Palm Sunday Message

PAHTAWINA PIA

I Toupa Jesu Khris leitunga kum 30 val vingveng hong vaklai in khatvei sunsun pattawi in om hi. 

Pahtawi i chih in eisang a lianzaw, thupizaw ahihna phawk a, thupina pia, phat a, bia a, amai a kingainiam chihte genna in la le ki genkhiallou ding hi. Thilsiamte'n a siamtu a zahtak ua, a biak ua, a mai a kingainiam gige a, a om ding uh ahi. 

Ginglou mite'n amau thilbawlte bia ua, ei gingtute'n a hon siamtu i bia un i pahtawi uhi.

Hosana - tu'n hondam in. Hiai Palm Sunday a pahtawi a, a omna in a hong pai nasan (reason) a langsak mahmah hi. Aziak "hosana" kichi in a gennop "tu'n suaktasak in (save them now)" chih ahihna ah. Jesu'n sabengtung nou a sut khiaksak mah bangin eite leng khelhna apan hon tankhia a, ei a tatkhiak sate'n mialnuai a tulaite, Setan henkol bulh a omte va suahtaksak ding i mohpuakna uh ahi.

Sabengtung nou sanga Jesu a kimuh chiang zawk mah bangin  i omdan khohei khempeuh a mite'n Jesu amuh chiang ding uh ahi. Khenkhatte'n a omdan uah Jesu pahtawi lou in amau kipahtawi khanak uhi. Jesu pen a tung uah tuang saklou in amau Jesu tung ah tuang khanak uhi.

I Toupa Jesu Khrist pahtawi a Jerusalem khopi a lutlai in, mipi tampi in a nunglam leh a mailam ah a zui uhi (Matt 21:6-9), Amah pahtawina in kikou in gamlum mahmah uhi. 

Mikhenkhatte thawmging in a hip a, Jesu hihna diktak theilou, mimal a Amah tawh kizopna le neilou ahi ngei ding uh. Huaiziakin pahtawina in sawt a daih kei. Eilak ah hiai mipite toh dinmun kibang I omkha ding uh chih a lauhuai hi. A hihna diktak thei a, mimal kizopna hoihtak nei a pahtawi ihih uh kisam hi.

Jesu Khrist Jerusalem a pahtawina tawh vualzou tak a lut bangin, tunung chiangin thupitakin leh vualzoutakin a hong painawn ngei ding chih thei ni. Van angelte pahtawina kikou husa thupitak tawh, meipi lak ah Kumpi Thukhentu in a hong paikik ngei ding. Huai hun chiang in lei (tongue) tengteng Amai ah kiphuang ding ua, khuk khempeuh Amai ah khukdin ding ua, Amah Jesu Khrist kumpi hihna phawk a, mimal hondampa dia ana pomta gingtute a dingin bel tuani a bukim  a tatkhiakni thupi ahi ding a, himahleh, kiliansak a, Jesu Khrist mai a kingainiam utlou, Amah ana nialte a dingin gimthuak dia mawhpaihna ni ahi ding. Khat zawzaw ah I tel ngei ding a, tu hun deihtelna bawl hun ahi.

“En in ahong suk meipi tawh, Giloute adia thahpa …” Tua hun in mi khenkhatte’n  “mualte aw hon delh lum un..” chiin a mau tuaituai ding ua, mi khenkhatte ahihleh Toupa tuak dingin meipi lak ah thupitakin laktouh in I om ta ding uhi. Koipen ah na tel kha dia? Toupa tuak dingin kimansa in om in Unau! Tuni'n Toupa Jesu bangchi bangin pahtawina napia a Hosana chih mai a bei mai di ahi diam!! 

............………………...

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message

BANG IN HON KIPAK SAK A?

(What Makes You Happy?)

Pathian thutak pansan a lehkha gelh kichi a thupina mahmah khat hi a ka theih tuh simtute mai hilou a gelhtute tanpha khalam a chawmtu hoih mahmah ahihnatak ahi. Hiaibang geih in Pathian thu gente leh a la sate leng ahihthou ka gingta. Chin pen leh hoih bukim pen hikei mah lehang ei mimal ban ah i mi hinpihte adi'n vualzawlna thupitak a tun thei. Gelh tam semsem a thanophuai ngoihngoih. Hiai ngei tuh hon kipaksakte lak a khat leng ahi ngal.

Mi siamte gendan in naungek in nu gilsung a omlai nangawn in dahna leh kipahna theikak theita ahi chih ahi. Ahi a, hiai naungek in sia-le-pha thei nailou ding ahihman in a dahna ding leh a kipahna ding thu ah deihtelna nengchik leng a neih ka gingkei. Hiaibang ahihziak in tuni'n sia-le-pha theikak thei tuailaite kawk deuh in i thupi pansah uh 'Bang In Hon Kipak Sak A?' chih kikum lehang i chi.

