Sunday message KUA KIANG NA TUN!!

"Ka pumpi uah chiklaipeuh in leng Jesu sihna ka pu zel ua, Jesu hinna leng ka pumpi ua a lat theihna di'n" - 2 Korinte 4:10

I tenna khovel i etchiang in, hamsiatsa khovel zaw hitaktak mah e! chih niteng a  muh leh zakte'n hon chian semsem hi. I khualzinna khovel ah, haksa i sakni, nuamsakni leng om hi. Paul in "Ka pumpi uah chiklaipeuh in leng Jesu sihna ka pu zel ua, Jesu hinna leng ka pumpi ua a lat theihna di'n" ana chi hi. Paul in Khristian hinkhua ah Jesu sihna paw gige le, a hinna  akilatna ding in a chi hi. Niteng i hunzatna a, sih sangin, hat kisa a midang hatlou, bah leh liamte bang simmoh bawl a i omkhak ding ki-et huai mahmah hi. I hatna dingin niteng i hunzatna a i sih gige a Jesu a i hin gige a poimoh hi. "Hiai thugen a dik hi: a sihna a I sih khit ngalleh, a hinna ah I hing ding hi" 2 Timothy 2:11.

Jesu'n mi lungkham-liangvaite panpih, a liamte sukdam, hatloute, damloute damna piak . “...chidamte’n Doctor kisamlou a, chinate ahi zaw doctor kisam” (Mt. 9:12). Tuni in unau panpihngai in na kithei hia? Ahihkei leh panpih le ngailou a hat leh buching hi in na kithei hia? Jesu’n a panpih utte zaw hat kisalou leh puakgik neite ahi. Pharisaite bang Sahkhua lam ah hat a kisa mahmah ua, chin le a kisa ua, Dan thei a kisa ua, Dan bang inle a gamta ua, sawm-a-khat diktattak in a pia ua, dan zuiloute bang suang in a denglum sek uhi. Sahkhua na lam ah a buching uh ahi mai. I Toupa Jesu’n Doctorte, chidamte’n poimohlou a chih lai in a gen ut tak ahihleh, sahkhua na a chin kisate a genna ahi.

"Semgim leh puakgik pua noute khempeuh ka kiang ah hong pai un, keima’n tawlngak khawlna kon pe ding" Toupa Jesu’n a chi hi. I hatlouhna i kitheih a, puakgik i neih a, i puakgik pen ei kia a pawzoulou i hihlam i kitheihleh, Jesu’n ka kiang ah hong pai un chi ahi. Na puakgik a gik mahmah leh nang kia in paw kenla, na mihinpihte kiang a na tai leh na vanpuak hon behlap sak ding uh a, a gik semsem zaw kha  hi. Himahleh, Jesu kiang ah vatun lechin Aman hon na dawn ding a mansa ahi. Na tate ziak a haksatna, insung khosakna a haksatna, sepna lam a haksatna, nu-pa kala haksatna hiam Khristian hinkhua a haksatna na neih leh lungkham a kuiku mailou in ginna toh Jesu kiang zuan lechin Aman honna panpih ut gige ahi. 

Jesu a lawm hoih i neih dan,

I gitlouh dahna paw ding;

Aw, lungmuanna tam i na tan,

Aw, nat thuaklouh ding I thuak;

Amah I hilhlouh vang hi e

Hatlou leh gik pua'n I om hiam

Damsung khosak ngaihtuahna'n?

Simmoh leh ngilh-in na om hiam?

Toupa kiang thumna'n gen in;

A angsung ah a hon pom ding,

Lungmuanna tua'h na mu ding.

............…………………

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message KA INNVENG PA

Phalbi ni khat khua vot lua ahihman in, Varandah ah nilum awi dingin ka tukhia hi. Huihzang a ngat mahmah mai a, mei a kai ziakin nisa leng a kilang hilhial hi. Lumtham chiahkei mahleh, dinkawm in ka inn kimvel ah dakkual in, hun sawtlou ka zang hi. Huchihlai in, ka muhngeilouh ka innveng pa leh a thilhih kamuta hi.

Aman a lutung ah lukhu neukha khat a khu a, puanngou in a kizem hi. Inntung (terrace) ah phek lianlou a phah a, khukdin kawmin a mailam ah, a tal in leisi in a kun ngaungau hi. Huai akipan in Islam sahkhua akipan ahi a, Mecca lam nga a thumna nei eive chih ka theikhia hi. Huan, ka veilam ka etphei aleh, putek khat, noupi khat a tui a lutung a koih kawmin singnou khat kim ah a ki vialleh nilouh a, huaikhit in a tui in huai singnou a buak kamu hi. Oh! Pathian bia eive maw, ka chi a, ka lutsanta hi.

