Sunday Message | THUPIAK 4-na

Laisiangthou ah thupiak 10-te chih a kimu hi. Huai ah Pathian in a mite zuih ding thupiak a pia hi. Hiai thupiak piak a om tuh a mite’n thumanna toh zuih ding a mohpuakna uh ahi. Hiai akipan in thupiak petu hih a dongtu sang in a thupizaw chihna ahi.

Thupiak 10-te lak ah poimohlou khat leng a omkei hi. Huchihlai in, khenkhat ngaihzam luat khak a om ding ven huai a om hi. Thupiak 4-na bang en le hang, “Sabbath ni phawk inla, koih siangthou in” (Ex. 20:8-11) chih ahi. A ni mahmah leng poimoh ahi chih a muhtheih ahi. Huan, a poimoh sem tuh Pathian adia kal khat sung a ni khat koih siangthou ding chih ahi (A pomlou pawl i om ka gingta). Ahihhang in, Khawlni Toupa ka hi chi Jesu Khrist mahmah in leng Ni masa ni in gingtute toh kithuahkhawmna hun a zang chih a kimu hi. Huan, ei India a Khristian-te’n ni masa tuh biakna ni in i zang tangpi uhi. A chihleh, hiai ni bang chibang in i koih siangthou ua? chih dotna poimohtak a hong suak hi.

Gingtu masa pipute hunlai in gingloute’n zehtan kichi a ngaikhawk mahmah mai uhi. Hiai zehtan ni tuh bohsiat theih dan in leng ngaihtuah phalou ua, zuih louhtheih in leng a koihkei ua, khauhtak in zui uhi. 1925 vel in Suangsang ah naungek damsuah hong omkei nilouh hi. Huai in hausapa Pu Mangkhawlun beidongsak mahmah ahihman in siampu a dot leh khua siansuahna poimoh ahi chi hi. Huaitak in hausa in khaw sung ah hiai bang thu ana pia hi. “Zingchiang a khosiansuahna nei ding i hihman un kuamah khaw sung akipan pawpawt hiam, pawlam akipan in hong lut phallouh bikbek ahi” a chi hi. Huai ni tak in Phamsa Pu Lienrum in Pathian thu gen ding a hiai khua ana lutsawm ni hikha hi. Himahleh, khaw siansuahni ahihman lutsak hilou in, dainawl ah ngak nilouh hi. Pathian lemgel zaw ahi dia, tuni tan a tullou “Nitum ngeilou Zion khawpi” chih laa pian loh hi.

Huan, gingtute ni poimoh khenkhat Good Friday ni bang in vaimim i tuh leh pai hoih suang in, kung khat in leng pai tampi suang ahi chi se in, huai ni a loukuanlou gingute ana chouna uh ahi. Himahleh, amaute’n gingloute’ zehtan toh kibang in hiai ni tuh kikhoplouh theihlouh bang a ngaihtuah in lou a kuankei uhi. Huaimah bang in, Nipini leng ana tang siangthou uhi. 

Himahleh, tuni chiang in hiai diklousakna ziak ahia, ahihkeileh nna hauhluat man in Nipini a khualzin, dawr hon, innkuan leh khotang vaiguan neihna ding in i enlahta mahmah mai uhi. Thupiak 4-na bohsia in Toupa’ maipha i mu taktak na di uam? Bohseta hilou a, zuitu hi ding in gingtu piching peuhmah in panthak la ni.

……………………………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/

Sunday Message | TOUPA'N EI ADIA HOIH ZAW SEHSA A NEI

TOUPA'N EI ADIA HOIH ZAW SEHSA A NEI

(God has a better plan for us)

"Kimkima" chih min gengingkha bang hilehang tulai khangthakte lungsim ah "I zun ngaih lunglen vang in", "Sarah i zunzam" chih late hong lang ngei ding in ka gingta. A aw nalhtak toh siamtak a hiai late a sak ziak in YouTube ah 3.5 millions val entu nei hial hi. Awards tomkhop leng dongta a, tukhang adia tuailaite ngaihsangpen ahilel hi. Hiaibang ahihlai in khovel theihphak leh mite ngaihsang ahihma a nawlkhin leh paihkhiat a, a omdante a gen in lung hon khoih a "Toupa'n amah adia hoihzaw sehsa ana nei dan eivele maw" chih khonung in om hi. 

THAZUAL AWARD 2018 

Hiai Award hawm hun in maidoh tung a result puangtute'n "Thazual Best Male Artist Lengzem Award sangtu chu KIMKIMA" a chih uh toh kiton in mipite kipak in a hawk ging ua a lasak kikhah ging kilawmtak zak in om a, hall sung kipahna in a thawn zuazua hi. Sawtlou in a hong dingkhia a, thudang a genma in "Hehpihtak in ka nu'n a hon dinpih ka ngen" chi'n a nu toh hong dingkhawm uhi. 

"Kum 16 ka hihlai in Band ka nei ua, ka Band pihte'n hon paihkhia uhi. Inn ah ka pai a ka nu kiang ah ka kap zoihzoih hi. Ka nu'n ka lutung ah khutnga in hon thumsak a, 'Bawi khatveitei hiai mun ah ding diing na hi' hon chi hi. Tu'n ah ka dingta!" Mittui kailou a gen ding haksa a sak bang in mittui kailou a, a thugen ngaihkhiak ding a haksa mahmah. 

Tuni'n ka ngaihtuah a, Band akipan a paihkhiat ahihlai in hehna, khasiatna, kingaihsiatna leh lam-et bei kisakna naktak in a nei ngei ding chih ka theihpih. Himahleh ka ngaihtuah zom a, huai Band a kipan in paihkhiak hikeileh tua a minthan zah in minthanna a ngahkei ding ka chi zel. 