Lance Betreal kichi tangval khat in pawngsual thubuai a neih ziak in damsung Jail tang di'n thutankhum in om hi. A thilhihkhelh ah kisik ngoihngoih mahleh a tang ngai thouthou. Mi gilou ngen kikhumkhawmna Jail ah pawngsual thubuai ziak a lut ahihman in mite simmoh leh engbawl a loh diak. Haksa sa mahleh amah adia kibawlhoihna mun hi a, a theih ziak in hiaite a tuah ding ngei hi'n a koih. Jail a kipan taikhiak ding a ngaihtuah ngeikei himhim.

Hiaibang a hinkhua a hon zat lai in ni khat a nu a kipan in lehkhathon a mu a, a pa damlou gim mahmah ahihdan hilh in a om hi. Hiai thu in a lungsim naktak in a kheng. A pa damlai ngei mel muh a thil hihkhial ahihdan hilh a ngaihdam nget ding tuh a thiltup thupipen a hong hita. A damsung a, a kipahna ding omsun tuh a pa ngaihdamna kia ahita. Hiai a thiltup sepsuahna ding in kong khat kia a om huai bel Jail a kipan taikhiak ding chih ahi.

Sih-le-hin kal ah a lawmte mi nih toh kithuah in a hong taikhe thei khong. A thiltup a pa kiang a ngaihdam nget ding chihpen a hih pichin a, kipaktak in a omta. Sawtlou in Police in hong man nawn a himahleh a kipak veve. Jail a tunkik kha nih nung in a pa'n a sihsan. A pa ngaihdamna thei man ahihman in pawna mahleh kipahna khat a nei thei hi.

Awle, tuni'n Lance Betreal bang in pawngsual thubuai nei in Jail bang i zut uh ahikei maithei, himahleh khelhna khat lel leng ka neikei chi ngam kua i om uale? Laisiangthou ah Eklijiasti 11:9 in "....na tuailai in kipak in: na tuailai nite ah na lungtang in hon kipak sak hen..." a chi. Ahihleh bang in a hon kipak sak ale? Na kipah mahmah lai hun khat ngaihtuah kikmah dih, a khonung a hon dahsak ding kipahna lel ahikha hiam? Na sia-le-pha theihna in hoih lou ahihdan hon theihsak nung a sa utna pichin teitei mi na hikha hia?

Hiaibang na hihkhak aleh tuni'n Eklijiasti 11:10 in a gen ".... na sa a kipan gilou koih mang in: tuailaina leh khanlutna lah bangmah lou ahi ngal a" chih theihthak a hoih ding. Huan, Lance Betreal in a thilhihkhelh kisik a dinmun haksatak tawn a, a pa kiang a ngaihdam a nget in a lungtang ah kipahna liantak a tut bang in tuni'n i mi hinpihte leh Pathian kiang ah i thilhihkhelhte ziak in ngaihdam ngen lehang hun dang sangmah in lungsim ah kipahna det zaw i nei thei ding uh. Hon kipak sak thilte tuh Pathian delhlam kipahnate hileh hinkhua kisik ngoihngoih a zat chih a omkei ding. 

Toupa’n hon vualzawl hen!

.......................................

©ReACH:GWM-3E/3

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message

JERICHO LAMPI AH

Philip Yancey Laibu What so amazing about Grace kichi ah hiai bangin a laibu piankhiatdan a hon pan ahi. Kum 1987 in, IRA-te’n bomb hattak a khiat ziak un Gordon Wilson leh a tanu kum 20 mi leinuai feet 5 ding bang ah tumsuk uhi. Hiai bomb hat mahmah ahihman in, midang kuamah suakta lou in, Gordon kia suakta hi. Aman: “Ka tanu ka tan, himahleh amaute huatna ka neikei. Ka thum ding, tunitak leh nitak teng in, huchia Pathian in amaute a ngaihdamna ding in” a chi hi. Hiai kammal in mite bil deng mahmah hi. Aman khovel kiang ah HEHPIHNA kichi bang hihiam chih langsak hi.

Jericho Lampi hih lampi lauhuai a kigen ahi. Jerusalem apan Jericho khua feet 4000 bangin niamzaw a, huaiziakin lampi ken in suk petmah a, suangphom lak leng ahi. Huan, suamhat leh migilou a tam ziakin hiai lampi tuh “sisan gimnam lampi” a chi hial uhi. Huai lampi ah Judami khat lok in om a, a puante a suahsak ua, naktak a vua in, si phial in lampi ah nusia in taisan uhi (Cf. Luke 10:30). Huan, huai lampi ah Siampu leh Levi-mi in a tuakkha ua, himahleh a taisan tuaktuak uh. Huchiin, Samari mi khat in a tuakkha a, a hehpih mahmah hi. Samari mite tuh Judate adia melma bangmai ahihman un Judami khat a don ding tuh thil lauhuaipi ahi. Himahleh, huai lauhna tengteng phawklou in hiai mi liam pen a don zawta hi.

