NA HOIH HUNTAWK AHIA?

Sunday Message
NA HOIH HUNTAWK AHIA?

Mi tamtak mahni kingaihsiat ziak in Pathian lungtunna hilou ding in kikoih uhi. Ahihang in, Laisiangthou in: “Mihing bang hi ahia, na huchi awlmawh a; si thei mihingte na huchi limsak tel?” (Sam 8:4) a chi hi. Eite, Pathian’ khutsuak i hi ua, A hon it hi. Huan, Amah itna ahi (1 John 4:16). Ama’n eite, thilsiam dangte sang in hon deih tuambik chihna ahi. Huan, michih leng a tuam chiat in hon bawl a, midang toh kitehpih, kibatsawm ding ahikei hi. Huaibang lungput i neih zenzen leh mi hehpihhuai tawpkhawk i hi ding ahi.

Pathian toh na kizopna “hoih huntawk” nasa hiam? Na let leh thupi ziak a Jesu Khrist nang sik-le-tang a hong si ahi hia? ahih keileh, nang hon it ziakin? Bible in: “Himahleh, Pathian in a hon itna a langsaktu, mi khialte i hih laia Khrist i sika a sihna ah. Huchiin, a sisan a siamtansak a i om khit nungin, amah ziak in Pathian hehna lak akipan hotdam in i om mahmah ngei ding hi” a chi (Romte 5:8,9). Na niteng khelhna neu nounoute liahkhuh zou ding khop a hon it lawtel dan ahi. Na hih theihlouh khat hih di’n TOUPA’N hon lamen hetlou hi. Ama’n hon pumkhek nuam ahi: “Pathian aw, Nang dik chin a, kei ana diklou ka hi. Ka na sawmta, himahleh ka kikhek zoukei (I’ve tried, and I can’t change it)” chi’n A khebul ah kun le hang Ama’n A hih ding. Aziaktuh, Ama’ panpihna tellou a, a hoihzaw hihtheihna neilou na hihlam hon theilua hive’n!

Deut. 7:6,7 in “TOUPA na Pathian uh a ding in lah nam siangthou na hi ngal ua, leitung a nam tengteng tunga Amah a tuam hi dinga TOUPA na Pathian un a hon tel na hi uh. Nam dang sang a na tam ziak un TOUPA’N na tunguah a itna a tusak in, a hon tel ahikei a, nam dang tengteng a nam tawmpen na hi ngal ua.” Pathian in Israel-te Amah a ding bikin A bawlta. Tu hun in, eite leng, Khrist’ saptuamte i hihna uah Khalam Israel diktakte i hi uh. Huaiziakin, a tung a Laisiangthou thu i taklat Israelte hihna zahzah, nang leh kei adia gelh ahi. “TOUPA’N midangte sanga na tamzawk ziak ua hon tel ahikei” chih ei tungtang a bulh ding hita le’ng, TOUPA’N midangte sanga i hihdik vek ziak uh hiam, i fel tuam ziak ua hon tel ahikei chihna ahi.

Pathian in, “Ka itna na tung uah a tu, huan, na siangthou uh ka hon chi ahi. Deih tuambik na hi uhi. Na hoih ziak uh hiam, na lamdang deuh ziak ua hon tel ka hikei, Ka hon it ziak in ahizaw” a chi hi. Tuni a nang hih dia A deih na thei hia? A’ itna pom ding in A hon deih hi. A tamzawte i buaina lianpen uh, ei-le-ei i kideihlouhna ahi. Pathian leh, midangte’ itna tang ding in i kikoih theikei uhi. Himahleh, “Pathian zaw itna ahi, itna a om gige mi tuh Pathian ah a om gige a, Pathian leng amah aha om gige hi” (1 John 4:16).

Bangchi’n Pathian hon itna i theisiam thei dia? Mimaltak in Pathian toh kizopna na nei hia? Ei hoihna ziak a Pathian itna tang ding ihikei uh chih phawkthak ni. Huan, Aman bangzahta in hon it mahleh na phawk keileh, a phatuam kei ding hi. Amah deihdan thei ding leh A hon itna theichian sem dingin niteng hunteng in Amah toh kithuah ni.
............…………………
©ReACH:GWM-3E/02
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

KHA SIANGTHOU

Sunday Message

KHA SIANGTHOU

Pentecost Ni chibai!

‘Pente’ kichi Greek pau a 50 genna ahi. Jesu’n nungzuite kiangah Pa akipan Khamuanpa, Thutak Kha piak a om ding uh ahihdan Johan 14:16 ah gen hi. Huai Kha tuh thohnawn ni nung ni 50 ni in hong tangtung in, Pentecost Ni a kichi hi.

