Sunday Message | VAIHAWMNA DIK

“Mi chih a tung ua vaihawmte thuthu in om heh. Pathian thu lou in kuamah vaihawm a om ngal kei ua; vaihawm mi a omte Pathian seh ahi uh” – Rom. 13:1

Vaihawmna kichi thil poimoh mahmah khat ahi. Saptuam leh khotang ah hitaleh, innkuan, gam leh nam vai ah vaihawmtu a om vek ahi. Huan, vaihawmtu tam mahleh vaihawmtu tengteng in phat a lohvek kei uhi. Khenkhatte mipi toh tonkhawm thei deuh bang, mipi lam nga leh vaisaina a mipi zuihsiam deuh a om uhi. Huan, pawlkhatte ahihleh dik leh tang ahihnak leh mipi lam nga seselou in vaihawm leng a om uhi. Vaihawmtu’ vaihawmdan ah a uk khum mipi khantouhna kinga lian mahmah mai hi.

Vaihawmna toh kisai in, vaihawmtu hoihlou a hong om chiang in Pathian hon piak ahi chih valh a haksa mahmah mai hi. Laisiangthou bang ah Israelte tung ah Pathian neilou nam akipan kumpi a hong dinkhiat ton om hi. Assyria-te, Ammon-te, Amelek-te, Babylon-te, Persia-te leh a dangdang-te’n Israel namte thuneihkhum uhi. Huchibang hun ah vaihawmtu thuthu a om ding chih pomsiam haksat chi mahmah mai hi. India gam sung kivaihawmna vai bang en le hang, eilak ah zaw pawlmin hilou a mimal a kinga ahi chi in Thanlon, Lamka leh Henglep ah milembete tawsawn pawlmin i telching ua, Singngat bial lamte’n leng amaute pawl mah diksa in a zom lai hi. I tulel dinmun uh tuh milembete nuai a om i hi uh chihna a suak hi. Huchibangte Pathian in vaihawmtu thunuai ah om um hon chih bang a, eite adia vaihawmtu dik mah ahi ding uam?

Hiai dinmun a i omlai un, saptuam kivaihawmna bang leng etkikna ding tampi a om ding hi. Eimite lak a pawlpi gintakhuai leh khentuamna omloupen ding a lamet Saptuam ahi. Huan, Saptuam kivaihawmna Laisiangthou toh kituakpen Upate vaihawmna (Presbyterian paidan) ahi chih i haihkei uh. Huaiziak in, vai hon hawmsaktu ding in mipite’n Upa i zong ua, thaunilhna piak ding in vote in i telkhia uhi. Amaute’ vaihawmna a dik pen hia? chih kidong le hang, dawnna zakkik tengteng in “HI” a chi vek na diam! 

Bangteng hileh, Pathian in vaihawmtu thuthu a om ding a chih phawk ni. Huan, vaihawmte thuthu a om kawmkawm in ginna hon sukha thilte ah bel ginna len a dingkip ding in hon lam en hi. Pathian loungal vaihawmtu dik a omkei ahi. Amah ah dingkip peuh le hang aman a huntak ah vaihawmna dik hon tungding ding hi.  

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawntuah ding lunggulhpen in nei hi. https://reachgwm.blogspot.com/

Easter Sunday Message | SIHNA ZOU IN JESU THOUKIK

Toupa Jesu’ nasep tampite lak ah ei gingtute adi’n a sihna leh a thohkikna sang a manphazaw om di’n ka ngaihtuahkei hi. Khovel khangthu ah, midang hinna ding a si tampi omkha ding hi. Himahleh, Amah i Toupa Jesu Khrist kia sihna tungtawn in tangtawn hihna kingah thei phet hi (A gingtate’ adi’n ahi tuan se).

Bishop Westcott in “Toupa Jesu thohkikna sang a thu kichian zaw leitung khangthu om omlou hi.” Leitung khua vannuai a, sahkhua tampi om a, pathian-te tampi om mahleh Khristiante’ Pathian kia thoukik a, sakhua dangte pathian-te thoukik omlou hi. Jesu Khrist thohkikna ziak in mihingte’n suahtakna i nei thei uhi. Aman mihingte hon itna ziakin, mualphou leh zahlaktak in hong si a, han ah vui in om a, sihna zou in Ni thum ni in thoukik hi. A thohkik nung in leng, ni 40 sung vingveng leitung ah, mitamtak kiang ah kilak hi. Hiai thohkikna in tangtawn gawtna mun tung ding hong hon khia hi. Khrist thohkikna omlou hileh, i khelhna ua om nilouh lai dingte i hi ua, i thugin uh leng zuau suak ding hi. Thohkikna gingta a, i khelhna a om nilouh lai i hih in tuh, thohkikna ei adi’n bangmah a phatuamlou chihna a suak hi. 

