Sunday Message | A TAK ZAW

Dawr a kizuak Paak in, mi mit hiip leh etlawm mahmah in kilang mah leh a etlawmna kia in beizel hi, huan a Paakte etlawm lou bang in kilang mahleh a Tak (genuine) ahihman in hinna nei khenkhat a ding in vualzawlna a hizel hi.

I Gam Khristian Hinkhua i ngaihtuah chiang in polam etlawmna, Khristian pen kicheina dan maimai a zang kha houh ihi duam aw chih uthuai sek mahmah hi. Midangte a dia vualzawlna hih naksang a midangte a dia zumpih huai kisuak maimah sek hi. Bangchileh TAK (genuine) zaw  gingtu muanhuai a hong tamsem thei dia? Heutute nawlkhin leh mohpaih pibawl luat sang in, ahihna bangbang ua pomdan siam pibawl zaw leng.

Khalam a kipi/ kikep pibawl ni. I paulap uh Pathianni a kikhop leh hun lua, laisim laite a dia hun omlou, biakinn lou mundang a, nitak program te awlmoh a nei zaw, Khalam pitute adiing in 'biakinn' a thugen kia hunsak mai di hilou hi. Thugente'n thugen tamlua, ngaikhetute'n thu TAM zalua. Ahihhang in, thu kizate mahni hinkhua a apply chihte om tuanlou bang sim. Salam thilte poimoh mahleh, huaite i buai pih kawmkawm in khalam mah pibawl thak leng "Nang hon Siampa leng thei in" i society vaite pibawl ding hithou mahleh, mimal mah pibawl thak leng a ziak tuh society hoihna ding in, nang mimal a kinga a, society i chih pen nang leh kei ziak a omthei a, i khalam uh pibawl in, i khalam dinmun  A TAK (genuine) peuhmah leh i society sung buaina ding tampi ki pumpelh ding hi. Society hoihna leh hatna ding in mimal ahoih leh ahat masak a ngai hi.

______________________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/

Sunday Message | KEI KA KUAN DING

Khakhat leh ni thum winter vacation nuamtak innlam a va zangzou in siamsinna maban sunzom ding in Delhi ah Toupa'n hon pi tung nawnta a kipahhuai ka sa. 

Kumthak hunthak ah mimal chih Toupa'n hon pikhawm a, ei deihtelthu hilou in lungkhamnate, dahnate, damlouhnate leh haksatna chituamtuamte toh hiai hunthak galkaipih in i omkha ahimaithei. Hiaibang mah in kipahnate, kithalopnate, lohchinnate leh damtheihna hoihtakte toh hiai kum 2019 zang dia pi galkai a om leng i himaithei uhi. A bang hitaleh khovel a mi tamtakte'n hiai hun thak a muhtheihlouh lai ua eite'n i muhtheih tuh sia in phataleh Toupa'n hon deihna banghiam om ahi ding chih lunggel i neihtheih chiat uh deihhuai ka sa hi.

Lai Siangthou Matthai 28:19 & 20 ah Jesu'n "Huaiziak in, kuan unla, nam chih a pan nungzuite bawl unla, Pa leh Tapa leh Kha Siangthou min in baptis unla, thu k'on piak tengteng pom ding in thu hilh un. Huan, ngai un, kei khantawn in, khovel tawp pha in leng, na kiang uah ka om zel ding" a chi hi.

Hiai a Jesu' kammal tuh ei gingtute adia thupiak poimohtak, i zuih ngeingei ding uh thupiak ahi chih haihvual ahikei. Huaiziak in hiai thupiak tuh kei adia piak ahi. Sawl a om ka hi i chihtheih uh a ngai hi. Isai in "...kei hiai ah ka om, hon sawl ve" a chih bang a i chih chiat ua, Toupa'n hon deihna munmun leh hon deih hunhun a sawltheih dia i kiman uh poimoh ahi. Huai hileh "Amau sem na unteh, ana hih na unteh" chihte i tawpsan thei ding a, KEI KA KUAN DING, kei mahmah in ka sem ding i chithei chiat ding uhi.

Lai Siangthou in "Nasep panglou ginna tuh a si ahi" chi ahihman in kei Khristian ka hi, kei gingtu ka hi i chih ngalleh i ginna latsakna dia Pathian' nna a tam theipen sep ding tuh i mimal mohpuakna leuliau ahi. 

Toupa nasem ding in KEI KA KUAN DING chi ngam ding in Toupa'n hon vualzawl hen. 

