Sunday Message | GINNA LOU IN ZAW

Billy Graham kiang ah Pastor khat in “Jona, Ngapi’n a valh chih pen zaw gintakhuai nasa zou hia?” chia a dot leh, Billy Graham in, “Bible in a gen ahihnakleh Jona in Ngapi a valh chileh leng ken zaw ka gingta ding” chih san hi. I niteng hinkhua a buaina leh khemna i tuah tampente ginlahna ziak ana hi naknak hi. Pathian thu, A thuchiamte ahi bang a muanngamna tuh ginna ahi. Huaiziak in, ginna tungtawn mah a Pathian pomtak hidia kisin ding ahi. Ginna lou in Pathian pahtaklam hihvual ahikei (Heb. 11:6).

Tulai i lak ua kineksiatna, diktatlouhna, kikhemna (fraud), leh tanghuaina chiteng (immoralities) a i kibualkhak nak uh, i ngaihtuah leh Pathian thuchiam muan zohlouhna ziak ahi. Jesu'n Peter kiang ah hong pai in, a chihlai in, Jesu kia en a, a pai sungteng tuipi tung ah a paithei hi. Himahleh, a kim a kiang tui kihawtte a et chiang in, tum di’n a kisa hi. Eite leng, Peter bangbang a Jesu kia i et gige khaklouh ziak in, bah in, khovel siatna lak ah i ke khanak uhi. Pathian’ pomtak hinkhua zang ding in ginna ah i omna hiam chih ei leh ei ki-en chian zel ni (2 Cor. 13:5).

I tup-le-ngimte Pathian’ pomtak hiding in kisinni. Pathian in tuichim in mihing tate ka gawt nawnkei ding, a chih nung inleng, mihing tate’n, tuichim apan kihumbitna ding gelna in Babel inn sang ana lam sawm uhi (Gen. 11:3-9). Huaibang thiltup pen Pathian muan zohlouhna ahih ban ah, amau min om det ding a deihna uh leh a kithupisak/ minthansak utna uh ahihman in (Gen. 11:4), Pathian in a tup-le-ngim uh a tangtungsak kei hi. Huainak sang in, buaina leh kikhenzakna tunte ahizaw uhi. Ei khristiante’n i tup-le-ngimte Pathian’ pomtak hithei ding in hanchiam ni. I septheih sunsunte kisaktheihna, midangte douna leh elna, ahihkeileh mahni angmasialna hinkhua ding a hihleh Pathian’ pomtak chinglou ding hi. Huaiziak in, Pathian deihlam leh lungtunna bang hihiam, chih i hinkhua ah zonpen in nei lehang, a pomtak hinkhua i zang thei ding hi. Simtute tuabang ding in kisa thak chiat ni.
________
©ReACH:GWM-3E/01
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | HUATNA/ MUHDAHNA APAN SINLAI

Ann Landers in “Huatna kichi acid bangbang ahi. A hatdan tuh a koihna thawl sesak thei in, a kibuakna peuhmah kaangsak hi” a chi hi. I laa uh khat in, muhdahna in khat in kha a chi zomah hi. Mihingte hiai huatna kichi toh piangkhawmlou kuamah om ding in a gintakhuai kei hi. Huan, huchibang a huatna lungtang a hong suakkhia tuh nou hon paai in, hon semkhesak naknak hi. Etsakna ding in, politics vai bang ah na mi deihpen na latsakkhak ziak in, hon deihpihlou kuahiam in hon haw thei uhi. Huan, khalam vai ah leng Jesu Khrist a ginna nga a, ginomna toh na zuih chiang in huat na loh khamoh kei ding hi.

I Laisiangthou ah Jesu Khrist nungzuihna ziak a huatna i tung ua hong tung ding ahi chih a chiang mahmah hi. Jesu’n tuh khelhna a hua a, khelhna tuh a hihna bang in a langsak hi (John 3:18-21). Huan, Jesu mahmah in John 15:18 ah hiai bang in a gen nawn hi: “Khovel in nou a hon huat leh, nou a hon huat ma in keimah hon haw khinta chih thei un.” Laisiangthou mah ah “Na melmate uh it unla, a hon hawte a hoihna ding uh hih un” (Luke 6:27) chih leng ana om zel hi. Huaiziak in, Laisiangthou ah huatna toh kisai in gingtute bang ziak a huat a om i hi uhiam chih leh, bang ahia i huat ding uh, chihte hon musak hi.

Gingtu khat na hihna ah, hiai bang dinmun in na omkhata hiam chih kivel mah dih: Jesu min a huat/ muhdah in na omkhata hiam? I khosakna uh hiai leitung hih gindan kibanglou tamtak omna ahi. Huan, sabiak kibang chiatchiat lak ah leng ginna nasep sepkhiat dan kibanglou hi. Huaiziak in, Jesu Khrist nungzui muanhuaite a ding in lamet hetlouh kal in kuahiam in hon sim et in, ana haw mahmah kha thei hi. Na Pathian thu awi dan “kon haw lua” hon chi a omleh kipahna in sim inla, amaute nakpitak in it thuk in. Khovel huat hihna in supna ding bangmah a hon tun kei ding a, himahleh Pathian lam ah na lawmman ding tamsem a hon khawlkhawmsak zaw ding hi.