Theologian minthang Michael Green in “Jesu thohkikna pen Khristian biakna kingakna ahi a, hiai thu zuau ahihmawk leh bel Khristian biakna bei ding hi” ana chi hi. A gen bang in, Jesu Khrist ni thum ni in vualzoutak in thoukik a, huai thohkikna gingtate i hihman un, Amah biaktak leh phattak taktak mah ahihdan i phok thak a, i hinkhua a khelhna vualzohsak nawnlouh ding ahi. Jesu Khrist ziak in sihnung lametna i neita uhi. “Huan, Pathian in amah a kaithounawn hi, sihna gimthuakna hihbei in, sihna adia mat a letdet theihvual ahihlouh man in.” Jesu thohkikna in tangtawn hinna, khamuanna kiching hon pia hi. Vualleltak in khros ah si bang mahleh, Satan thuneihna tengteng zou a, khelhna apan Aman a mite hondam hi. Pathian mun bawlsa tangtawn mun na tung na di'n, sihna na chet kul hi. Huaiziak in, Toupa’n simtute hon ompih in, huai mun tungthei di’n hon pi denta hen.

__________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantohtuah ding lunggulhpen in nei hi. (https://reachgwm.blogspot.com/)

Good Friday Message | KHROS TOH KINAI, KHRIST TOH KIGAMLA

“So near to the Cross, but so far from Christ”

Khros a i Toupa Jesu Khrist khaikang leh kilhden a a omlai in, a kiang nai penpen a omte Rome sepaihte ahi uhi. Amaute’n i Toupa gawt in nakpitak in bawlgenthei uhi. Khros ah Amah toh kinai om penpente himahle uh, Amah toh kigamla penpente a suak uhi. Jesu Khrist tuh amaute adia hondampa, Pathian hing tapa ahihlam theichian zok kei uhi.

I Khristian hinkhua uh kivelkik chiat le hang, hihtheih khamkham suah in gingtu hinkhua zang ka hi i kichi uh ahimaithei hi. Ahihhang in, hun tamtak ah Rome sepaihte toh i kikhiatna uh om in na mu hia? A khenchia amaute sang mah a leng khawkzaw i bat hun uh om bang ka sa hi. Rome sepaihte bang a Pathian’ Tapa ahihlam theichianlou, ahihkei leh, theichian nuamlou i hizaw uhiam chih i hinkhua zatdan ua kipan tamveipi ka kidong hi. I hunzatdan uh enthak le, Amah i biak theihna ding mun, biakinn, lah tam deuhdeuh, himahleh a kikhom ding mi tawm hiaihiai; Amah biak ding ahi chih thei napi a biak sawmlou bang tampi Khristian kichi minpu a tam lawta hi. Gingtu diktak ka hi i chihleh, i hunzatdante uh enchian thak in kibawldik thak sawm chiat ni.

Huan, a poi mahmah ahihleh; hun tampi ah khelhna leng khelhna a sim nawnlou i hi ding uam chihtheihna om hi. Khial ka hi chih kithei gegu a leng kisikna sang a mahni kisiamtanna ding zong teitei. Kisik a Pathian ma a kilanthak sek, himahleh a ging toh beikhawm. Hihkhelh om chiang a kingainiam leh kisikna taktak toh ngaihdam nget sang a kisiamtanna ding leh a mawh khuklouh hamhamna ding lampi zong teitei.

_________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. (https://reachgwm.blogspot.com/)

Palm Sunday Message | KUMPIPA A HONG PAI

Kumpi kichi a lalgam sung a vaihawmna tungnungpen tawi, thutawp gentu leh, a mite hoihna ding khualna toh vaihawmtu ahi. Kumpite’ vaihawm hunlai in, kumpi hoih in gamsung a ding in thilhoih a tun a, kumpi hoihlou in haksatna a tun hi. Tulai in bel makai/ kumpi hih ding bangleng uthuailou a batna chiang om hi. A mohpuakna uh lianlua ahihman in, nengchik a sukkhelh uleh nasatak a dem hi pah chetchet mai uhi. Himahleh, thuneihna tawi nak nop lawtel ahi ngei dia, Tamil Nadu a (L) Ms. Jayalalitha sih nung in, a constituency a by-election om ah candidate 82 tak a pha tazen uhi.

Tanchinhoih a kimu bang in, Israelte’n “Kumpipa Hong Pai” a chih lai un bang chi bang kumpi lamen hi ding un i ging ua? Israelte dinmun, huai hunlai in, dengdel mahmah leh beidotna thupitak a tuah laitak uh ahi. Rome kumpite’n a lalgam uh a laksak ziak un, suahtakna, kivaihawmna tuam chihte nasatak in a lamen ua, amaute huaitan tunpih ding kumpi a poimoh mahmah uhi. Alehlam tak ah, vaihawmtute tung a hel/ kiphin peuhmah Rome vaihawmtute’n a soisa un, a hawldalh ua, thah ding tanpha in thu a kipia uhi. Huchih laitak a kumpi hong pai tuh Israel lalgam tungding thak ding a thuneihna lianpen tawi ahihngei lamen ua, Jerusalem khua a hong lut chiang in “HOSANNA” chi in ana kikou khum zuazua uhi. 

Himahleh, amah tuh khovel kumpi bang a hong pai ahihlouhman in tamtakte lametna a thawn a suak hi. Ahihhang in, i Laisiangthou hon sinsakna bang in HOSANNA chia kikou ding ziak uh tuh: Jesu tuh Toupa ahihman in ahi; Jesu tuh Messiah ahihman in ahi; Jesu tuh Kumpipa ahihman in ahizaw hi (Matthew 21:1-11).

