Sunday Message

A B B A !

Nidang in ABBA-te chih kithangsak mahmah in, a lasakte uh tamtak ngaihkhak kinei hi. Hiai band ahihleh Sweden gam mi nungak 2 leh tangval 2 kigawm a, kum 1972 a hon bawlkhiat uh ahi. Kum 10 sung vingveng lasakhawmna hun a zat nung un, kum 1982 in kikhen uhi. A pawl uh beita mahleh, a lasakte uh kum tamtak kithang nilouh hi. Tulai khawngin kidong hi leng, ABBA-te theikhalou chiang tuh naupang mahmah chihtheih; ahihkeileh, huaite theichiang tuh upa mahmahta chih ding a bang hi.

I Laisiangthou ah leng Abba chih ana kimu hi. Himahleh, lasiam pawlte toh kibatlouhna lianpi a nei hi. Abba kichi Aramaic pau a ‘Pa’ chihna a zat ahi. Huan, hiai thumal tuh Paul in, Rome-te 8:15 ah: “Lau a om nawn dingin sikha hihna kha na tang uh ahi ngalkei a; ta hihna kha na tang uh ahizaw. Abba! Pa! chia, I kikou chiangin” chih mun ah ana zang hi. Hiai ah Pathian in, a tapa Jesu Khrist tungtawn a gingtute a “Ta” dinga hon pomna toh kisai a zat ahi. Aman, “Ta” a hon pomta ahihman in, eite’n leng I taksap chiteng uh Amah akipan I ngahna ding un “Abba” (“Pa”) chiin I sam theita uhi. A chihleh, bangziak a hiai thumal chitchiat ‘Pa’ chihna a, Paul in zang sese ahi dia aw!

Rome mite tawndan akipan Paul in a hon lakkhiat hi dingin a gintak huai hi. Amaute’n innsung ah nasemtu, innsung vai leh mohpuakna poimoh tuamtuam semtu/ enkoltu a nei sek uhi. Kuahiam kiangah gan enkai ding, nektak enkai ding, innsung enkai ding, tate enkoltu ding chihte leh a dangdang mohpuakna piak in om uhi. Huchibang a, tate enkaitu nasemtu in, a ta hikei mahleh, don in, enkai in, kem hi. Huan, ta in leng a pa bangbang in thu man in a deihte ngen hi. Huan, kuahiam in ‘Ta’ ding a midang ‘Ta’ a pom chiangin, a innsung kipatna lam tengteng mansuah in, a innsung thak ah kilamdanna omlou hamphatna a ngahthei uhi.

Abiktakin, naungek pauthei tungin deih a neih chiangin, a deihpen genchian thei naikei mahleh, a ngahna dingin “pa, pa” chiin sam zel hi. Huai tuh Aramaic ah “Abba” i chih ahi. Ta in huchibang a, pa a sap chiangin pa’n a nget bang hihiam chih thei in lohsam sak ngeilou hi.

Eite’ khelhna a pai a om, Adam suante i hi uhi. Sa dan a hingte leh hoihna tungtawn a Pa kiang zawt theihna dinga hihtheihna neiloute i hi uhi. Himahleh, lainatna a dim Pa i neihman un i hampha uhi. Aman, Jesu Khrist tungtawn in eite a “Ta” dingin hon pomta ahihman in kipahthu i gen ahi. “Abba! Pa!” chi a i sap chiangin A ta i hihna kha i tangta ua, kilamdanna bangmah omlou in Khrist bangin a tangtawn gouluahtu ding i hita uhi. Huan, huchibang a eite’n Abba! Pa! chia i sap chiangin, i taksap thei in hon lohsamsak ngeilou hi. Amen.
............…………………
©ReACH:GWM-3E/02
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message

NA DANG A TAK HIA?

Middle East gam, gam lum, gamdai leh gamkeu mahmah lak ah Jesu’n “Mi keupeuh a dang a tak leh, ka kiang ah hong pai henla dawn hen” chi in chialna nei hi. 

