Sunday Message | THE LEAST OF THESE (A Neupente Lak A Khat)

A hinglai hilhial a hallup a om Australian Christian missionary Graham Staines leh a ta pasal nihte Philip leh Timothy tanchin pansan a kibawl movie The Least Of These kichi ka et in lungsim hon khoih mahmah mai. Mite'n hichituk a Pathian' adia ana thuak uh eive maw chih lungsim ah hong thak mahmah. Et ngeingei ding movie ahi chih k'on behlap ding. 

Laisiangthou Matthai 25:40 ah "Kumpipa'n, chihtaktak in k'on hilh ahi, 'Hiai ka unaute lak a neupente lak a khat tung a na hih uh tuh ka tung a hih na hi uh', chi'n a dawng hi." 

"Pathian nna sem di'n ka naupang lawlai, lehkha simlai ka hi ka sem mankei, sepna hoihtak kinei masa henla huaizoh chiang in theihtawp in kisem panleh. Tuailai vai a kihel ding mi a tam lua uh, kua'n hon phawkkha tuanke'nteh. Khotang nopni-dahni vai a i nu-le-pate a kihel ualeh hun himai....bla bla bla" chi in paulap ding zongzong, phattuam ngaihna leh awlmohna neikha himhim lou in mahni hinkhua kia nopsakna dia hun zang Tuailai tamkhop ki-om hi. Huchihlai in Tuailai kizen taktak biakna limsak, phatuamngaihna hau leh chipih-sapihte itna toh hinna humbitna dia Damdawi-innte tanpha a sisan va pe zel tamkhop le ki-om mahmah ahihman in amaute genmaihkhak ding ka utkei. Hiaibang ahihlai in Tuailai, tuni'n nang koipen ah na telkha ale? 

Missionary hangsantak Graham Staines-te innkuan bang in gamlapi ah Pathian' nna sem ding in i va kalsuan zoukei maithei. Himahleh i tutmun ah ama nna i septheih ding Toupa'n hon pia ahi. Huaite i gensengkei ding, a ziak tuh i dinmun leh hihna zil in septheih tuam chiat kinei ahihman in. A khenchiang in huaite tuh thil thupitak in a kilang gige kei dia hou chik leh a neu luat ziak a kuamah theihtham hilou a a kilat hun le a omtham ding hi. Huai hun chiang nangawn in The Least Of These chih thumal i mangngilhkei ding uh. Huchi'n thanuamtak in i sep ding uh sem in i hih ding uh hih zel ni. Huai tuh Kumpipa tung a thil thupitak hih ana kihi gige chihna ahi. 

Toupa'n hon vualzawl hen. Amen

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com/

Sunday Message | NA THUMNA

“Noulak a pa pen, a ta in tanghou phel ngenleh, kuan ahia suang pe ding? Ahihleh, nga ngenleh, kuan ahia nga sik a gul pe ding? Ahihleh, aktui ngenleh, aikam a pe dia hia? Huchi'n, nou migilou in bawn noumau tate thilhoih piakna dan na theih uleh, na Pa uh van a om in a ngente Kha Siangthou pe natel in chia”

Thumna i neih ngalleh i thumna dawnna kithei pah henla kilohching leh chih kuapeuh in kilunggulh chiat hi. Bangziak a thumna kilohching theilou ade aw? Mitampite'n ka thumna Pathian in hon dawng a, ka thumna ka lohching chi a Pathian kiang a kipahthu a gen sek lai ua ei thumna bang dia lohching lou tuam ade aw? Jesu’n “Nou zaw na thum chiang un inndan sung a lut in kong kikhak khum un - a sim a na nget uh na Pa un a langtang in hong pe ding” a chih bang a gen nopna a de aw? Mi muh a thumna neih hetlouh ding a chihna a hitel dia hia? Mi muh a thum louh ding chih na hipahlouh in, mite muh leh theih utna lel toh thumna hun zat louh ding. Pathian leh nang kal kizawpna hoihtak nei a thum ding. Nang polam thildang toh na kisukbuai louh ding gen ut hi zaw hi. Mi dang leh thildangte sang in nang ki-en chian masa zaw in.

Ann ngawl thumna i chih sek pen leng kiphutluih thoh sim pian sang in ei salam poimohte a kibuaisak lou leh mangngilh khop in, i thumna ah lunglut in chihtaktak in thum in, ann nek ding bang mangngilh kha, kikhel kha zezen chihte hileh bang achi zaw di? Ann ngawl thumna program bawl pen gensia hilou in a lohchin ding deihlua ka hi zaw. I nget ma a leng Pathian in i nget sawm pen uh na theikhin ahihleh i thil nget sawm pen sang in ei a ngen dia kisate lungsim leh khohei dan pen pilvan huai zaw chihna hi veh aw maw. 

Huan, mahni mahmah in kul ahihdan theitak a panlak ding ahi chih leng hon hilh nawn hi. Jesu Khrist in “Ka honhilh ahi, Ngen un… Zong un… Kiu un” chi chitchiat hi. Mahni in thuneihna (authority) leh mohpuakna (responsibility) neita ihi uh chih leng a hon hilh hi. Hiaibang lungsim nei kawm a na thum theih chiang in na thumna lohching lou na chih sek kha, thumna lohching a hong hi teita ding hi. 