_________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/

Sunday Message | PATHIAN THU' THUZOHLOUH

“Pathian thu a hing a, thil ahihthei a, namsau hiamtuah bang chibang sang in leng a hiam a, hinna leh kha, guhlawi leh guhngek tuamkhen hial hel khop in a sun thei a, lungtang a ngaihtuah leh tupte a theipah ngal thei ahi.” -   Hebrute 4:12

Tulai khovel mite’ ngaihsang mahmah hi a ka theih khat tuh Modernism ahi. Modernist-te’n thugin omsate heikawi in, banghiam thu khatpeuh dik ahi chihna ding in chetna piaktheih ding ahi, a chi uhi. Huan, relativism kichi leng tulai khangthakte ngaihsang mahmah thugin khat ahi. Hiai pawl in a pomdan un, thil himhim thudik ahihna ding in a kingakna khotang, tawndan leh khangthu ah a dik leh diklouh kinga a chi uhi. Khat adia thudik a dang adi’n diklou thei ahi, chihna leng ahi. Hoih mahmah, khovel’ vai ah deihthusam dantak tuh ahi. Ahihhang in, gingtute’ ginna toh tehkak leng, a buaihuai a om ahi. Huai tuh, Bible a thillamdang tampi taklat a omte chetna omlou ahi chi in a pomkei uhi.

Hiai mite sinsakna leh thugin leh tulai khangthakte khovel etdan kituak mahmah ahihman in, Bible thu gintak haksa sakna liantak a tun ahi. I melmapa Setan pil in lemgelsiam ka sa mahmah mai ahi. Pathian thu’ thuzohlouh ding in vanzat a hunhun in a hon pawsuah ahi. Khovel toh kituak a, mihingte thuzohtheihna ding vanzat gingtute sangmah a pil-kinzaw a nasem ahihtak man in, panlak ding tuh a om ahi chih phawk ni.

Huaiziak in, huchibang thu kilawmte sung a i puklutlouhna ding un Pathian thu’ thilhihtheihna Hebrute 4 na in a hon hilh hi. Hebrute 4:12 in Pathian’ thu thilhihtheihna leh nasepdan hiai bang in a gen hi: “…namsau hiamtuah bang chibang sang in leng a hiam a, hinna leh kha, guhlawi leh guhngek tuamkhen hial hel khop in a sun thei” a chi hi. Huchikhop a thilhihtheihna nei Pathian’ thu gingtalou ding in thuzoh in omkei ni. Khovel a pilna leh telsuina in mihing thupisak semsem a, Pathian neusak bang a kilang ahihman in, huaibangte kizousak kei ni. Pathian, Pathian ahihnatak zongsuah le hang Amah thupilua, lianlua, hatlua, a thilhihtheihna lianlua ahihman in hon zoukei ding hi.

____________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | SAPTUAM’ DINSAN

Pathian in kum 2019 damtak a hon pi galkaita ahihman in, kipahthu i gen uh ahi. Christmas ni in Jesu Khrist hong pianna san (ziak) i zak chiat uh ka gingta ahi. Ziak nei a hong pai ahihleh, huai bangchi bang in eilam ah i na gahkhesak thei ding ua chih dotna poimoh mahmah khat a suak ahi.

I Lamka khopi uah saptuam pawl a tam mahmah mai a, khutzung leh khe zung in leng a daikei uh ahi. Huaite tengteng in dinsan a nei chiat ding uh ahi. A malmal in kidong kha sese khang, ahihhang in gingtu masate khekhap zui i hihvek ziak un amaute poimoh ngaih mah poimoh chiat ding in i kigingta uhi.

Gingtute masate’n Khrist thupiak nanungpen tuh amaute nna bang a sang in, sepsuah ding tuh amaute liangkou a kinga bang in ana sang uh. Huai ahihleh Matthew 28:18-20 a kimu bang in “nungzuite bawl un” chih Thupiak Thupi ahi. Hiai thupiak sepsuah ding tuh gingtu hihna in a tunkhawm ahihman in, nawlkhin theih in a koihkei himhim uhi.

Nungzuite bawl ding kichi thil baihlam ahi hetkei ding ahi. Bangziak in, i chihleh, hiai sepsuahna ding in ‘kuan un’ a hon chi a, ban ah ‘baptise un’ a chinawn ahi. Hiai thupiak thupi “nungzuite bawl un” chih nuai a sawl a om nihte’n a hon sinsak nop a om ahi. Huai tuh, Jesu khekhap zui ding a kuan ding, A thutak sinsak a, huai tungtawn a hinkhua a kikhekna tun ding chih ahi.

Himahleh, huai tuh saptuam’ dinsan ahihman in tuni’n bangchibang in gahkhesak leng a manpha dia chih ngaihtuah a ngai ahi. Mihing lam ah hihtheih a tawm chi mahmah ahi. Ahihhang in, a thupiak in omzia en le hang zoh dingdan a om chih a muhtheih ahi. Huai tuh, thuneihna leh thilhihtheihna liantak toh nungzui bawl ding in a hon sawl a (v. 18); a hon sawlna ah sepding hon piak tuh Tanchinhoih sinsak ding (v. 19), leh, a kuankhia mite hon ompih gige ding chih thuchiam hon pia (v. 20) ahihman in i zou ngei ding uh ahi.

Hiai thupiak Saptuam’ Dinsan ahi chih phawk in, thupiak hon petu muangngamna toh semsuah ding a kuankhe ngam chiat ding in i kichial uhi.

____________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/