Tulai i gamsung uah hiai banga hihtheihna suahkhiat theih ahi diam? chih dotna tamveitak ka lungsim ah hong kidong hi. I kim-le-kiangah beidong, patau leh chimoh a panpihngai om uh ahihlam theiphalou i bat hun uh om ahihman in. Saptuam adia hahpan mahmah, a lubawk tamtak inn kong ah, inn zul ah huchibang muh ding om leng ahikha maithei. HEHPIHNA kichi theichianlou i hi maimah uhia?

Jericho Lampi ah muhtheih in HEHPIHNA omzia Samari Mihoih in taklang hi. I tenna khopite uh leng Jericho Lampi banga khalam dinmun a kensia leh lauhuai mun ahihman in tuahsia tuak panpihngai a om gige uhi. Huchibang minu/ mipa tuh na lawm, na tanau, na inn veng, leh na melma leng ahithei ahi. HEHPIHNA omzia theichian mi a dingin huchibang hun a panpihna piak ding tuh Pathian’ hon phut ahi. Jericho Lampi ah bangchibang mi na hia chih semkhia in.

............…………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message

A CHIAMTEHNA BANG?

Naupanlai in MLA Election ding khat ah hiai bangin candidate pa workerte hong kikou uhi. Kua ahia I vote ding uh? A chiamtehna bang? Huchi banga kikou a kizak chiangin naupang hon in a kidelh duamduam mai hi. Nikum jek in leng kitelna i maituah ua, a nungjuite’n candidate hong pai chiangin awng zuazua in, flag toh diang in, a poimoh penpen vote khiat hun a theihkhelh ahihlouhna ding in chiamtehna (symbol) hawmkual in, dur mahmah uhi. Chiamtehna a poimoh petmah ahi.

Kum 99 a upa Rev. Dr. Billy Graham in a leitung nasepna gah, zarzou ding in February 21, 2018 in a tenna inn, North Carolina ah Toupa’n tawldamna a peta. Tampite’n a tanchin i za ua, a thupina leh a nasepkhiatte Facebook, WhatsApp chihte ah i hawmzak zungzung uhi. Kumzabi 20na adia Evangelist minthang penpen, mihing 215 million kianga tanchinhoih gentu ahihdan i thei uhi. Aman, a tanchin laibu a, a gelhna ah: “Just as I am” chih a thupi dingin zang hi. Jesu Khrist mai a mi kingainiam ahi. Aman theihtawp suah in, amah a om thilpiak semsuah hi. A vuina program ah, a hinkhua tanchin mi tuamtuam leh a tate’ gente YouTube tungtawn in kana en a; ka ngaisang semsem hi.

Achihleh, Rev. Dr. Billy Graham bangchibang in na chiamteh? ‘Lie in Honor’ kichi US in gamsung mi thupipente zahna ana piakna uh ahi. America khangthu adi’n private citizen hiai bang zahna piak a omte lakah Rev. Dr. Billy Graham a li na ahi. Huai hun in Senate Speaker Paul Ryan in, “Here lies America’s Pastor; a man made great, not by who he was, but by who he served” a chih in gen thupitak a nei hi. President Donald Trump in thum mi ahihna gen in: “America is a nation sustained by prayers…legendary Billy Graham, an ambassador for Christ, who reminded the world the power of prayer and the gift of God’s grace” a chi nawn ahi. Hiai mite kammal banah, Rev. Dr. Billy Graham chiamtehna thupipen hi dinga kana lunggel, tomchik in gen ding hi leng: “Kha mangthangte Jesu khebul tuntu ahi” ka chi ding ahi.

Tuni’n hiai ngaihtuah leng uthuai ka sa ahi. Mite’ hon chiamtehna bang hi in na thei? Na tanchin thuvual khat a gelh ding hilechin, bang thu na gelh dia? Rev. Dr. Billy Graham thupina penpen tuh kha mangthangte Jesu khebul piluttu ahihna ahi. Laphuaktu Charles C. Luther in “Ka hondampa toh kituak dingin” chih laa ah hiai bangin gelh hi.

“Must I go, and empty handed?”

Must I meet my Savior so?

Not one soul with which to greet Him,

Must I empty handed go?

Unau, nang mi bangzah Jesu khebul na tunta a? Khutvuak in na Toupa na maituah ngam na diam?

………………………....

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.