Sunday Message LAUHNA APAN SUAHTAKNA

“Pathian in launa kha a hon pekei a, thilhihtheihna leh itna leh kithuzohna tak neihna a hon pezaw ngal a" - 2 Timothy 1:7

Hun dang in hiai Laisiangthou simkha zel mah leh tu 2017 mid-night service hun a ka dohkhak in, lungkia leh thanem a ka omlai ahih man in ngaihtuahna tampi hon pia in ka mu hi. 

Pathian in launa kha hon pelou leh Amah angsung a itna bukim a, itna bukim in launa a hawlkhia, huai itna bukim tuh Pathian ahih dan ka thei chian semsem hi. Pathian hon itna theihna nei in, Amah ah muanna nga in ginna a kalsuan hi a i kithei lai in kim-le-kianga thil hoihlou hong tung zelzelte apan Setan a hong kipan a, Pathian hon itna  hamphatpihna hinkhua apan hon khenkhiak sawm in, "Bangziaka thil hoihlou ka tunga hong tung a tamai ale? Mulkimhuailua thilkhat hihkha ka hingeingei diing. Pathian in kathumnate dongtak salou hiding eive” chih ngaihtuahna hon omsak hi. 

Huaitakin Pathian ma-a muanngamna mansuah in, kimuang zoulou nana tuh Ama’n a hon panpih theitakei hi. Pathian in hon it ahi chih ka theikei leh bel muangngamlou di, ginna a dingkip theilou diing, mah kahi. Setan hon kuanpih launa leh kimawh-sakna ahi banga kana pom leh Pathian in bangzahta a hon it hiam chih theilou ka hi hi.

1 Johan 4:18 in thuchiang mahmah gen anei “itna bukim in launa a hawlkhia.” Pathian in  a hon itna bukim dan theih chiang in, thilsiam chiteng lai ah bangmah lauhuai sak a omkei diing.Pathian in hon it ahi chih theisiam pah hileng lauh neih diing thil hitheilou ahi.

Pathian in hon it ahi chih na theihleh lawhsap diing lauh chih thil hitheilou ahi. Pathian a kinga na hihleh na lawhsam theikei. Na lawhsap diing a lampi omsun tuh nang leh nang kimuan ziakin ahi. Pathian in hon it ahi chih na theihleh lawhsap diing na lau kei diing. Pathian in hon it ahi chih na theihleh mite nawlkhin a om diing na lau kei diing. Pathian’ itna in thilteng huam ahi - lianlua, zalua himai. Huai Pathian, hon hondampa leh suaktasakpa in hon mawhpaih dia nang ngaihsun maw? 

Mite mawhpaihtu Setan ahi. Pathian in na hinkhua ah mikhial na hihlam hon man (convict) in, Amah mah in suahtakna lampi hon kawkmuh diing hi. Setan in ahihleh hon mawhpaih in suahtakna diing lampi omlou, a hon chi diing. Mi tampite’n hiai a Laisiangthou gen tup, na hon it zawh khop leh nang kei hon laulou diing, ahihkeileh kuahiam khatna it zawh khop leh launa in na hinkhua nuse di chih sakha uhi. Himahleh, a gentup, Pathian na ki-it sak leh nang laulou diing chih ahizaw. Na hinkhua a na lauh ut keileh (lau hinkhua a na hinnop keileh) Pathian na ki-itsak diing himai. 

Ginna tungtawnin Pathian hon itna, tu mahmah in saang in. Malam nawt in. Ginna in kisakhia inla, Pathian hon itna a vekpi in kilaakta. Pathian a kinga a, Amah na ki-it sak a, nang Amah na it leh, ginna tawh kisai a panlak na sawmna tengteng na mangngilh thei diing. Pathian ki-it sak lel inla, nang Amah it in, a hong vaiveng mai diing. Pathian’ itna na sung ah hong thoutou diing a, launa teng a hawlmang diing hi.

............…………………

©ReACH:GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message A-VA-TAR

“A-va-tar” kichi film, kum 2009 in hong kikhahkhia hi. Hollywood film bawltu lohching mahmah, James Cameron bawlkhiat ahi. Aman, hiai film a gelh pat nung kum 14 in ettheih dingin phoukhiat in om hi. Film etnop mahmah khat ahi. Huan, khalam thil ah leng ngaihtuahna la mahmah film ahi. Tomchikin gelh zual leng, hiai film ah Pandora kichi, kha (moon) ah, mihingte hong om chiangin, a gam mi Na’vi kichite lauthawnhuai uh ahihman in, amaute laka omtheihna dinga taksa kikhekna poimoh ahi chih dan ahi.