Jesu’n dangtakte, tasam kisate, tagah-liangvai kisate, khelhna ziak a mi lak nuamsa ngelloute a zong hi. I dang uh atak hia? Tasam leh liangvai i kisa uhia? Tulai mite nopsakna deih in i dangtak ua, hauhsak ut in i dangtak ua, thuneihna deih, tungnung ut in i dangtak uhi. “Ka mite'n thil nih a hihkhial ngal ua, kei, hinna tuikhuk a hon paisan ua, tuivungte a toukhia ua, tuiching, theilou ding” (Jeremia 2:13).

Diktat utna ziak a dangtakna, khalam thilte lunggulh a dangtakna, niang leh tai a om ut a dangtakna, hiaite leh salam tui duh a dangtak phatsakna leng Jesu’n a pia hi. “Kuapeuh kei hon gingta tuh Laisiangthou gen bang in tui hing luite a sung ah a hong luangkhe ding, a chi a. Hiai thu tuh a gingtate'n Kha a tan ding thu uh a genna ahi; Kha lah piak ahi nai tadih kei a, Jesu lah pahtawia a om nailouh ziak in” (Johan 7:38, 39). Huai tui dawnna ziakin khalam damna, Jesu toh kizopna, leitung haksatna leh gentheihna, i mihinpihte itna, khelhna leh diktatlouhnate huatna, a hong piang ding hi. “Huai ni chiang in khelhna leh nitna siangsak ding in, .....tuikhuk kihong hong om ding” a chi hi (Zekeria 13:1).

Jesu’n “Kuapeuh a dang a takleh ka kiang ah hong pai henla, dawn hen” chia chialna a bawl lai in mipite lak ah kintakin kikhenna hong ompah hi (Cf. Johan 7:40-43). I lungsimte uh a gitlouh ziakin, puksesa i hih ziakun, Amah mai a i kun noplouh ziak un, Jesu tuh kikhenna bawltu a suak maimah hi. 

Tulai khovel kipumkhek chihtheih ahita hi. Khrist Jesu nungzuite’, khovel ah tuambawlna leh haksatna I tuak lellel ua, I tuah ding uh maban ah leng tampi omlai ding hi. Jesu ziak a kikhenna hong kigen uang semsem dinga, mi khenkhat a ding in Jesu thil tengteng sang a lungkimna bulpi ahi dia, khenkhat in Jesu bangmah in a ngaikei ding uhi. Gingtu hinkhua chidam I neih theihna ding in Jesu apan tuihing a tam theilam dawn a ngai hi. 

Na dang atak hia? Hawm I kisa uhia? Bang dangtakna na nei hiam? Jesu chialna nial lailai ding na diam?

............…………………

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message

HUIHPI LAUHUAI LAKAH

I tenna khovel Pathian in a’ thu tungtawn in bawlkhia hi. Huan, hiai khovel hih thil chi tuamtuam omkhawmna mun dinga bawl leng ahi. Huaiziakin, hiai khovel ah hoihna kia hilou in, siatna leh huihpi lauhuaitak in leng tenchilh hi.

April 12, 2018 ni in ka email ah Change.org akipan laikhak khat a hong lut hi. Huai ah, kum 8 lel numei naupang khat Ms. Asifa tuh sualluih leh thah a om ahihthu taklang uhi. Huaiziakin, India solkal in justice a omna dinga pan kintaka a lakna ding un nang leng petition sign in chih a hon gelh uhi. Lungsim hon lawngkha mahmah hi. I tenna khovel tuh siatna genvuallouh a sia ahi chih a chiang mahmah hi.

Kum masa in, Evan. Lang Do Khup leh a team in Lamka a St. Paul’s Institute kichihna ah “Huihpi Daisakpa” kichi thupi pansan in Revival Crusade hong nei uhi. Huai hun ah, Lamka khopi tuh siatna huihpi thupitak in tuam ahihdan, leh, huai akipan suahtakna dingin khitui toh chialpina hong nei uhi. Huan, kum 2015 akipan Tuailai 1434pro kichite’n i gamsung uah ‘diktatlouhna’ huihpi hat mahmah ahihman in ‘diktatna’ lampi a kik dingin mipite chialna nei in, program liantaktak saikhia uhi. Amaute thugen i ngaikhe tatak uhiam chih huai hun in theih ahikei hi. Himahleh, i limsaklouhna gah uh tunitan i minam in lou toutou lai i hikha moh kei ding uhi.

