sinsak hiam chih i theih uh poimoh hi. Tua ding in Lai Siangthou tungtawn in Toupa' aw ngaikhe ni in, thumna tungtawn in amah houpih ni. Huai hileh Toupa toh tonkhawm i hi ding uhi. 

Simtute, Sunday biakna hun zat nuam. Toupa'n hon vualzawl hen. 

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Sunday Message | THUMANNA

“Thumanna” toh kisai a lungsim a mangtheilou tuh Ephesa 6:1-3 ahi: “Naupangte aw, Toupa ah, na nute uleh na pate uh thu mang un: huai tuh thil dik ahi ngal a. Na nu leh na pa zahtak in, (hiai tuh thupiak chiam nei masapen a hi); huchi in nang a ding in a hoih dia, lei ah leng na damsawt ding hi.” Hiai Laisiangthou naupangchik akipan etlouh a theih ding a kisinsak na mah hang a, nak manphatlua ahi chih phawk thakthak in a om ahi.

Paul in Jesu Khrist thumanna gah bang hihiam chih Romans 5:19 ah ana gelh hi. Pathian’ vaihawmna mai a dik leh siamtang a omtheihna ding in mi khat (huai tuh Jesu Khrist) thumanna ziak ahi a chi ahi. 

Huai omdan ahihleh, mi masa Adam thumanlouh ziak in ana khialta hi. Huai khelhna ziak in Pathian toh kizopna sattan in a omta ahi. Huaiziak in, Pathian’ mai a siamtang a omtheihna ding in mihing lam ah panlak tumsek mah le hang, a zungpi a kibat khalou ihihman un, ngaihdamna ding a pomtak bangmah omkhalou hi.

Jesu Khrist thumanna tuh huchibang a eite na hoih sep ziak ahikei hi. Huan, Jesu Khrist leh eite thumanna kigawm leng ahikei. Jesu Khrist in Pathian dan/ thupiak a zuihna ziak liauliau in midangte a ding in siamtanna a tunta chih ahizaw hi. Ama’ thumanna gah in nang leh kei hon hondamta chih phawk thak ni. Huaimah tuh Paul in “…mi khat thumanna ziak in mi tampi mi diktat a bawl ahi ding uhi” a chih ahi.

Jesu Khrist thumanna hinkhua enton in eite’n leng midangte adia vualzawlna tuntu hithi i hi chih phawk chiat ni. Toupa’n huai ding in hon vualzawl chiat hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

New Year 2020 Message | TOUPA KIPAHLAM ZONG NI

Mual in a hon liah ziak a khua kimulou, himahleh naikhah a om hingal zuan a pai toh kibang in, kum 2019 ni nanung ah i ding uhi. Huchi in, mual i suah toh kiton in khua kilawmtak hong dok bang in kum 2020 Toupa’n hon musakta hi, Halleluiah!! Huai ahihtoh kiton in simtute na vek un kumthak chibai ka hon buk hi.

Paul in Ephesate 5:10 ah “Toupa kipahna lamtak bang a hi hiam zong un” a chih bang in, tu kumbul, dakkal masa a i din lai un huai ding in i kichial uh ahi. Sa a hing eite a ding in huai zong masalou in, mahni utna leh deihzawng lunggulh a baihlam mahmah mai hi. Lohchinna i kideihsak ua, hamphatna/ vualzawlna pha i kideihsak uh ahi. Thamlou in, damtheihna, mavanna, leh a dangdang. Huaite tengteng leng a hoih vek ahi uh ahi. 

Himahleh, huaite Pathian’ deihlam ahina uhiam chih phawk a ngai ahi. John 4:34 ah Jesu’n tuh “Hon sawltu deihlam hih ding tuh ka kipahna/ nopsaklam ahi” a chi ahi. Hiai ah Jesu Khrist thumanna hinkhua a muhtheih ahi. Aman tuh a sawltu thupiak zuih nuamsa, kipahna a sim ahi chih a kimu ahi. Huaiziak in thumanna hinkhua tuh eite a hileh chih uthuai i sa petmah uh ahi. Ban ah, Toupa phat a pahtawina piak ding tuh a hon deihlam ahi. Psalm 103:21 in “…a deihlam hih a nasemte aw, TOUPA tuh phat un” a chihman in. Huaiziak in Toupa phatna kum hi sak ding in i kichial ahi. A nuam ah, haksat hun ah, hihtheihna neihlou bang a kilat hun in leng Amah phat ni.

__________

©ReACH:GWM-3E/02

ReACH: Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com/