Sunday Message | HUNTA HILOU MAW!

Pathian thu i gam uah hong lutna kum 108 bang chingta hi. Tu hun akipan kum 108 paisa leh a mailam thute gelhthoh a kepbit a om tawm mahmah ding hi. Huaiziak in, pi-le-pute’n chindan ana neihkhakte uh tamtak khangthakte’n i phawklouh uh om ding in ka gingta hi. A hoihlouhna tan leng a om ding a, a hoihzawkna leng om veve ding in ka suangtuah mawk hi. Ahihhang in, galmuanna nam leh gamsung a om hih mansuah hiaihiai i hi di uah aw! chih a vangkim in hon ngaihtuahsak hi. Tu hun akipan kum 3 sunglel enkik le hang leng gentham buaina tampi a om hi. Huaite sutsawm i hikei uh. Himahleh, huaite phawk a “Hunta Hilou Maw!” chihsawm i hizaw hi.

Telemachus kichi gamdai a khosa, sakhua a ding a mi kipumpiak mahmah, khat a om ahi. Mi hangsan leh thilhoih deih mi ahi. Nidang in Gladiator-te’n etnop kimawlna in mipi muh ding in kisual ua, khat-le-khat ki thattuah zelzul sek uhi. Hiai thilchin hoihloutak beisakna ding a bulpantu ahi. Aman, huchibang a sih tanpha a kisual mite kisual laitak in, hiai bang kisualna tawpsan un chi in va tawmlut hi. A ennuam mipi thangpaite’n suang in a denglum uhi. Kumpipa Honorius in hiai mihangsan Telemachus ziak in hichibang sih tanpha a kisualna a beisakta hi. Aman tuh "A hunta, tawpsanta un" chi in, a thilhih uh khamtang ding in a tawmlut ngam hi. Telemachus bang a si ding a kihasuan i hikei uh. Himahleh amah bang a mi hangsan i om uhia?

Eite’ khang ah leng, gingtu i kichih hang un tawpsan ding tampi om hilou maw! Kum sawtsim paisa a Rev. Dr. Pumzathang Tombing in, ei Zomite sikkhop buaina 3Z a chihte (Zuau, Zu, Zahmoh) bang tawpsan ding sang in uang deuhdeuh hilou maw. Zuau genna vanzat lah pung hat deuhdeuh maita. Tuma deuh a SMS, Facebook chihte tulai WhatsApp in khekkheta. Police-te’n Zu a mat tam semsem uleh Zu duh pung hulhul mah bang. Nidang a pasalte thilchin i sak lai ua, numei natawm in singpi dawn a dawn theita. Zahmoh thil lah kimawlna bangmai hita. Hiai bangte tawpsan hun mahmahta hilou hiam? Huan, a dang leng tampi omte lak ah kithahna (suicide & murder) mahmah leng gingtute’n ngaihtuahkik thak ni uh. Pathian batpih a siam a om mihingte hinna natawm it zoulou ding a bang kha in hon bumhai hita ahia? Gam-le-nam itte’ lah semkhawm theilou, khamangthang itte’ lah semkhawm thei tuanlou. Hiaite khawng mah khotang buaina tuntu hong suak himailou hiam?

“Ka minpu ka mite kingai neu a, a thum ua, hon zon ua, a om dan giloute uh a lehngatsan uleh, van akipan in ka na ngaikhe ding a, a khelhna uh ka ngaidam ding a, a gam uh ka dam sak ding hi” (2 Chro. 7:14) chi Pathian ahi chih phawk in, i innsung/ khotang/ gam/ saptuam sung ah i omdan giloute uh tawpsan hun mahmahta ahi.

_____________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi. https://reachgwm.blogspot.com/

Sunday Message | NA KIANG AH OM GIGE

“...bangchikmah in k’on donlou kei ding a, paileng ka hon paisankei hial ding.”
– Heb. 13:5

Na hinkhua ah bangchi bang haksatna hong tung a: Na itpen ziak in maw? Sum-leh-pai, neih-leh-lam ziak in maw? Vangsiatna tawpkhawk tuak kha na kisa maithei ahi. Pathian in hon taisanta leng na chi ahi maithei! Suk damtheih nawnlouh di gentheihna tuak na kisa le ahi maithei! Ahihkeileh, vangsia na kisak luatman in Pathian a omkei na chi kha maithei!