I tenna khovel hih Huihpi lauhuai taktak in hon nawk den ahihman in huai akipan i bit na uhiam chih ki-etthak poimoh hi. Nasepte 27 ah Paul tuh hensa in Long tungtawn in Rome zotpih in om hi. Amai uah Huihpi hattak maituah ding uh ahihdan a hilh hi. Himahleh, amah enkoltu Sepaih heutu in a limsak kei hi. Huchiin, a nung sawtlou in a tuanna Long uh Huihpi in hon nuaita hi. Dam a suahtak ding tuh ngaihtuah ngam ding hilou hi. Hiai mite’n leng limsaklouhna gah hon louta uhi.

Himahleh, Paul in Jesu a muanna nga dingin a tuanpih mite hanthawn hi. Aman “…khamuangtaka om dingin kon hasuan” a chi hi. Aman huchibang a, lauhuai leh beidot hun in leng Pathian a kianga omgige ahi chih a theichian hi. Huai Pathian in a hon thuchiam bangin I tung uah hong tung ding ahi chi in, a nna a sep Jesu min amaute kiangah puangzak hi. Paul in Huihpi Lauhuaitak Lakah Pathian Muanhuai Ahi chih a theichian a, mite hasuanna dingin zang zaw hi.

Eite leng, hilhkholhna limsaklou mite bangin Huihpi Lauhuaitak Lakah khosa lel i hi khamohkei ding uhi. Himahleh, Paul hinkhua akipan zil ni. Jesu a muanna nga in, Pathian i kiang a om gige ahi chih phawk in, hiai thutak ah dingkip le hang, i kim a om midangte’n leng bitna a ngah ding uhi.

............…………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message

HANGSANNA IN VUALZOHNA A TUN

Mihangsan kichi kuate ahi ua? Mi giloute, huham leh kihtak neilou a gamta miatmiat mite khong hangsan bangin a kilang masa uhi. Nidanglai khong a tuailai hangsan chih a omte kitehna nitak nung a hanmual/ luidung hoh chih khong ahi. Banah, thupiak zui mite leng mi hangsan ahi uh. Sepaih galdou mite’n a tung ua thupiak petu a muang ua, thupiak om bangbang hangsantak a hon sepsuah chiang un galhang a hong suak uhi.

Israel khangthu i etleh, Pathian in Mosi zangin a mite saltanna ua kipan pikhia hi. Tuipi San a kanpih a, nek dingin Manna, dawn dingin tui suangpi akipan a lakhia hi. Sun in meipi leh nitak in meikuang in a pi hi. Pathian’ kilakna DAN tungtawn in Sinai tang ah piak in a om uhi. Pathian ompihna in Mosi nuselou hi.

Pathian a thuchiam a pel ngeilou in Israelte makai Mosi sih nungin a taisan tuankei hi. Joshua in kum tamtak Mosi nung ana zui in, Pathian ompihna hun tamtak ah ana chiam khinta hi. Tua, ama makaih hunta ahihman in Pathian in Israelte makai dingin a houpihta a, huai ah THUPIAK a pia hi. Huai thupiak ahihleh “HANGSANTAKA OM DING” chih ahi (Jos.1:1-9).

Pathian in Joshua kianga, a thupiak a piak ziakin, aman thupetu a muang a; hangsantakin thupiak a zuita hi. Huai thupiak tuh: “..nang leh hiai mipi tengteng in Jordan lui kan unla, ka hon piak gam ah pai un” a chi hi. Jordan lui khe a pal gaikai ding ahikei hi. Huan, a luah ding uh gam Kanan gam leng Numbers 13 a kimu dungzui in awlsamtaka luah ding ahikei hi. Amaute’n gamchiam a luahna ding un haksatna in a pel tuankei chih a chiang mahmah. Joshua kiangah hiai thupiak piak ahihlai in, mipite phun dingdan, lauthawng leh dipkuathuaitak a om ngei gintakhuai hi. Joshua kiangah na ngaptan bang ahia chih dot ahikei ahi. Eite’ leng mahni utna leh lunglutna pelampek a Pathian in a nasem dingin a hon sam ahi.