Pentecost Ni in Kha Siangthou lamdangtak in Jerusalem ah hong kilak hi. Huan, michih tungah leite, meikuang bang in hong kilak a, Kha theihsak bangin thu a gen ua; Peter sermon tungtawn in mi 3000 in pianthakna a ngah uhi. Hiai mi 3000te’ kitheih chetna tuh, amaute Pathian angsung a bit ahihdan uh a theichian ua, hinkhua a kikhekna nei in; a biak uleh a hinkhua ua lalpen tuh Toupa, Jehovah Pathian a hong hita hi. Bible a khatvei thu a pianthakna thupipen ahi.

Tampite kidotna tuh Pentecost Ni a gingtute bangin kenleng ka hinkhua ah Kha Siangthou ka neithei diam? Kha Siangthou in hon luah chiangin pau chituam a pau teitei ding ahihleh, keilah huchi hilou kahihman in Kha Siangthou kei a omlou ahi diam? chihte ahi. 

I Laisiangthou a bukim in, a biktak in hiai pau chituam zat toh kisai bang a hon hilhchian mahmah hi (Cf. 1Cor.12:3; Rom.8:14-15; Gal.4:6; 1Cor.6:19; Jn.3:3-8). Jesu Khrist i Lal leh Hondampa ahihna i theihchet chiangin thil 2 eite a hon pia hi: 

a) Khelhna hon ngaidam;

b) Kha Siangthou  a hon pia. 

Nasepte 2:41 na ah Peter thugen in chiantak in a hon hilh ahi; mi 3000 in pianthakna ngah in baptisma a tang uhi (v. 41). Himahleh, hiai mi 3000-te pautheihlouh in a pau uh chih Laisiangthou in genkhalou hi.

Hiai akipan in hotdam a omte Kha Siangthou piaka omkhinta chih kimu ahihman in lungbuai na ding om nawnlou ahi chih phawkthak ni (Cf. Gal.3:2, 14; 1Cor.12:3). Banghiam thil lamdang experience lou a Kha Siangthou nanga hinglou/ tenglou ahi chih sinsakna na zak uleh Laisiangthou toh kituaklou hizaw ahi. Nasepte a i muh uh Berea Saptuamte bangin eite’n leng I thuzakte uh Laisiangthou toh kituak hiam chi in ana tehkak masa zelin, a dikte kia zui zel ni.

............………………….

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

NANG HON GIMPIH

Sunday Message

NANG HON GIMPIH

 

Miss India 2009, Pooja Chopra, a pianzawh ni sawmnih a phak in a pa’n thah sawm hi. India gam Hindu mite mou van ken (dowry) ziakin nu-le-pa zawnlawh tampi om uhi. Ta numei deihlou uhi. Pooja Chopra a nu’n itlua ahihman in, inn apan taikhiat pih in, itna leh lainatna tawh kem piching hi. Huchi in, aman kum 2009 in MISS INDIA title khuksak in om hi. Nu itna leh gimpihna ziak in hiai bang minthanna ngah hi.

Na nu’n tua na dinmun na tunna ding in bangzah in hon gimpih hiam? Nang hon haih lai in nibang zah an leh tui duh lou in om hiam? Na nu’ gilsungah kha bang zah om na hia? Na nu’n a phei tungah, ittak in hon tawi in, a nawitui tawh hon vaksa tapa/ tanu na hihlam mangngilh ken. Tua na dinmun na tunna dingin na nu’n nakpitak in hon gimpih hi. Nu hon itna leh gimpihnate ziaka kipahthu na gen ut bangbang, a damlai nu neite’n tuni’n hih chiat ni. A sihnung chiang un kikhel ding hi.