HOSANNA kichi tuh “tu in hon hondam in” chihna ahi. Sam 118 a kimu bang in, Judate’n Paikan Annkuang umkhawm hun chiang un “David Tapa kiang ah Hosanna: Toupa min a hong pai tuh a hampha hi, tungnungpen ah Hosanna” chi in, a kikou uhi. Pathian in Kumpi David kiang a ana kamchiam bang in, a khanggui akipan Messiah piang ding ahi chih phawk kawm in David Tapa chi in a kikouta uhi. Pathian thuchiam kikhellou, danglam ngeilou ahihman in amaute’n huai David Tapa kiang ah hondam ding in ana chial uhi.

Nang-leh-ke’n leng Kumpipa Hong Pai tuh HOSANNA, tungnungpen ah chi a muak in kikou zuazua ni.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulhpen in nei hi. https://reachgwm.blogspot.com/

Sunday Message | A DOUBLE IN SETAN VUALZOUSAK KEN (Let not the Devil have a Double Victory)

I hinkhua ah bang haksatna i tuak a? Bang a Pathian toh hon kigamlasak? Bangziak a Biakinn kai peihlou hial i hiale? Na zi ahihkeh na pasal gitnatlouh ziak hia? Na tate thumanlouh ziak hizaw? Tuni'n hiai dotnate lungsim a koih kawmkawm in i simsuak himhim uh awle. 

"Ka pa'n Cancer natna nei ahi chih ka theihsang in ka naupa No.4 addict ahi chih ka theih in ka lung a khamzaw. Ka mualphoupih ua, ka gentheihpih mahmah uh. Kholak a mat a, a hong om chiang in "brother of" chi'n a gelh ua ka min uh Newspaper ah a tuangkhawm mun mahmah. Mak ka sa a lamdang le ka sa. Ka pa min gelh uh henla ka pa minsesak zawle uh ka chihna bel ahikei; himahleh mi dangte min gelh ahihchiang a "son of" chih kigelhsek ahihman in. Ka zum toh, ka mualphou toh Pathian' thu gen tawpsan hithet mai ka hi. A ziak tuh innsung a vuallel ka hih ziak in. Huai hunlaitak in ka saptuam ua Executive Secretary lenlel leng ka hi. Huchibang a hun haksatak a ka om sawt sim nung in Unaunu Liankhoman ka inn uah hong vak lut a, 'Tulai bangchi na? Na min lah kizakha nawnlou, Crusade leh Camp ah thu a gen chihle kitheikha nawnlou? Bangchi mahmah na hia?' chi'n hon dong hi. Ka dawng a, 'Man, ka tanchin uh zakhalou na hihiam, Newspaper ah ka min uh a tuang gige voi. Hiaibangteng a hih nung a ke'n Pulpit a bang thu gen lailai ding ka hia?' chi'n ka na dawng hi. A hon dawng a, 'Na kiang ah thil nih kia ka hong gen ding; khatna ah - Nang nau hoihlouh ziak a mita hoih utlaite hilh ut nawnlou na hihleh mahni masialna chikhat himailou maw?' hon chi hi. Dik ka sa a himahleh a hon zouzoukei. A hon genzom a, 'Nihna ah - Setan kiang ah vualzohna double na piak hilou hiam? Amasa in na nau a zou a tu'n nang hon zou a... Setan kiang a galzohna a double na piak ahi' chi'n hon gen hi. Hiai a gen nanung in hon zou mahmah a Setan tung ah k'ong heh mahmah hi. Huchi'n 'Setan kei na hon zou nawnkei ding, kipan nawn ding ka hi. Ka nau leng na  tang tuankei ding' chi a ka hong kipat nawnleh tutan in ka pang zou nalai ka hi" chih thu Rev. Dr. Kh. Khaizakham in a gen ka zak in ka lungtang a hon zou mahmah a, Pathian adia mi hangsang ahihdan muchian semsem in ka ngai thupi deuhdeuhta mai hi.

I lungkiat dimdemnate, i thadah lohhialnate tuni'n ngaihtuah le Setan gualzohna ziak a hong kipan ngen ahi chih i muchian ding. Huchihlai in huai Setan gualzohnate ziak a ei mahni hinkhua nangawn zoh a, a hong om nawnleh huai tuh Setan in a double a vualzohna tangta chihna suak hi.

Simtute, tuni'n Rev. Dr. Kh. Khaizakham bang in vualzohna himhim Setan tangsak nawnlou a Pathian hatna ngei suang a dingkhe ngam ding in i kichial ahi. Laisiangthou in Romte:8:31 ah "...Pathian ei lam a a pan leh kua'n ahia hon dou thei ding?" chi hi. Setan galsat ding in dingkhe phot peuhmah lehang Pathian tuh ei lam ah a pang dia vualzohna a hon ngahpih ngei ding hi. 

Toupa'n hon vualzawl chiatta hen aw. Amen

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com/