Sunday Message | KOILAM NA EN

Gingtu hinkhua hih kha thu kia hilou in, salam thu mahmah toh leng kisai ahi. Salam i chih chiang in i tenna khovel leh niteng a thiltungte toh kisai ahi. Ganta tung a ngongtatna hong tam mahmah lai in ngaihdan chitampi a hong om a, thuleng diklou pipi hong om hi. Thamlou in, Zomi galkapte sung natawm ah kituahlouhna nasatak om ahihdan PR/PC chihte ah muhtheih in kilang hi. Huchibang thute ziak in tui kihawt nasatak lak a om i bang uhi. Huchih hun in etna ding lam buai in i omkha uhiam? Khovel a khosa a kihihman in etna/ ngatna lam dik tuh a poimoh mahmah hi. Hebrute 12:2 in “Jesu, i ginna siampa leh hihkippa, a ma a kipahna om ziak a zahlaknate ngaineu a khros a thuakpa, Pathian mang tutphah taklam a vatu, Amah lam en in” a hon chi hi.

Jawlnei Elisha hun lai in, Israel lalgam tuh Syria kumpi in dou ding in kisa hi. Syria kumpi in sepaih aleh tampi in hau a, a galvan uh leng thupi mahmah hi. Huchibang hun in Israel a ding in vualzohna ding himhim omlou bang in a kilang a, dah leh lungkham mangbangtak in om uhi. Himahleh, Elisha in tuh Israel kumpipa kiang ah zou ding na hi, pangngam in a chi ahi. Aziaktuh, “amau lam a pang sang in eilam a pang a tamzaw uhi” (2 Kings 6:16) a chi hi. Huchiin, Elisha kimvel ah sepaih hon in a um kimvel uhi. 

Haksatna i tuah hun un, beidong leh pangpatak a i om hun un, koilam i en ua? Melma galhat mahmah in eite hon sim ding leh nuai chimit ding a hong kisak hun in, Jesu lam en le hang aman hon ompih gige in hon nuselou ding hi. Ngaihtuah mah dih, Pathian gam nasepna ding a hun neilou, sum neilou, hihtheih neilou na kichihnate a tamzaw na ngatna lam a diklouh ziak hizaw kha ding ahi.

“Koilam na en?” chih mahni kivelthakna ding in kidong chiat ni. I nam buaina, saptuam sung a khalam a keuna, khotang a kituahlouhna leh innkuan kisiatna i chihte ginna ze-etna, leh ngatna ding diktak Jesu lam nga ding a hon lamlahtu hizaw kha ding ahi. Ngatna dik nga thei ding in Toupa’n hon ompih chiat hen.

________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | LUNGSIM THAWMHAUTAK A I OMLAI UN…

“A sisan muh ding omlou” thillamdangtak tulai in Lamka khopi veng tuamtuam ah, ganhingte sihna a pat zak ding tam mahmah hi. Veng tuamtuam a naupang curfew leng puan in om pah zungzung mai hi. A hoihlam a lak in tuh kumtawp exam kuan ahihtoh, hiai bang thil thawmhauhuai hong tung pen kizen sawnsawn a batna chiang om hi.

Lauhna khovel ah ki om a, bangchik chiang in koi mun ah bang thil piang ding hiam chih kuapeuh bildoh ahi gige lai hi. Matthai 10:29-30 ah, Jesu’n “na lu ua samzangte simvek ahi”, chi hi. Pathian’ phallouh in khovel ah bangmah thiltung om lou ding hi. Jawlnei Amos in, 3:6 ah, “Toupa hihlouh in hoihlouhna khopi ah a tung dia hia?” chi hi. Job hinkhua ah leng Pathian phalna lou in Setan in bangmah sem theilou hi chih kichian mahmah hi. Huaiziak in, Pathian theihlouh in nang leh kei hinkhua ah, kim leh kiang ah, thiltung bangmah omlou hi. Toupa’n a theihvek ahi. Tua ahihlai in, thiltung tengteng Toupa deih masak (perfect will) chihna hilou hi. Toupa deih masak hilou, himahleh, hong om dia a phal, permissive will, ahi uhi.