"Huan, Pathian itte, ama'n a seh bang a a sapte adi'n, a hoihna ding un bangkim in a sepsak chiat chih i thei hi." ~ Romete 8:28

Awle eimahni hinkhua chiat kivel lehang - i hinkhua a lohsapna i tuahte, siamlouh ziak a lawmte'n hon nawlkhinnate, i ngaihzawng in hon khen mawk, innsung khosak haksat ziak a lawm-le-vual kipawl manlou i chihte Pathian in ei adia hoihzaw sehsa a neih ziak ahi chih i phawksuah semsem ding hi. Huaiziak in niteng a zing khovak i muh laisiah Toupa'n kei adia hoih zaw sehsa nei ahi ding i chihtheih ding uh deihhuai hi. 

"Tua Government a ka sepna muh Class 12 ka fail khak ziak ahi. Huai ka lohsapna in hahpan sem ding utna lungtang hon guan" a hon chihleh huai Sir-pa ka ngaihsangna a kibehlap.

________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/ 

Sunday Message | PANG TEITEI

Kuahiam in lohchinna a ngah chiang in, thupi sa in pahtawitham leh etton thamching ahi chi’n a kigen mangmoh hi. Himahleh, lohchinna ding a pang teitei ahihdan i phawkkei khanak uhi. Thil bangpeuh ah, lohchinna i ngahna ding in pang teitei mah a ngai hi. Salam a i poimohte theihtawpsuah a i pang teitei uh bang in, khalam ah leng theihtawpsuah in pang teitei a ngai hi.

"Toupa na Pathian tuh na lungtang tengteng, na kha tengteng, na lungsim tengteng leh na hatna tengteng a na it ding ahi" - Mark 12:30. Hiai omdan tuh gingtu i hihna subuaithei khemna i tuah chiang a, pang teitei a Pathian it ding thupiak masapen/ thupipen ahi. Theihtawpsuah a pang teitei a lungtang ngaihtuahna ah Pathian kia teeng henla, i kha in Pathian kia vil henla, lungsim Amah thu in dim gige henla, i hatna teng Amah a ding in zang in pang teitei lehang Diabol a ding in mun awng nonlou ding hi. Ephesate 4:27 "Diabol leng mun awn sam kei un." 

Thupiak tuh khemna i tuah hun a pang teitei a Pathian it ding ahi. "Nou non it uleh ka thupiakte na zui ding uh" Toupa Jesu'n a chi. Amah itte'n A thupiak zui ahi uh chih i muthei hi. Amah mah inle huchi bang itna a paai ziak in sa leh sisan man in hon leita a, Amah a i hita uhi. "Na sapum uh, Pathian akipan na muh uh, na sung ua teeng Khasiangthou' tempul ahi chihna theikei ua hia? Noumau a leng na hikei ua, man piak a lei na hita uh." (Cf. 1 Korinth 6:19).

Pang teitei zou ding in simtute Toupa’n hon vualzawl chiat hen.

............……………………………

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. (https://reachgwm.blogspot.com/)

Sunday Message | NGAIHDAMNA BUL

Mihingte adia thil haksa mahmah khat ngaihdamna ahi. Kuahiam tung a i tatlek khak chiang in, ngaihdamna man bei bang in lamet a baihlam mahmah. Ahihhang in, kuahiam i tung a hong tatlek chiang in, a ngaidamtu hih ding haksa i sa hi. Huaiziak in, ngaihdamna tuh a poimoh mahmah a, hak leng a haksa hi.

Gingtute adia kichihmuhtuak mahmah khat ahihleh ngaihdamna petu hih ding ahi. Kolosa-te 3:13 in: “Kua peuh in kua tung ah leng thubuai nei bang hile uchin, kithuakzou chiat in, kingaidam tuah unla, Toupa’n a hon ngaihdamtak bang in, kingaidam sam un” a chi ahi. Kingaihdam tuah ding gingtute mohpuak poimoh mahmah ahi. Huaimah Pathian in a tapa Jesu Khrist tungtawn in hon sinsak hi.

Laisiangthou in mihingte khelhna, leh Pathian in hon khotuahna ziak a Hotdamna hon piak thu i mu uhi. Mihingte’n khelhna i ngaineu ua, bangzahta a Pathian in khelhna hua hiam chih i ngaihtuah khakei sek uhi. Huaiziak in, ngaihdam hihna leh ngaihdamna nasep tuh i sutlouh man un bangmahlou bangmai in i ngaihtuah nak uhi. Himahleh, Khros a Pathian’ ngaihdamna tuh thil thupi leh lamdang mahmah ahi. 

Mikhial in tuh khelhna man gawtna a tuah ding him ahi. Himahleh, Pathian’ zahngaihna a dim leh hehpihna a vaihawm in, mihingte i khelhna ua kipan hon hutkhiat ding a thilgeel ahi. Huan, mihing khelhna tuh mihing mah in a tatkhiat ding a deihdan ahi. Huchi in, a hehpihna thukpen tuh khros ah hon puangzakta a, huai tuh a hon ngaihdamna ahi. Khrist hong sih ma inleng Pathian in a hon ngaihdam hi. Eite’n Pathian lam i ngat ma unleng Khrist i khelhna ziak un a si khinta hi. Tua ahihman in, Pathian in Khrist tungtawn in a hon enta a, a thangpaihna Khrist in a hon liahkhuhta hi.

Khros a sisan luang in Pathian leh mihing kikal ah lemna a hon tunta hi. Khovel kia hilou in, van ah leng hiai thu in kipahna thupitak a tun hi. Khros tuh mihingte adia Hotdamna mun a suak a, i ginna uh kibulphuhna mun leng ahi a; huaimah tuh Ngaihdamna Bul ahi.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/