Simtute Toupa'n hon vualzawl hen. Amen

________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com/

Sunday Message | TANGTHUPHA N’ONPIA

Johan 3:16 in Pathian’ itna muhtheih in a hon hilh hi. Huai muhtheih a hong kilatna tuh A Tapa Jesu eite’ khelhna man in hon pia hi. Huchi in, amah tuh eite’ khelhna pua in singlamteh a hong si hi. Amah i tanpa ahi chih thugin zuaulou ahi chih chetna ding in sihna akipan thoukik hi. Hiai tangthupha tuh eite’ hotdamna ahi. Huan, i hotdamna tangthupha tuh piak a om ihi uh chih i theithei uhi.

Khovel ah thupha dang leng tampi a om ahi. Damtheihna ding bang, hauhsakna ding bang, lohchinna ding leh a dangdang. Huchibang thupha tampite’n i khosakna ding ah phattuampih ding thu leh salam hotdamna thu a hon hilh uhi. Ahihhang in, huaite tengteng in kha hotdamna thu genkhalou uhi. Huaiziak in eite kiang a piak a om tangthupha tuh a tungtuang mahmah chih phawk ni.

Tangthupha eite kiang a piak a hong hih chiang in, eite tuh hinna thak a hing ding in Khrist toh kaihthoh a om in, hindanlui pianken khelhna apan ngaihdam in i omta uhi. Ama a hon suaksak in, Setan tung a vualzohna a hon tunta hi. Huaiziak in khiallou thei ding a zalenna a hon peta hi. Thamlou in, ei tung a kinga sepding omte semthei ding in Khrist toh hih hin i hita uhi, hamphathuai lua. Amah thupina piak ding leh pahtawina khuksak ding tuh gingtute mohpuak a hita hi.

Huan, eite hon neitu omta ahihman in, a thupiakte sepzuina tuh a lungtunna ahi. Huaiziak in, gingtu peuhmah in ei hon hunkhetu Pathian maipha zon ding a kul ahi. Aman hon piak tangthupha tuh kalsuanpih a, mailam nawtzel ding in thupiak thupi a hon pia hi. “Aw Toupa, Nang man tangthu n’on pia…kipahthu k’on gen uh, Nang’ kiang” chi in eite’n leng midangte pesawn ding in thathak la ni. Nang leh kei tungtawn in tangthupha paizelta hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | LEMNA BAWLTE A HAMPHA UH (Blessed are the peacemakers)

Pastor khat kikhawm tawp inn lam zuan a, a paileh lamnawl ah tangval hon ana kisual uhi. Huai kisualte a muhtak in va delh a, khat va pumkawi in "Bawite hunsakta un kuamah a moh zaw na omkei uh, kei mohna hi, hunsakta un, kisual nawnkei un" chi'n va khou hi. 

Khovel a lemna leh muanna a omtheihna ding a panlatu leh gam tuamtuamte kikhaikhawmna pipen hi a theih United Nations Organization in General Assembly 1981 thupukna dungzui in 21st September tuh "World Peace Day" chi'n puang ua, tunitan in hiai ni lop in omtou zellai hi. Hiaibang ahih aleh i tenna uh khovel a galmuang in lemna leh muanna in mun a luah na hiam? chih ngaihtuahhuai mahmah khat hong suak hi. 

14th February, 2019 khovel in "Valentine's day, Rose day, Love day" chih a kilawptak a zat ahihlai in Jammu and Kashmir state a thiltung Pulwama Attack in michih lungphawng mahmah hi. Huai thiltun ziak in Pakistan leh India kal ah galmit a ki-etna hon uang mahmah mai. Hun bangtanhiam nung in Indian Air Force (IAF) pilot Abhinandan Varthaman mat in hong om nawn a, huai in hiai gam nihte kal ah lemna hon tun ding hiam ahihkeh gal hon tun zaw ding chih mite bildoh hong hi nawn hi. Lemna deih pawl tamzaw ahi ngei dia dam leh bit in khahkhiak in hong om. Kithawhuai a bang! 

Awle, tuni'n khovel huihnun dan i hon et velvel chiang in lemna leh muanna in mun tangzou nawn mahmah lou ahihdan theihtheih in a om. Gam khat leh gam khat i kigal ua, nam khat leh nam khat i kidou uhi. Kiathamlou in nam khat - chi khat hizenpi kitawngtawng, kinana in i om mawk uhi. Hiaitan kia hilou in innsung khat a khosakhawm hizenpi'n ta leh pa kilemlou, mou leh tekpi kilemlou chihte tamtak muhtheih in om hi.

Hiaibang khovel a khosa i hihlai un Pathian toh kilem dia hon bawl hondamtu Jesu Khrist in tuh Matthai 5:9 ah "Lemna bawlte a hampha uh; Pathian tate chih ding ahi ngal ua" chi'n ana gen hi. Tuni'n lemna bawltu ka hihia? Pathian tate chih ding in lemna palai, lemna tuntu leh lemna ding thilhihte ka hihkhahia? chih i kivel thak uh poimoh mahmah ding hi. 

Toupa'n simtute peuhmah i omna munmun a lemna bawltu leh tuntu hithei ngei ding in hon vualzawl hen aw. Amen

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihanthawn tuah ding lunggulh pen in nei hi. https://reachgwm.blogspot.com/