Himahleh, Toupa’n hon taisan kei. Haksatna genvuallouh na tuah hun in leng PATHIAN tuh na kiang ah a om gige hi. Omlou bang na theih hun in, leh om ahi chih na lametlouh hun inle na kiang ah a om hi. Aman hon taisan ngeilou ding ahi chi’n thu hon chiamkhinta hi. Pathian in na gingtak khel a hon it ahi. Haksatna hon tuahsak man in hon itlou ahikei a, thuaktheihna na neihna ding a hon sinsakna ahizaw khamoh kei ding hi. Huaiziak in, thum gige inla, panpihtu sam in.  Sam gelhtu in “Pathian tuh i kihumbitna leh i hatna, mangbat lai a, huh pahpah pa nai gige ahi” a chi hi.

Pathian ma ah kibu in, i khelhnate uh selmang i sawm khanak uh. Himahleh, Aman hon mu gige hi. A huat ding thilhihte tawpsan ni. Pathian in hon mu a, hon ching gige ahihdan Sam gelhtu’n hiai bang in chi hi: “TOUPA tuh hon chingpa ahi a; ka tasam kei ding hi: Aman loupa hing nou mitmet mun ah hon khualsak zel a: khawlna tui gei peuh ah, a hon pi zel hi.” 

Toupa’n i haksatna hon thuakpih leh midiktatte lam en gige ahihdan i mu hi. Huaiziak in, Pathian in hon panpih ding ahi chih i muang gige ding uh.

I lungtang tengteng ama’ tung a ngak ding ahi. Sam 34:17 ah: “Mi diktatte a kikou ua, huan Toupa’n A za a, a mangbatna tengteng uah A hon kheta hi” a chi hi. Toupa tung ah lungsim tengteng sung bua in amah sam le, Aman hon dawng di a mangbatna a pat hon hut khe ding hi. Isai 43: 2 ah: “Tuite na ngah tan lai un leng na kiang uah ka om ding a; luite na ngah tan lai un leng a hon tum kei ding hi: mei a na pai tan lai un leng a hon hul kei ding a; meikuang in leng a hon liau kei ding hi.”

Haksatna leh vangsiatna i tuah hun a le Pathian in hon taisanlou ahih dan i muthei hi. Pathian panpihtu na kiang a om gige ahi chih thei a, amah muang ngam ding in i kichial uhi.
............……………………………
©ReACH:GWM-3E/01
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi. https://reachgwm.blogspot.com/

Sunday Message | SIAMTU'N HOIH HUNTAWK HON SA HIVEH AW

“Huan, Pathian in, i kibatpih in, ei mahmah bang in, mi i bawl dia, amau tuipi a ngasate tung ah, tung a leng vasate tung ah, gamsate tung ah, leitung tengteng tung ah thu i neisak ding, a chi a.”

- Genesis 1:26

Dotna: “Nang kua hon bawl na hia?”

Dawnna: “Kei Pathian hon bawl ka hi.”

Sunday school, beginner pawl i zillai ua hiai thute sin a i kikou zuazua uh, tu hun a tamtakte'n mangngilh i hita ding uam chih ding khop in Pathian thilsiam thupipen eimah hinna nangawn kilak kichi hong kithang mahmah mawk hi. Khristian sahkhua zuiloute lak ah a tun chiang in a sahkhua kisinsak dan uh va theisaulou i hihman in puaksiam dan om deuh hi'n ka thei. Himahleh, khotheih luat ma nangawn a hon siamtu Pathian ahi chih sinsak a omte lak a, a hong tun chiang in lungtang tawng hon dawt vilvel khat om hi. 

Mahni kithahna toh kisai biakinn kia hilou a siamsinna innte banah social media tanpha zang a, a hoihlouh dan kisinsak ding chi in ‘workshop, panel discussion leh seminar’ chihte sai zeuhzeuh in omta hi. Ka na ngaikhe zel a, hiai ziak le hithei, huai ziak le ahi, huai le himaithei eimahve chi’n a ziak ding tamtak gen in a om. Hoih in a dik thei mahmah mai hi. Mahni hinna hial kilak ding a thutanna mulkinhuaitak lak tuh hinkhua masawn ngam nawn mahmah louh ziak ahi ding. Huaite tuh – lungkhamnate ziak, kingaihsiatnate ziak, hihkhial kisaknate ziak, lawm ngaihte ziak, innkuante ziak, lawmte ziak, hoihlou kisaknate ziak, zawn ziak chihte leh a dang tampi a om genseng kei hang. Hiai hun chiang in bang dia hiai khovel a mimbang piang se ka hiam? chih dotna in lungsim hong luahdim a, a dawnna tuh piansan himhim ka neikei chih ahihchiang in mahni hinna kilak dia thutanna lak tuh hong tangtung nak hidi’n gintakna ka nei. Ahihleh piansan himhim hiai khovel a neilou mah i hi ding uam? Hilou, neitham e. Bangteng hon tung zong Pathian lemgel dungzui a hiai khovel a piakkhia i hi uh. 