Achihleh “Avatar” bang genna ahia? Hiai thumal Sanskrit apan kilakhia ahi. A gennop ahihleh pathian muhtheih a hong kikhek chihna ahi. Hindu sahkhua ah hiai pathian sa hong suak in, a hoihte hawi ding leh a giloute suse dia hong paina ahi a chi uhi. Hiai banga pathian mihing hong suahna ah, mihing melpu himahleh mihing taksa bang taksa nei ahikei. Abiktakin, Vishnu pathian in khovel a sualna a sangluat chiangin hiai bangin mihingte lakah sualdouna nasep sem dingin hong kuanzel hi, a chi uhi. Huai ahihman in, Hindu sahkhua ah pathian tuh diktattaka vaihawm pathian leh sualna hua pathian ahi chih lungput a hon neisak hi. Huchibang a Vishnu pathian mihing a hong kilak 8 veina Krishna ahi a chi uhi.

Krishna sinsakna leh Jesu Khrist sinsakna tulai khovel ah tehkakna tam mahmah mawk hi. Abiktak in, pluralist (gindan tampi pomkhawm) te’n kibang sa in, pathian dik tuaktuak bangin a gen uhi. Amaute’n, pathian tapa ahi uh, a pian ding thu uh genkholhna om ahi, a pianna mun uh leng mun haksa ahi, sihna ding huna pathian’ hutkhiatna ziaka suakta ahi uh, ganching banga tehkak ahi uh, hiamhei zanga sihsak ahi uh, itna leh muanna a sinsak tuak uh, chi uhi.

Ginna kibatpihlouh namte laka khosa a kihihman in, pilvangtaka huchibang thu tangkoute I kizohsaklouhna ding un Berea saptuamte (Nas. 17) bangin I thuzakte uh Laisiangthou toh etkak zel a poimoh ahi. Jesu Khrist mihing suahna toh kisai a poimoh mahmah ahihleh ‘nungak siangthou apan pianna’ (virgin birth) ahi. Krishna ahihleh Vishnu pathian mihing suahna toh kisai in a 8veina ahi a chi ua, dik leng ahi maithei. Himahleh, Jesu Khrist ahihleh huchibang a Pathian, mihing suak omsun, Jawlnei in kum 1000vel paisa a ana genkholh ahi. Kikim banga ngaihtuahna omthei ding hi mawngmawng lou ahihman in, huchibang mite kizousak kei ni.

Jesu Khrist leh pathian dangte kibatlouhna tampi a om hi. Huaite lakah a poimoh mahmah ahihleh, amah mihing taksa, melpu in, Tungnungpen thilhihtheihna zangin a hong piang hi (Cf. Luke 1:35). Huan, Amah tuh eite sihsik in a hong si a, ni thum ni in thupina taksa toh kaihthoh a om in, van ah Pathian taklam ah tuta hi. Huan, Amah mah in Hotdamna Lampi omsun kahi a kichi lai hi (Cf. Heb. 2:17; John 14:6, 16).

Huaiziakin, Jesu Khrist kia lampi, thutak leh hinna omsun ahi chih phawkin, Amah mohnei eite tan dingin Pathian mihing hong suak, I khelhnate maisakna dinga kraws a hong si a, sihna tunga I vualzohna dinga ni thum ni a thoukik Pathian ahi chih gum ngam chiat dingin I kichial ahi.
...........………………….
©ReACH:GWM-3E/02
ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message KHOVEL KHUALZINNA

31st December, 2017 Sunday Message 'MUHLOUH LAMSAU KHUALZINNA' kichi ka gelhkhit nung a hiai thupi 'KHOVEL KHUALZINNA' chih pansan a Sunday Message gelhthei nawn dia ka om man in ka kipak mahmah a, hun hoihtak hon bawlsak Pathian kiang ah kipahthu ka gen masa hi. Hiai thupi 'MUHLOUH LAMSAU KHUALZINNA' kichi kum kikimkhen zan a gelh ahihman in hun luite ngaihtuahna ah a hong lang dundun a, huchimah bang in mel a muh nailouh hun hong pai dingte'n lungsim suangtuahna a luah nasa mahmah uhi. Tu'n bel 14th January, 2018 ah i dingta ua 31st December nitak a meipi zing liailiai in a bop ziak a maban ding minute 1 lel leng kimutheilou tuh tuni'n ni 13 mawngmawng i zang zouta uhi. Hiai ni 13 sung in khovel ah bangteng a tung a chih ngaihtuah seng ding ahi nawnkei. Khovel genlouh mahni hinkhua mahmah ah leng sim seng vual ding ahi nawnlou.

'Ka khial ngeikei' chileng zuau gen ka hi ding. Hiaibang geih in khovel ah hun teng in ka kipak gige chimawk leng ka damtheihna diklou ahi dia, Doctor ka ki-etsak khong ngai ding hi. Kipahna kichi a hoihlou ahi ka chihna ahikei a, ka gen uttak bel hiai khovel khualzinna ah nopni, dahni chihte i niteng hun zat ah paikhawm helhel ahi chih ahizaw. Tua kipak mahmah mi tuh den zek chiang in i dah thei a, tua dah mahmah mi tuh den zek chiang mah in i kipak thei. Huih nundan lel inleng mihing lungsim ngaihtuahna khek thei a, lunglengtak bang in hon koihthei mawk hi. A khenchiang bang in theihsiam haksa mahmah sek. 