Pathian ah diktatlouhna omlou hi. Sam gelhtu’n "Toupa zaw ahoih in a diktat ahi", chi hi. Toupa’n mi a gawt ut deuh mawngmawng om hilou in, khelhna nasep kisem ding a phal ziak a Setan in a utut vanzat a hon zang hizaw hi. Toupa lam ah bel hiai bang ahi, Joseph in a sanggamte kiang ah “nou hoihlou nageel ua, himahleh, Pathian in mi tampi a suaktaksakna di’n a hoihlam in a hon heisak chi hi” (Gen. 50:20). Mihingte’n hoihlou i sakte leng Toupa’n i hoihna ding in hon heisak thei hi. St. Paul in, Pathian ah diktatlouhna a om hia? Om lou hial, na chi hi (Rom. 9:14). Tua bang in, thawmhau huai, lauhuai samah le hang Pathian’ tangtawn thiltup tangtun na ding in haksatna, sihna leh lauhthongna hong om hizaw hi. "Pathian in i hoihna ding un bangkim ah a hon sepsak hi" (Rom 8:28).

Pathian in hiai bang thil mulkimhuai leh lauhuai a hong tun chiang in khelhna nasep a lauhhuai dan hon sinsakna ahi. Khovel Pathian’ hamsiat sa ahi. Khelhna nna kisepna mun ahihman in lauhuai, dipkuat huai thil tung khovel ah tamthei mahmah hi. Hiai bang thil lauhuai hong tungte’n khelhna gah, khelhna nasep, lau huai hina maizen e, Pathian in khelhna phuba a lak hun chiang in khelhna a kibual lailaite bangzahta a gawt de aw, chih ngaihtuahna hon pia hi. Tuni a i lungkhamnate, haksatna, sihna, damlouhna, kim leh kiang a thawmhau huai thil tampi a hong om lai in, Jesu Khrist tugntawn a Pathian zuante a hampha pente a hi uhi.

............……………………………

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | KUATENG GUTA NEU HI A KUATENG GUTA LIAN HIHIAM?

Amah result puangkhetu ding tel a endiktute tengteng in kipahman sang ding khempeuh a sanna ding ziak uh toh a theih sipsip nung ua a hilou puankhiat teitei in buaina leh zahlakna nasatak a tun ngei ding chih theihsa ahi. "Judge decision is the final decision" i chih veu sek uh zuih luat ding mah ana hi dan ahi. Miss Kut result sese gen i hikei.

"Fellowship of The Thirsty Souls and Hungry Hearts" devotional message gelsek Pastor DZT in "Tulai Lamka a thiltung chizathuai veve e! Police, tangval thautawite, forest dept., thumpawl leh a dangdangte'n bang a chi panlah ding ve aw chi thei uthuai hi" chihtan kia a gelhlel leng bukim mahmah ka sa. I theih ut thute a bildoh ding mah ahi. Huchilou in khenkhatte'n i theihchet hilou, hidia i gintak thute i ban gen souhsouh ua huai in mipite pei lung-am khop hi. Lehlamtak ah, mite nuihsan i loh lel uh.

Guta mat a, a hong om chiang in "Guta neute i man ding ua guta liante pahtawina pakkhi i oksak sek kei di ua" chih kampau i za veu uhi. Bang hiam van, ahihkeileh a sum a tuat a bangzah gute chiang guta neu kichi a, bangzah sang a tamzaw gute guta lian kichi ahi dia le? Dawnna piak chet ding haksa mahmah hi. Guta i chih mi kuahiam ama neihsa hilou mi dang neihsa thilkhatpeuh a neitu phalna leh theihpihna himhim tellou a laksak chihna ahi. Huai thilte a neitu adi'n thilthupitak hithei gige ahi. Cheng 1 i neih sunsun hong kiguksak chiang in leng puaknakhuai lua hi. Tuni'n guta neu, guta lian chih ding a omkei, mahni tan ding hilou peuhmah i tan chiang in guta kihisuk pah mai hizaw ahi.