Tangthu khat ah: Khebai tangval khat in nungak khat ngai a, huai nungak in ngaithei mahmah lou hi. Huai khebai pa tuh lem gelhsiam mahmah ahi a, ni khat a lemgelh nalhtak tawi in a ngaih mahmah nungaknu kiang ah a vapia hi. Huchi a huai nungak in a lemgelh hon ettak in, “Ka pian ma in Pathian toh khebai sa in ka kimutuah ua, huai hun ah ama’n ka hihna bangbang a hoih penpen in hon pomsak hi. Ka hihna bangbang ah a lungkim mahmah a, huchi'n hiai khovel ah k’ong piangta. Kei hon ittu ding tuh ka hihna bangbang a hong pom mi hon siamtu Pathian mah in hon pe ding ahi” chih kigelh a mu hi. Hiai in a lungsim a zou mahmah a, huai tangval a hihna bangbang a pom in a itna a sansakta hi. 

Awle simtu deihtakte aw, tuni’n na hinkhua na kisit mahmah hun in huai khebai tangval pa thugelh nang gelhdan in ngaihtuah inla huai nungak tuh nangmah ngaihtuahna dan in koih le chin na hinkhua ah bangteng hong tung mahleh Pathian in hoih hun tawk hon sak ziak a hiai khovel a piang dia hon bawl ahi chih na chian semsem ding. 

“Ka lim kibawl kim nailou tuh na mit in a mu a, na laibu ah ka hiangte tengteng gelhvek ahi, a ni sim a bawl in a om zel a, khat leng a om nailouh lai in. Pathian aw, na ngaihtuahnate kei a di'n manpha hina tel e! a gawmkhawmna thupi hina tel e! Sim dek mahleng, a tamdan tuh piaunel sang in a tamzaw ding: ka khanloh a leh, na kiang ah ka om nilouh naknak ahi.” – Sam 139:14-16

……………………………………….

©ReACH:GWM-3E/03

ReACH: Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message | NANG LE NA HUCHI TAWK VOI

Mahni hihna selmang tum in, midangte i kawk kha nak uhi. Mi thilhoih sepkhiatte phat leh tawisang sawmlou in, kampau khelh tang leh huaithu pansan a nenniam tupna nei tam mahmah hi. Ki imim mah le hang, thubuai khenkhat, tunai bang ah ADC Chairman tungtang bang, maban a Salphate Monument honna hong om ding thu ah, bandh leh strike om hun chiang in, leh a dangdang. I thukupte ua kipan i hihna uh bangtan hiam kilangkhe sek hi. Huan, kuahiam in na huchi, chi a i hoihlouhna hon kawkkha chiang in, thangpaihna hong soukhia in, “nang le na huchi tawk voi” chi in i leh housiat thuk sek uhi. Gingtute hihdan ding mah ahi diam?

BYF/LSD Khawmpi 2017 thugentu in, “Pathian i thuneihsakna uh neu law deuh ahi diam!” a chih vangvang mai tuh nang leh kei a ding a kingaihtuahna tham ching mahmah ahi. Ngaihdamna toh kisai in Jesu’n Matthew 18:22 ah: “Sagih vei mun sawmsagih tan ngaihdam ding ahi” a chi hi. I kingaihdam theihlouh khiat dan ulah simlei om sung daih ding a bang hi. Kingaihdamna lungput mansuah hiaihiai leng i bang uhi. John 13:1-20 bang a kimu ahihleh sikha in a hih ngeina bang in, Jesu’n a nungzuite khe kingainiamtak in silsak hi. Eite kingaihniamna in chiangtan nei baihlua ahi diam! Sut leng a dang leng tampi a om lai ahi – migitna, nunnemna, lemna, thuaktheihna, hoihna, muanhuaina, kidektheihna leh a dangdang a i taksapna uh.

Pathian in i hihna uh bangbang a hon thuk hi zenzen leh a damlai ding kuamah i omkei uhi (Cf. Rom. 6:23). Himahleh, ngaihdamna hau, heh ze-ol, lainatna a dim Pathian eite'n nei i hihman un kipahthu i gen uh ahi. Nang le na huchi tawk voi chi a kikawktuah mailou in, Pathian’ itna leh hehpihna thute kalsuanpih leh hilhsawntu ding hizaw i hi uh chih phawk chiat ni.

__________________

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulhpen in nei hi.