Ka na genkha ngeita a "Hehnep ngaite hehnemtu a pangpang in eimah hehnep ngai dinmun a i hon din chia zaw haksa deuh hiau ahi" chi'n. I lohsapnate ziak a hehnep ngai, i vangsiatnate ziak a hehnep ngai, i ngaihzawng in hon khen ziak a hehnep ngai, i innsung khosak haksat ziak a hehnep ngai, i thiltuahte ziak a hehnep ngai chihte leh a dangdang tamtak hiai khovel khualzinna ah i tuak sek uh. Hehnemtu ding i neihlai hun tuh mi hampha i hihlai uh ana hi. I lungkhamnate a kipan a kipaktak a hinkhua zang dia hon hanthawntute tuh ei adia Pathian sawltak himai uh ahi chihte theihsuah thakthak in a om. 

Dotna khat om thei tuh hiai ahi - hiai khovel na khualzinna ah, lam sautak tawn a na pailai in hehnemtu ding, panpihtu ding chihte koi ah na zong a? Mu zou gige in na kithei hia ahihkeileh mu zou ngeilou? Hiai dotnate lungsim a na kidot kawm in hiai thu simsuaklai mah dih, na lungsim a dawnna om toh a kituak na hiam? Nang hon hehnemtu ding na mihinpihte kiang a na zonleh na muh hun a om sam dia himahleh hun teng in na mu zoukei ding. Na muan penpen na nu-le-pate, na lawmpa ahihkeileh na lawmnu kiang ah na zon aleh na muh hun a om dia himahleh na lam-etlouh dantak in na lohsam tam zaw ding. Ahihleh koi ah hehnemtu ding zongta ding? A dawnna tuh - Pathian kiang kia ah hehnemtu ding zong in. Amah a mel in hong kilang kei maithei himahleh amah kiang ah zong phot peuhmah leng ama'n a lampi ding hon bawlsak ding a, khovel mite kuamah muh ding himhim a omlouh lai nangawn inleng na lungtang ngaihtuahnate hong luah in kipahna leh lungkimna hon guanthei gige ahihman in. Mihing khat hinkhua tuh i lungput ah kinga ahi a, huai kipahna, lungkimna leh khamuanna lungput hon neisak thei tuh Pathian kia ahi.

Toupa’n hon vualzawl hen!

..........................................

©ReACH: GWM-3E/03

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.

Sunday Message TAMSEM PE NI!

“Ahih hang in huai lam thu ah zaw theh tawm in a at tawm na diing, theh tam in a at tam na diing hi. Michih in it pipi a pelou in, piaklouh theihlouh bang a leng ngaihtuah a pe tuanlou in, a lungtang ua a tup bang zel un pe chiat hen."

Sawltakpi Paul in thilpiak pen HAICHI TUH toh a tehkhin hi. Huaibel, michih in I tuh bangbang lou kik nawn lel i hi. Huchimah bangin, Toupa’ kiang a I THILPIAK leng huai bangmah ahi. Tamzaw deuh pe pa’n vualzawlna tamzaw deuh mu a, tawmzaw deuh pe tupa’n vualzawlna tawmzaw deuh mu hi. Gendan dangin thilpiak omziatak I ngaihsut vengveng leh, “Vualzawlna bangzah don I ut a?” chih toh khaikhin theih hi.

I hun, sum leh pai kiphal bangbang pe le hang vualzawlna in hon ngak ahi. Tuni’n thilpiak tampi I piak theihna dingin (ahihkeileh, vualzawlna tampi I muh theihna dingin) LUNGTANG A TUPNA BANG A PIAK ding ahihdan I muthei hi. Pathian in dangka leh dangka-eng tampi Ama’ kianga I va tawikhawm venvon pen kipahpih hipahlou hi. Tawikhawm utna lungtang I neihpen kipahpih masa zaw hi. Dangka, dangka-eng leh sum-le-paite mihingte’n gou bangin kingaihsun hi. Huaiziakin, sum-le-pai tam I senna mun peuh ah I lungsim leng om hi. I lungtang a omna mun ah sum-le-pai sen poi kisalou hi. Hiai leigou leh lungtang in kichimatna lianpi nei ahihman in Pathian in hiai leigou, sum-le-paite tungtawn in I lungtang bangzah Amah lam a awn hiam chih hon chian nuam hizaw hi. “Na gou omna peuh uah na lungtang uh leng a om diing” (Mt. 6:21).