Joshua vualzohna ding tuh a banah chiangsem hi: “Mosi kianga ka gensa bangin, na khepek ua na sikna peuhmah uh k’on pevek ding.” Kanan gam va luah ding baihlamlou ding ahihdan I genta. Democratic taka thupukna bawl ding hi leng tuh 12 laka 10 in ngaplou uh ahihman un tawpkik a ngai ding hi. Himahleh, na khepek un a sikna chiangchiang uh noute luah dinga hon pe ding kahi Pathian in chi ahihman in, Pathian muanna loungal hon kalsuansak ding a om takei ahi.

Banah: Pathian thutak a na om gige leh (Jos. 1:6-8), “na damsung teng kuamah himhim in hon nangzoukei ding” a chi ahi. Huai dingin thil thum a poimoh mahmah a om hi:

a) Hattak leh hangtakin in om ding.

b) Mosi dan zuih ding, kam in pawtsanlou ding leh sun-leh-zan a ngaihtuah ding.

c) Pathian ompihna tuh vualzohna ahi.

Hangsan dinga thupiak petu Pathian ahi chih Joshua in theichian in a muangngam hi. Huchiin, Israelte gamchiam gam Kanan a lutpih ahi.

............…………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Easter Sunday Message

LAMPI DAI LEH THAWMHAU HUAI

I kim-le-kiang a thiltungte'n lungsim hon khoih a, patauhna, thawmhauna leh theihsiamlouhna in hon amhaisak hi. Hiaibang hun buaihuaitak a i dinlai in, Jacob in a inkuante kiang a, a thugen a thak in ngaihtuah ni. Jacob a U Esau lau in gamdai ah taimang hi. Jacob lungkham mangbatna toh beidong taka a omlai a, a thiltuahte Jacob in a inkuante kiang ah hichi'n gen hi. "I thou ding ua, Bethel ah i paitou ding uh; huchi'n, ka lungzin lai a hong dawng, ka Pathian a dingin maitam ka doh ding hi,” a chi hi (Gen. 35:3). Jacob lungkham mangbang leh beidong a, galmuangloutaka a omlai in a kianga om a, a thumnate dawngtu kua ahi a chi a? A inkuante bang hihpih dinga chial ahia, bangchi bang a kisakhol dingin a gen a, chihte ngaihtuah thak ni.

Tuni a galmuanglou, beidong leh lungkham a i om lai in kuan, ahihkeileh, bang in hon ompih hi'n i thei a? Lam-etna nei nawnlou kisa a, mahni kichimtaakna toh hun i zat leh lauhhuai leh lohsaphuai mahmah hinkhua zangkha hi ding hihang!

Emmau Lampi a pai lawmtate'n huai hun lai a Jerusalem leh a sehvel a thiltungte leh vaihawmte thilsaidante a lam-et uleh gintakdan banglou ahihman in lungsim a mangbang leh thawmhautak in khualzin lampai uhi. Ahihhang in, Jesu chial ua, a thil etdan uleh ngaihdan uh hihvak in om hi (Luke 24:13-35). Jacob in a mangbat lai a, a kiang a om a, a thumnate dawngpa a theihchet bang a, en leng i theihchet leh i inkuante toh Toupa a ding maitam doh thak ni hang. Tua bang a theihchetna nei khalou ahihkeileh nei nailou i hih lehleng Emmau khua zuan lawmtate bang in tuni'n Jesu chial ni hang.

David leh a lawmte khasiat dan Laisiangthou 1 Samuel 30:1-8 ah i mu hi. David in, huaite delh leng ka delh pha lai diam? chi'n TOUPA a dong. Lungkia leh lam-et bei kisakna toh mahni kichimtakna toh vuallel hinkhua ana zangkha i hihleh, Toupa dong in chial ni. Gideon kiang a Pathian in vualzohna mihing hatna zang a pelou ahihdan Vai. 7:2-8 ah i mu hi. Huan, Jawlnei Jeremia tungtawn a Pathian in "Kei mihing tengteng Toupa leh Pathian ka hi. Kei dingin thil ahihkeileh thu haksa lua a om ahia?" (Jer. 32:27) chia a gente phawk in, a thak in Jesu chial ni. Amah chialte, i Toupa'n nial ngeilou hi.

Amah chialte i Toupa'n nial ngeilou,

Tua chi'n a kiang ua khawl in ompih denta,

Khamuanna tul theilou a peta,

A kiang uah teng in a ompih denta.

............…………………

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.