____________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | KA UT BANG IN KA SEM HI (I Did It My Way)

Timothy McVeigh in “kei ka hihleh, nna hoihloute’ toupa ka hi a; ka kha makaihpa leng ka hi” chi hi. Hiai ahihleh, a sih ding kuan a, a gen kammal ahi. Hiai mipa’n leitung a, a hinsung in a tangtawn mun ding ngaihtuah khalou ahihdan theihtheih mai hi.

Frank Sinatra lasak khat “I Did It My Way” (Ka ut bang in ka sem hi) a minthang mahmah hi. Himahleh, thukhen ni hong tun chiang in kadeihna, nadeihna leh midangte’ deihna bang hilou ding a, Pathian deihna bang in thu hong kikhen ding a, huai hunchiang in na ut bang nasep gah mu ding na hihman in, kisik a phatuam nawnkei ding. Lei khempeuh kipuang ding a, khuk khempeuh A mai ah khukdin ding ahihman in, kisiktheilai a i om hun in, khukdin in, i khelhnate ki puang zaw le maw!!!

“Ka ut bangin kasem hi, ka life kei a eive leh” chi'n i ki thupisak mahmah ahi maithei. Himahleh, Pathian in nang ut bangbang a gamta ding in A hon phalkei a, Aman thukhenna A bawl hun chia, Amah toh tangtawn a vaihawm ding in hon deih hi. Ei gingtu piangthaksa kichi samte'n i pianthakna bangchi bang in i zang a, noptak a zang i hi hiam! I lampi toh enthak mah ni, Amah kiang i tuntheihna ding in kong kawchik ah i pai a ngai hi. Jesu’n, Amah nungzui ding in hon chial a, “Kuapeuh in hon zuih a ut leh, amah kingaihsaklou in, a khros pua in hon zui hen” chi hi. Himahleh, lampi nuam hilou a, lampi khatkia tawn ding in hon hilh hi. Hiai leitung hauhna, nopsak ding kia lunggulh hilou a, lametna toh kal i suan gige poimoh hi.

I hinkhua a, a piang dektak, bawlthei dektak, vualzou dektak thiltampi i tuahkhak a om ding. Himahleh na sihnung chiang in huaibang thute omlou ding hi. Charles Spurgeon in “Meidil a om mitampite lak a vangam kaidektak tampi om di’n ka gingta hi; himahleh, hiai ‘dektakte’ pawl tangtawn mun ding mah uah omta uhi” chi hi. “It’s my life” i chi zatzat sek, ngaihtuah thak mah dih, second khat lel le samkik theilou i hihdan phawkthak in, “I Did It My Way” hinawnlou in, “Toupa nang deih bang hizawta hen” chithei chiat di’n Toupa’n simtute hon vualzawl hen.

____________________

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | TU HUN A POIMOH: EVANGELISM

Hotdamna tanchinhoih hih mahni a dinkhawlsak ding hilou a piaksawn ding ahi. St. Paul in hiai tanchinhoih tuh sihngam in a kalsuanpih hi. Aman huchibang a kalsuan ding in “Khrist itna in hon sawl teitei ahi” (2 Kor. 5:14a) a chi hi. Hiai nna sepsuahna tuh gingtute a ding a Thupiak Thupi (Mat. 28:18-20) zuihna leh a thupetu muanngamna nasep ahi.

Kum tamlou paisa in Lamka khopi ah leng Evangelism toh kisai a kisinsakna khat a hong om kha zual hi. Huai ahihleh Prayer Evangelism Trio (PET) a kichi hi. Mi thum pawlkhat a kibawl in, thumkawm in khamangthang mite kiang a tanchinhoih gen ding a kisinsakna ahi. Hiai kisinsakna dungzui in, mawltak a Khrist hon itna thu ginglou mite’n a sangsiam ding ua piakkhiat ding, chih ahi. Ban ah, saptuam sung ah khanlohna thupitak hong om dungzui in, hiai nna sepsuahna Pastor, Evangelist leh Elder-te kia a ding hilou ahihdan musuah in tuni chiang in khamangthang mite tundingna nna semtu tam mahmahta hi.

Huchibang a khanna nasatak muhtheih a omlai in, i innsung, khotang, pawlpi a chidam hiam chih dotna dawng ding hi le hang bang i pe ding ua? Dam bang a om, himahleh damzoulou ding khop a siatna kidiah kikeih ahizaw hiam, chih ngaihtuah tham ching mahmah hi.