Pathian leh a lalgam nnasepna manphatdan theitel semsem lehang huai a sum peipungna (investment) bawl lit huai hetlou ding ana hizaw hi. Pathian pen a masapen a I koih theihlouh sek chiang in I sum-le-paite pen thilpiak lam ah tampi luangkhe theilou hi. “A lalgam leh a diktatna zong masazaw un, huchi in huai tengteng a hon piak behlap ding hi” (Mt. 6:33). I lungtang in a masazaw a koih diing pen a khentel theihna pen i thilpiak in genchian mahmah hi. Huaiziakin, Pathian pen I lungtang a masapen a koih gige kul hi.

Eksodas 35-36 kikal ah Toupa’ Biakbuk a lam masakna pen uh I mu hi. Hiai Biakbuk lamna ah Israel mipite’n KIPHALTAK A THILPIAK (freewill offering) tampi petmah hon tawikhawm uhi. “Utna lungtang (willing heart) nei kuapeuh in Toupa kiang ah thillat/thilpiak hon tawi hen” (Eks 35:5) chi in Mosi in gen hi. “Huchi in a lungtang uh tohthoh a om peuhmah leh, a lungtang ua utna nei khempeuh in Biakbuk lamna diing in Toupa’ thilpiak a hon tawikhawm uhi” (Eks. 35:21).

Hichi bangin I muh behlap lai hi. “Israel tate’n, Toupa kiang ah kiphaltak a thilpiak a hon tawikhawm ua, a lungtang ua utna nei numei leh pasal khempeuh in nnasepna a zat ding poimoh thilte Mosi kiang a Toupa’n thu a piak bangin a hon tawikhawm uhi” (Eks. 35:29).

Huai nnasepna a dia poimoh a hon tawikhawm theih uh bilbahte, taute, khite, khau rong tuamtuamte khawng ahi. Tuni’n leng kua hiam khat a tamzaw deuh thohzou dia I gintakte I mitsuan khanak thei. Nang mah a om, na neih bangbang a na piak pen Pathian in hon kipahpih ahihdan chiangtak in I muthei.

Mi sangnga vakna dingin Jesu’n crore-pati khat poimohlou hi. A lungtang a kiphalna nei naupang neu khat in a neih sunsun Tanghou beu nga leh ngahou nih lel zangin mipite vak hi. Thilpiak piakna ah loh tampi neite kia hilou in Toupa akipan a vualzawlna dong peuhmah in tawikhawm tek ding ahi. "Huchiin amau’ hihtheih bang chiat a hon tawikhawm ua, a poimoh khengval tan hial a hon tawikhawm uhi." Eksodas 36:5-6 kikal ah thilpiak hon tawikhawm nawnkei uh chi a tang-au hial uh ahih dan I sim hi. Lungtang apan kiphaltak in tawikhawm chiat lehang thil thupitak semkhe thei di’n vualzawlna donglou I omkei hi.

Thilpiak I piak ma in Pathian leh a nnasepna pen I lungtang a a MASAPEN a I koih a kul hi. I taksap leh poimohte, I silh-le-ten ding, I nek-le-tak dingte a masa a, a pan chiangin I thilpiak tam thei ngeilou hi. Pathian in a omlai teng deihlou in Amah a masapen a I koih hon deih hi. Ei nna poimoh teng I ngaihtuah masak chiangin thilpiak pen kipaktak a piak haksa hi.

I Laisiangthou in “…Theh tawm in a at tawm dia, theh tam in a at tam diing” (2 Kor. 9:6) a chi hi. Pathian in thilpiak petute pen Thukhun Lui hi in Thukhun Thak hitaleh a leh tampi a pekik ding ahihdan chiam hi. “Pia un, huchi in piak in na om diing uh. Hoihtak a teh a, hengak a, singak a, let noinoi in na angsung uah piak in na om diing uh. Noumau tehna ngei mah a tehsak a piak hi ding na hi ngal ua” (Lk. 6:38).

I tehna bawm lian peuh leh I muhkik ding tam ding hi. I piakkhiat pen mangthang maimah hilou in Pathian in a pung toh hon dinkik zel hi. Hun tampi ah I thilpiak a tawm theih ziak in Pathian in a pung hon piakkik pen muhtheih ding zong tawmchik pha nak hi. I thilpiak pen a sumpi ahi chih mangngilh kei ni.

Simtute salam khalam a vualzawlna tu hunthak a I mutheihna ding in, I tha, hun, sum leh pai tamsem Pathian a dingin pe ni.

..........................................

©ReACH: GWM-3E/01

ReACH:Gospel Writing Ministry kichi December 19, 2017 a patkhiat ahi. Hiai Ministry in thugelh tungtawn a khalam taksapte muh ding, leh khat-le-khat thutak a kihantoh tuah ding lunggulh pen in nei hi.