Ka lutsan hangin, ka ngaihtuahna a hiai mi nihte omdan ka mitkha ah hong kilang zel hi. Bangziak a pathian lem bia mite nangawn hichi lawmlawm a ginom uh ahia dia aw! Achihleh, ei gingtute’ adia sinlai hoihtak hon pia hilou hiam chih a hon ngaihtuahsak hi.

Exodus 20 bang i etleh, Pathian in noute Egypt gam akipan hon pikhetu kahi, ‘Kei’ loungal Pathian dang na nei ding uh ahikei, a chi hi. Huaituh, ‘hon bia un’ a chihna ahi. John 4:24 inleng, Pathian tuh Kha ahi a, kha leh thutak a biak ding ahi a chi hi. Romete 12:1 in kithoihna hing, siangthou leh Amah lungtuak dingin om un, huai biakdan dik ahi a chi nawn hi.

I kim a ginglou mite’n kipezoutak a biakna a neihtheih uleh, bangziak a ei Pathian dik nungzuite’n kha leh thutak a be thei mahmah lou? I zuausan ua, mahni kikhem in I bia uh. I lungtang un lah amah sangin khovel thilte a lunggulh zaw lailai. Sitkhen nei in Amah I bia ua, huaiziakin biabia mahlehang I lungkimsak zou tuankei uhi.

Hiai ka innveng, ginglou mite biakna leh kipumpiakna in chouna thupitak hon nutsiat uhi. I salam kicheina vanzatte uh nusia in Amah biakdan dik a be dingin kisathak ni. A lungtaina ding a hon lamet tuh, ‘sit neilou a biakna ahi.’ Huai dingin simtute I kichial thakthak uhi.

............…………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message ITNA ZAW KIZOPNA AHI

“Pathian in eimau a dia a neih tuh I thei ua, I gingta lai uhi. Pathian itna ahi; itna a om gige tuh, Pathian ah a om gige a, Pathian leng amah ah a om gige ahi.” 1 Johan 4:16

Bangchi’n Pathian hon itna phawk sem in i omthei dia? Bangzahta in hon it mahleh nang na phawk a nana theih keileh, hiai in nang a phattuamna tunlou diing ahi. Mi khat in hon it a hon ngaina ahi chih hon latsak chiang in nuam na salaw vele maw? A ziak tuh kuahiam khat it a om hivechin. Pathian in hon it a, huai hon itna hon lak ut ahi.TOUPA toh niteng hunteng in kithuah theile  Amah deihdan ahi.

Mimaltak in Pathian toh kizopna i nei uhia? Hun sawtpi paita a hotdamna hih ziak mai a Amah toh kithuahna nuam leh manpha zangkhawm chihna hipah samlou ahi aw. Hiai khovel zatak mai leh a sung ah, Pathian’ nna sep leh A’ kipahna zon kan a uthuai/ teelhuai zaw bel thildang bangmah a omkei.

Mi khempeuhte sungah Pathian piansak a vang (God-shaped hole) om hi, tua pen Pathian kia in hudim thei hi. Thildang, na deih hiam, na ut hiamte’n huai vang i gen hudim thei mawklou uhi.

“Jesu ana saang (received) khin thamta keive” na chi le ahimaithei. Ahihleh, niteng hunteng leh munteng ah Jesu na saang na hiam? Pathian’ hon itna na ginglel hiam? Pathian in hon it a, nang pen A deihtuambiik na hi. Amah toh kithuah di’a hon siam mihingte i hi. Hiai kithuahna tuh A lunggulhpen leh nang lam a A’ lungput diktak ahi. Thilteng pailiam a bei zel, hilele a om gige gen theih omsun tuh Pathian ahi. Tua hilel veh aw. Amah toh kizopna (relationship) i neih kei ua ahihleh, tua kizopna bawl tuak pah ahihkha diing.

Nang hihtheihna sunga ginna tungtawn a lohkhiak na sawmte tawpsanta inla, ginna a Pathian’ itna muh leh thilhihtheitak hih na sawmna tengteng tawpsanta in. Pathian hon itna bangzah a lian hiam chih ngaihsut in I nei ngei hia? “...Pathian zaw itna ahi a, itna a om gige mi tuh Pathian ah a om gige a, Pathian leng amah ah a om gige hi.”