I tenna India in leng mimal zalenna ngai poimoh semsem a bang hi. A hoihna om mahleh, thilsiam paizia toh hong kikalh om chiang in a dahhuai mahmah a, Pathian’ thilsiam nelhsiahna hong bang hi. September 06, 2018 in Supreme Court in Section 377 IPC lakhia in, neih kibangte kipolhna phalsakta hi. Hiai in gingtu lem tampi hon sukha ngeingei ding hi. Sodom leh Gomorrah mite tung a Pathian a thangpaihna mahmah hiai bang chindan a neihziak uh ahi (Gen. 19). Tuabang hi ding a Dan in eite leng hon phalsak ahihman in panlakna ding a om hi. A za nailou mite lak a tanchinhoih zaksakna a poimoh mahmah bang in, gingtu lem tamtak i lak a omte nelhsiah vual ahikei uhi. Huaiziak in, tu hun a poimoh tuh amaute kiang ah Evangelism nasatak a bawl ding ahi. 

___________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | JESU KHRIST SINSAKPA DIK (Jesus Christ - The True Teacher)

"Huai mi tuh zan in Jesu kiang ah a hong a, a kiang ah, Rabbi, Pathian a kipan a hong pai sinsakpa na hi chih ka thei uhi. Pathian ompihna tellou in hiai thillamdang na hihte kuama'n ahihthei kei ding uh" a chi hi." — Johan 3:2 

31st August ni a "Tribal Unity Day Chibai" chih ka Facebook wall a ka post leh khat in "A ki-unty zou mahmah puoi" chi'n hon comment zat hi. Ni tamlou paita a tangvalnou felmel mahmah khat in Delhi khopi a mahni a hinna ana kilak thu in ka lung hon phawng mahmah a huai in "Siamtu'n Hoih Hun Tawk Hon Sa Hiveh Aw" chih thupi zang in Sunday Message hon gelhsak hial hi. Tutung in leng Inland Hills Church a Pastor sem lel Pastor Andrew Stoecklein in a hinna ana kilak thu in naktak in hon lungphawng sak nawn hi. Bangteng hileh 5th September "Teacher's Day" kuapeuh in "Sinsaktute pahtawina ni" chi a kituaktak a i loptheih ding uh ka lam-en.

Siamsinna innte ah sinsaktu omkei mawkleh huai siamsinna inn in omzia a neikei ding. Hiai in sinsaktute manphat dan a langchiangsak mahmah hi. Huchimahbang in Jesu Khrist nungzui a Khristian kichi eite'n leng i hinkhua kong bangkim a hon sinsaktu Jesu Khrist i nungngatsan a, amah tellou a hinkhua i zat chiang in i Khristian hinkhua in omzia neilou suak hi. Bangziak a Teacher's Day lawm zel i hi ua? chi'n kidong lehang "Gim-le-tawl khoksa lou a siamsinte adia sinsaktute a kipiakzohna uh thupi lua huaiziak a amaute pahtawina a kilawm ahi" chih i dawnna uh ahi ngei ding hi. A dikmah e. Tuni'n hiai behlapna ding in "Thumanna kichi pahtawina thupipen ahi chih siamsinte'n i mangngilh hetlouh ding uh" i chi utlai hi. Hiai in i Khristian hinkhua ah JESU KHRIST SINSAKPA DIK thumanna hon gahsuah ngeingei ding uhi.

Mahni hinna kilak "Suicide" i chih un Pastor hial a hon phak chiang in lungphawnghuai lou theilou hi. "Amaute ka mohsak kei himahleh eite'n leng amaute thuak bang thuak hilehang bangchi'n i hinkhua ah thupukna i la ding ua chih tuhun a i chet uh poimoh mahmah hi" chi'n ka na gen sek. "Depression is a sickness, just like cancer so lets not judge them. It's very sad indeed" chi'n Htn. Chiinsuanching in ana gen a dik mahmah hi. Huai natna hihdamna ding a panlak tuh ei mohpuak ahi.

"Tribal Unity Day" chi a mi'n puang a, a tangkoupihpih lai ua "A ki-unty zou mahmah puoi" i chihlaisiah unity lou ding mah ihi uh. Salphate sisan ziak a kipumkhatna a haksat luat aleh Jesu Khrist sisan tungtawn a kipumkhat ding Khristiante kihilou hiam? chih dotna i kidot uh hun mahmahta hi. Ahihkeileh houh mahni a hoih huntawk kisa a mi dangte hinkhua ana bukkak nilouh i hi uh hia?

"Mi'n Khrist a naih semsem chiang in Khrist sianthouna in amau a om sianthoulouhna mu chian sak semsem a, mi dang judge (teh/buk) na ding mun neilou uhi. Hiai khamite omdan ana himawk ve aw...."  — Htn. Rith Tawmbing

Toupa’n Jesu Khrist sinsakpa dik hon sinsak thute zui a theisiam sem ding in hon vualzawl hen. Amen. 
______________________
©ReACH:GWM-3E/03
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/