1 Thessalonikate 5: 21, 22 ah "Bangkim enchian zaw unla, a hoih tuh len tinten un. Gilou lampeuhmah hihkei un" chih i muthei uhi. Guta kichi gilou gamtat ahi a, thilhoihlou ahi. Pathian deihlouh mai hilou in i mi hinpihte mahmah in vengsung leh khotang a om dia a deihlouh thil liantak ahi. Guta neu, guta lian kichi a omkei. Huaiziak in, ei a lou ding peuhmah i laklouh a, a neitu diktak in a neih chiang in guktakna bei in i khotang hong chidam ding a, hong khangtou ding hi. Lampi hoihlou lua i chihchih uh leng a hong bei mai ka lam-en.

Mi tengteng in deihteltheihna i nei vek uh. Hoihlou lam ah i deihtelna kizousak mailou a, a hoihlam mah a i deihtelna kizousak zaw ding in Toupa'n hon vualzawl hen. Amen

____________________

©ReACH:GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/

Sunday Message | GINGTUTE' TAKSAP THUMNA

Gingtu kichite tuh “Khrist sinsakna za, thei a zui; amah enton mite” i hi uhi. Huan, gingtu ihi uh chih chetna ding in tehna tampi a om ding: Hinkhua siangthou, kampau pilvang, lungput dik, thumna, leh a dangdang. Huchibang a tehna lam chituamtuam omte lak a poimoh mahmah, himahleh gingtue’ taksap lianpen hi a theih tuh “THUMNA” ahi. Bangziak hiam i chihleh, Laisiangthou in gingtute’ thumna in thilhihtheihna nei ahihdan hon sinsak a, himahleh eite’ thumna in thilhihtheihna neilou bang a kilang ahihman in ahi.

Jakob 5:17 in thumna toh kisai a mithupi leh thilhihthei ahihdan mikhat tanchin a hon taklang hi. Huai tuh Elijah ahi. Aman hiai bang in a gen hi. “Midiktat thumna in thil thupitak ahih zel hi. Elijah leng eimah piandan bang pu mihing mah ahi a, amah tuh vuah zuklouhna ding in phatuamngaitak in a thum a, huan, kum thum leh khaguk sungteng leitung ah vuah a zu takei hi.” Aban i etleh: “Huan, a thumnawn a, van in vuah a zusak a, lei in a gahte a hon suaksakta hi” chi hi. Hiai in gingtute’ thumna tuh thilhihtheilou ahikei chih a genkha mahmah hi. Elijah tuh pianken a eite bang ahi chi ahihman in eite toh kilamdanna neilou mipa ahi. A thumna leh eite thumna bel kibang zoulou zel hi. Huaiziak in, eite taksap tuh thilhihtheihna nei ding khop a thumna ahi chih a kilang sem hi.

Jakob (James) ahihleh Jesu pianpih/ sanggam ahi. Aman thumna hiaizah a tangkou ahihleh bangzahta a thumna poimohna theichian ahi diam! chih hon ngaihtuahsak hi. Wesley L. Duewel in a laibu Touch the World through Prayer ah hiai bang in taklang hi. Jakob in a hinkhua nanunglam teng Jerusalem Temple ah Pathian nna a sem hi. A hinkhua a zoh in, a taksa lei a phum ding in a kisaklai un a taksa ah thilkhat musuah uhi. Huai ahihleh, a khuk tuh sangawngsau khuk bang in a khauhgawp hi. Khukdin a thumna hun a nak zat tam mahmah ziak a huchibang a om ahi chihna ahimai ahi. 

Unaute, na hinkhua a poimoh nasak mahmahte lak ah thumna a bangzahna ah na pangsak a? Ngeina dan a, zingthoh, annek, lup ding chiang a mitsi zual lel na hikha hiam? I innsung chidam hen la, khotang bit henla, i nam khangtou henla, i saptuam in gahsuang hen i chihleh thilhihtheihna nei thumna mah toh kibulpatthak poimoh ahi. I taksap uh thumna ahi chih thei in thumna a kuhkal sem ding in Toupa’n hon ompih hen.

……………………………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/