Mi khat, nang hon it mahmah ahi chih na theih chiang louhpi kiang ah na lungsim a omte genkhia in itna leh zahtakna bangchi’n na pethei mawk dia e? Nang hon it a, na thugen hoihtak a ngaikhe ding ahi chih na theihsa mite lak nuam nasa ahizaw. Pathian na ki-it sakna tungtawn a vualzawlna dangdangte zong hong pai ding ahi – ginna thupizaw, khelhna tunga vualzohna, hihdamna leh kipahna. Huaiziakin kal suankhia inla, kipan in. Pathian na hun hoih (opportunity) pe lechin, Amah toh kithuahna nuamtak neihtheihna dan Ama’n hon sinsak ding ahi.

Pathian in hon it chih I theihna in Amah muanngamna leh A’ ginomna a kingak ngamna hon pia ahi.

Simtute Pathian thei leh nei mai hilou a, Pathian in hon theih leh hon itlua ahih dan theih leh ei Amah a om a, Amah leng ei a om hithei ding in i lungsim, i pumpi Amah pe ni.

(Reference book :Joyce Meyer

Tell them, I love Them)

.........................................

©ReACH: GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message A VAK KIUKIAU

“A vak kiukiau” i chih chiang in ngaihtuahna ah banghiam pahtakhuai taka vak khat om chihna a bang hi. Mitkha in naupan lai a putuan, vak kiukiau, bang hon phawksak hi. Pindan neukhah sung lel a dingin putuan a phatuam hi. Huai le zankhovak a det ding kinei zoulou hilai! Pathian' vualzawlna i tang ua, tuni chiangin electric vaklouh hun a leng detvak ding meivak hoihtak kineita hi. Khosakna lam ah vak kiukiau nawnlou a, vakpha pempom dinmun kihita hi.

China gam ah nupa khat a om uhi. A pasal ginglou mi ahi. A damtheihna hoihlouh ziakin kilohna ding mutheilou hi. Innkuan khosakna ah hong buai chiang un, nidang a om ngeilou buaina hong om panta hi. Melmapa Satan in mihingte hatlouh huntak mah ana ngak khinkhian gige ahihman in (Cf. Mat. 4:1-10). Tua numeinu tungah ngohna dikloutaka a teknu akipan hong omta hi. Huaituh, na pasal damtheihlouhna ziak na Pathian biak diklouh ziak ahi. Huaiziakin, na tawpsan a, i pupa khang ua i biak uh pathian nang leng na biak sam ding ahi. Huai hileh, na pasal dam ding ahi, a chita hi. Himahleh, a pasal in a nu kiangah, nu aw, ka zi kia ginna huntawklou hizaw ding ahi. Nang leh ken leng huai Pathian bia hileng dam zaw ding ka hi a chi hi (Ref. Daily Bread 2017/ Nov. 10).

Matthai 5:16 in, “na vak uh mite mitmuh in vak hen….” a chi hi. Vak piaka om ihi uhi. Huai vaksak kiukiau ding thil poimoh mahmah ahi. Himahleh, ei a om khelhna in huai a vak kiukiau ding pen khuhmang gige hi. Huai hon daltu hawkkhiat poimoh chihna ahi. Achihleh, bangchi hawkkhiat ding?

1 John 1:9 in, “I khelhnate thupha I tawi leh, I khelhnate, ngaidam ding leh, i diktatlouhnate tengteng silsiang dingin amah tuh a muanhuai in a diktat ahi” chi hi. Isai 43:25 in, “Kei, kei mahmah, keimah leh keimah jiak lela na tatleknate uh nulmangjel pa ka hi; na khelhnate uh ka theigige kei ding” hon chi lai hi. Hiai Pathian’ kammal muangngam le hang ki vak kiukiau ding hi.

Gospel i ngahna uh toh ki-enkik leng, vak kiukiau maimai hilou a, vak pempom hun hita ahi. Himahleh, i na khialta uh. Pathian hih ngaidamtu Pathian ahihman in i hampha uh ahi. A mialsa vaksathei Pathian ahi. Huaiziakin, ei a om ‘vak’ khuhmang in omta mahleh, Amah kiangah kiknawn le hang, Aman hon vak kiukiau sak nawn ding ahi.

................………………

©ReACH:GWM-3E/02

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.