Nu khat in a tapa mi hausa mahmah kiang ah: “Non it taktak leh hong pai inla ka kiangah hong giak in” chi-in sam hi. A nu kiang hong tung in, “Nu aw, bang kisam na hi hiam? Na deihdeih gen in” chi hi. Anu’n, “Bawi aw ka kisap om kei, tuzan ka kiang hong giak in, hon ngai lua ka hi” chi hi. Khua hong mial in lum ding in hong kisa in, a nu kiangah zan giah ding kihta mahmah kawm in hong lum hi. A khua uh tunna ding lamsuk, lamtou paina gim in ihmu pah hi. Ihmut nop laitakin a nu’n, “Bawi tui ka duh” chi in a tapa phawng hi. A tapa zong thou in suah pah hi. Sawtlou zawh in a tapa phawng non in, a nu’n tui ngen a, a tapa in leng pia hi. A thumveina ding in a nu’ ngetna bang in a tapa in tui pia a, a lupna tungah a nu’n tui bawsak kha hi. Huaitak in, a nu hon taai hi. A nu leng khase mahmah kawm in hiaithu hilhta hi. “Bawi, na ngeklai in, phalbi zan mial ah, lupna ah zun na tha a, puan dang nei lou i hih man in na zun kawt ah kei lum in, a hulna lam ah nang k’on sial a, na zun kawt pen ken ka delh keu hi. Zan khat in zun nih/ thum vei bang na thak chiang in na zun kawt ah lum in khua ka vak zel hi. K’on itna leh k’on gimpihna, na damsung in n’on dinkik zoukei ding” a chi hi. Nu hon itna leh hon gimpihna ahi ding mah in koih ken. Na tu dinmun na tunna dingin na nu’n bangzah in hon gimpih hiam! Tui sik akipan tua na dinmun, na tunna dingin na nu hon gimpihna phawk in na nu it leh hehpih mahmah in.

Leitung ah nu’n na mailam hinkhua adia hi zah a hon gimpih ahih leh, tawntung hinna dingin Jesu’n bangzah in hon gimpih diam? Jesu’n a thuak ding thei ahih manin apa kiang thum in, “Hiai ka thuak ding gimna tawh hon kipelhsak in” (Mk.14:32ff) chi hi. A dikna thu kam khat gen leh suakta ding hinapi nang leh ke’n vangam i luah theihna dingin mawhna hong tang hi. Nu hon itna leh hon gimpihnate na phawkkhiat theih kei leh, Toupa Jesu’ hon itna leh hon gimpihna, na phawk theikei ding hi. Huan, nu manphatna thei in nu tungah kipahthu gen a itna a lak thei ding in Toupa’n hon vualzawl hen. Amen

…………………………

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

NGAM-BARA!

Sunday Message

NGAM-BARA!

Meitei pau siamlou lawlam in thupi dingin “ngam-bara” chih peuh ka hon telkhia hi. Huaituh ei pau in “chou maw!” chihna ahi. Pau gilou leh kithang mahmah, naupang neukhakha tanpha in leng a zat uh thumal ahi laizang hi. Hiai thumal zangtute tuh a tangpi in mi kiphasak mite ahi ua, a ngapthoh mite uh tungah a zang tangpi uhi.

Naupanlai in hiai khah kizang kha takpi hi. Mahni zohlouh ding ngoihngoih khong kiangah “ngam-bara” ana kichikha sek hi. Ngaihtuah kik chiangin hailumlou chauh kihisim hi. Himahleh, a tangpi in kuahiam i mi chou/ kinakpih ding pen sanga hatzaw lawm kizoppih i neihziak bang hi nuam mahmah hi.

St. Paul in, ginna a, a tapa Timothy kiangah “Ginna a kidouna hoih sual in” chi in ana hasuan hi (1 Tim. 6:12a). Huai tuh tulai pau in gen leng, ginna hon doudaltute kianga “ngam-bara!/ chou maw!” chi in chihna bang deuh ahi. Hangsantak in na galte dou in chihna ahimai ahi. Warren Wiersbe in hiai a ‘sual’ chih thumal ahihleh “keep on fighting” chihna ahi a chi hi. Huaiziakin, gingtute a ding in khalam kidouna tuh sual zom zelzel ding om ahi chihna ahi. 

Huan, ‘sual’ chihna dang ahihleh ‘physical fight’ ahi. Huaituh tha neih tengteng suahkhia a kisualna toh kibang ahi. St. Paul in gingtute tuh sepaih bang a melmapa Setan, tha neih tengteng suahkhia a sual zom zelzel dingin hon hanthawn ahi chih leng phawk leng i chi uh ahi.

Banah, a poimoh mahmah dang khat ahihleh, huchibang a melma sual ding a i hangsanna ding ziak uh ahi. Huaituh, eite lam a pang Pathian ahihman in lauhthawnna ding omlou ahihman in hangsantak in melmapa sual ngam in a chi hi. Ei lam a pang Pathian tuh lei leh van a thuneihna sangpen tawitu ahi. Huchibang a thupi leh thilhihtheih Pathian’ sepaihte i hihman un amah muanna ziak in melmapa i sual ding uh ahi.

Melmapa’ zoh in i om zaw maimah uhia leh? David tuailai naupang chik himahleh, Israelte melma lauhuaipen Goliath dou dingin a naih gegep hi. Vualzou ding a melmapa Setan sual ngam ding in hansanna Toupa’n hon pia hen.

............…………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.